Andi ii pakisei? Gadu lobi feti ö? Wë ee sö a dë, nöö ambë së a ta tei? Te i ko sabi unfa a dë tuutuu, nöö di soni dë sa tooka di fasi fa i ta si feti. Boo taa i ko sabi taa Gadu lobi feti, nöö a ta heepi dee sëmbë dee i bi o kë wini di feti. Wë i bi o wai seei u di i sabi taa de o wini di feti u di Gadu dë a de së. Ma nöö unfa i bi o fii ee i bi ko sabi taa Gadu ta heepi dee felantima fii? Wë kandë i bi o kë tei a di së di Gadu ta heepi.

Wan möön fanöudu soni dë di mbei taa i musu ko sabi unfa Gadu ta si feti. Te i ko sabi unfa Gadu ta si feti, nöö a sa mbei i ko ta si Gadu wan woto fasi. Ee i dë wan u dee milionmilion sëmbë di ta pena u di feti dë a di köndë ka i ta libi, nöö i musu ko sabi di piki u di hakisi aki: Gadu dë wan sëmbë di kë u sëmbë feti ku deseei kumafa so sëmbë ta mëni ö? A dë sö taa a ta da sëmbë taanga u de feti, u di a kë si fa sëmbë ta pena wotowan u? Naa an ta du na wan soni u di an ta booko hën hedi ku dee sëmbë dee wotowan ta pena?

Joo foondo seei te i ko sabi taa di soni di di Bëibel ta taki u feti, tooka seei u dee soni di sömëni sëmbë ta pakisei. Te i luku ën bunu, nöö di fasi fa Gadu ta si feti an tooka seepiseepi. Boo luku andi di di Bëibel ta taki u di fasi fa Gadu bi ta si feti na awooten, söseei a di ten di Jesosi bi ko a goonliba. A o heepi u fuu ko sabi unfa Gadu ta si feti a di ten aki, söseei a o heepi u fuu ko sabi ee libisëmbë o ta feti u nöömö.