MAMA WËTI U BËIBEL: „Un musu hoi pasensi da unuseei ta da unuseeipaadon ku hii unu hati. Ee i ku wan sëmbë a’ soni, nöö ja musu hoi ën a bëë, leti kumafa Jehovah an ta hoi i a bëë tu.”​—Kolosën 3:13.

Andi a kë taki? Di Bëibel ta lei taa zöndu dë kuma wan paima di wan sëmbë abi u paka wan woto sëmbë, nöö di paadon di wan sëmbë ta da wan woto sëmbë, dë kuma te di sëmbë piki di woto sëmbë taa aan fu paka di paima möön (Lukasi 11:4). Wan buku ta taki taa di Giiki wöutu di de puu ko ’puu otowan a bëë’ di dë a di Bëibel, kë taki taa „wan sëmbë ta disa wan paima di wan sëmbë bi musu pakëën, u di an ta hakisi di sëmbë di paima möön”. Fëën mbei te wan sëmbë du wan soni ku u, hën u dëën paadon, nöö wa o suku u feni wan soni a di sëmbë dë baka. Ma di dë di u ta dë kabakaba u da di sëmbë paadon, an kë taki taa u si di soni di a du kuma wan bunu soni, nasö taa di soni di a du ku u an hati u. Ma useei ta buta taa woo disa di soni dë, hii fa a hati u.

A fiti u da wotowan paadon a di ten fuu aki tu ö? Hii u tuu ta du hogi, u di u da zöndu libisëmbë (Loomë 3:23). Nöö fëën mbei a dë wan köni soni u ta da wotowan paadon, u di useei o kë u wotowan da u paadon wan daka tu. Boiti di dë, u ta feni wini tu te u ta da wotowan paadon. Na un fasi?

Te u ta hoi wotowan a bëë u di wa ta da de paadon u dee zöndu u de, nöö ku useei u ta du. Te u ta hoi wotowan a bëë, nöö wa o ta dë waiwai, ma woo ta dë fukafuka. A sa mbei u ko siki tu. Data Yoichi Chida, ku wan leima u hei siköö de kai Andrew Steptoe, bi taki a wan kolanti taa de ko si a di ten aki taa hatiboonu, ku di hoi di sëmbë ta hoi wotowan a bëë, sa mbei sëmbë ko siki a de hati.—Journal of the American College of Cardiology.

Ma luku un wini u sa feni te u ta da wotowan paadon. Te u ta da wotowan paadon ku hii u hati, nöö a ta mbei u libi bööböö makandi ku useei, söseei a ta mbei taa u ku wotowan ko dë möön bunu mati. Ma di möön fanöudu soni, hën da u ta lei taa u ta djeesi di Gadu di ta da zöndu libisëmbë paadon, di kë taa useei musu ta du sö tu.​​—Maikusi 11:25; Efeise 4:32; 5:1.