DI WOTO DI NAMA KU DI KAFITI | U TA FENI HEEPI TE U TA BEGI Ö?
Begi—Unfa a sa heepi i?
Ufö i biinga a wan soni baka, nöö joo hakisi iseei ee un wini a o tja ko da i, na sö nö? Wë a dë wan föutu soni u hakisi iseei ee un wini joo feni te i ta begi ö? Aan fu dë sö. Wë u ta kë ko sabi ee begi ta heepi. Di bunuhati womi de kai Jöpu seei bi hakisi ënseei taa: „A bi o piki mi, ee mi bi o bai kai ën u?”—Jöpu 9:16.
A dee woto dee u bi luku ufö disi, u bi ko si taa na sëmbë di ta biibi a Gadu nöö ta begi, söseei na sëmbë di pakisei u de ta toobi de nöö ta begi. Di tuutuu Gadu ta haika begi tuutuu. Te u ta begi a wan fasi di fiti, söseei te u ta begi da soni di fiti, nöö a o jei dee begi fuu. Gadu ta piki u taa u musu ko zuntu ku ën (Jakobosi 4:8). Wë, na un fasi di begi di u ta begi sa heepi u? Wë boo go luku.
Woo ta dë bööböö.
I ta booko i hedi pasa maaka ku dee fuka fii ö? Wë di Bëibel ta piki u taa te u abi bookohedi, nöö, „u musu ta begi” Gadu, söseei u musu ’ta tja hii dee fuka fuu nango ta konda dëën’ (1 Tesalonika 5:17; Filipi 4:6). U sa fii möön bunu, te u ta konda dee bookohedi dee u abi da u Tata a liba ala. Luku di lai di u ta kisi a Psalöm 55:22: „Tuwë di hebi fii da Jehovah, nöö hënseei o heepi i.”
„Tuwë di hebi fii da Jehovah, nöö hënseei o heepi i.”—Psalöm 55:22
Sömëni sëmbë dë a goonliba aki di feni di lö kötöhati aki. Wan womi de kai Hee Ran di ta libi a di köndë Zuid-Kolea, bi taki taa: „Mi da wan sëmbë di dë ku gaan fuka. Ma te mi begi, nöö mi ta fii bunu, u di mi ta fii taa mi puu wan hebi a mi liba, nöö mi ta kisi di kaakiti u mi go dou.” Wan mujëë
de kai Cecilia, di ta libi a di köndë Filipijnen, bi taki taa: „U di mi dë wan mama, nöö mi ta booko mi hedi ku dee mujëë mii u mi, söseei mi ta booko mi hedi ku di mama u mi di abi wan siki di ta mbei taa an ta sabi mi möön. Ma u di mi ta begi, mbei mi sa ta tja dee fuka dee ta miti mi hiniwan daka. Mi sabi taa Jehovah o heepi mi u luku dee sëmbë u mi.”A ta mbei u feni kötöhati, nöö a ta da u taanga te fuka ta miti u.
I dë ku gaan bookohedi ö? Gaan fuka ta miti i, nasö i dë ku wan siki di sa mbei i lasi i libi ö? Te u ta begi di Gadu ka „hii kötöhati ta kumutu”, nöö a sa mbei u fii bunu. Di Bëibel ta taki taa „Gadu hën ta heepi u fuu feni kötöhati” (2 Kolenti 1:3, 4). Wan daka di Jesosi bi dë ku gaan bookohedi, „hën a tjökö kini a goon”, hën a „begi Masa Gadu” (Lukasi 22:41, 43). Wan womi di bi ta dini Gadu ku hii hën hati de kai Nehemia, bi miti fuka, u di wanlö hogi sëmbë bi kë tapëën fu an du di wooko u Gadu. Fëën mbei a bi begi taa: „Mi ta begi i, da mi taanga”. Dee soni dee ko pasa bakaten bi lei taa Gadu bi heepi ën tuutuu fu an fëëë möön, söseei faa bi sa kaba di wooko (Nehemia 6:9-16). Wan womi de kai Reginald, di ta libi a di köndë Gaana, ta taki unfa begi ta heepi ën. A bi taki taa: „Te mi ta begi, möönmöön te mi dë ku gaan fuka, nöö mi ta fii taa mi ta konda hii dee fuka u mi da wan sëmbë di sa heepi mi, söseei di ta lei mi taa ma a’ fu fëëë aluwasi andi ta pasa.” Awa, Gadu sa da u kötöhati te u ta begi ën.
Gadu o da i köni
So u dee soni dee u ta du, sa tja hogi ko da u ku dee sëmbë fuu. Ma unfa u sa du soni a wan köni fasi? Di Bëibel ta taki taa: „Ee wan sëmbë i si taa ja a’ fusutan [köni, NW] tjika a soni, nöö i musu begi Gadu faa da i fusutan e, nöö a o da i ën” (Jakobosi 1:5). Ee u ta begi Gadu faa da u köni, nöö a sa mbei di santa jeje fëën heepi u fuu du soni a wan köni fasi. Wa musu fëëë u hakisi Gadu di santa jeje fëën, biga Jesosi ta piki u taa ’u Tata a liba ala o da u di Akaa fëën [santa jeje, NW], te u ta begi ën’—Lukasi 11:13.
„Mi begi Jehovah faa heepi mi u mi du di möön bunu soni.”—Kwabena, Gaana
Jesosi seei bi ta fii taa a bi musu hakisi hën Tata faa heepi ën te a bi musu du wan soni. Di Bëibel ta piki u taa di Jesosi bi o tei dee 12 womi dee bi o toon apösutu fëën, hën a „go a wan kuun liba go begi Masa Gadu, nöö hën a tan dë begi wan hii ndeti.”—Lukasi 6:12.
Sömëni sëmbë a di ten aki bi du kuma Jesosi, u di de bi si fa Gadu bi piki dee begi u de, te de bi ta hakisi ën faa heepi de u sabi unfa de sa du soni a wan köni fasi. Wan mujëë de kai Regina, di ta libi a di köndë Filipijnen, bi konda dee sömëni fuka dee bi miti ën. Hën manu dëdë, nöö fëën mbei a bi musu ta sölugu hënseei ku dee sëmbë fëën. A bi lasi di wooko fëën, nöö a bi ta taanga dëën faa kiija dee tu mujëë mii fëën. Ma andi bi heepi ën faa du soni a wan köni fasi? Wë a bi taki taa: „Mi ta lei taa mi ta futoou Jehovah u di mi ta begi ën.” Wan womi de kai Kwabena, di ta libi a di köndë Gaana, bi ta konda faandi mbei a bi hakisi Gadu faa heepi ën. A bi taa: „Mi bi lasi di bumbuu wooko u mi ka mi bi ta kisi bumbuu möni.” Di a bi ta luku un wooko a bi sa du bakaten, hën a taki taa: „Mi begi Jehovah faa heepi mi u mi du di möön bunu soni.” A taki tu taa: „Mi bi fii seei taa Jehovah bi heepi mi u tei wan wooko di bi sa da mi pasi u mi go a fesi a di biibi, söseei u mi sa sölugu miseei.” Gadu sa heepi i tu te i ta begi ën u soni di sa heepi fii ku ën ko dë möön gaan mati.
U taki u wan tu soni nöö ka begi sa heepi i (Ee i kë sabi na un fasi begi sa heepi i möön, nöö luku di pisi „ Heepi di i sa feni te i ta begi.) Ma ee i kë feni dee wini aki, nöö i musu ko sabi Gadu fosu, söseei i musu ko sabi di kë fëën tu. Ee i kë ko sabi, nöö i sa hakisi dee Jehovah Kotoigi u de heepi i fii sa ko sabi soni u Bëibel. * Di soni aki sa dë di fosu soni di o heepi i fii ko zuntu ku di „Sëmbë di ta haika begi.”—Psalöm 65:2.
^ pal. 14 Ee i kë ko sabi möön soni, nöö go a dee Jehovah Kotoigi dee dë a di pisiwata ka i ta libi, nasö i sa go a www.pr418.com/srm.