Di feti di Gadu seei bi feti ku dee Egepiti sëmbë ta lei taa na hii feti Gadu buuse. So juu, hënseei bi ta manda dee Isaëli sëmbë u go feti. A bi piki de taa de bi musu go feti ku dee Kaana sëmbë, u di de bi dë sëmbë di bi abi hogihati pasa maaka (Detolonomi 9:5; 20:17, 18). A bi piki Dafiti di bi dë di könu u dee Isaëli sëmbë faa go feti ku dee Filisiti sëmbë di bi ta pena wotowan. Gadu bi lei Dafiti unfa a bi musu feti faa bi sa wini dee sëmbë dë.​—2 Samuëli 5:17-25.

Dee Bëibel woto aki ta lei taa te sëmbë bi ta du hogi ku dee Isaëli sëmbë, ku te de bi ta pena de, nöö Gadu bi ta da sëmbë pasi u de feti u dee sëmbë fëën sa feni tjubi, söseei u na mbei na wan soni ko poi di tuutuu biibi. Ma luku dii fanöudu soni di u sa lei u dee feti di Gadu bi manda dee sëmbë fëën u de go feti.

1. GADU WANWAN BI TA TAKI AMBË BI MUSU GO A FETI. Wan daka Gadu bi piki dee Isaëli sëmbë taa: „An o dë fuun feti.” Wë faandi mbei a bi taki sö? U di Gadu seei bi o feti da de (2 Kloniki 20:17; 32:7, 8). A bi feti da de sömëni pasi, kumafa u taki a bigi u di woto aki. Ma so juu Gadu bi ta manda dee Isaëli sëmbë u de go feti. A bi piki de taa de bi musu go feti u de sa go libi a di Paamusi Köndë, söseei de bi musu feti u sëmbë an bi musu ko puu de a di köndë.​—Detolonomi 7:1, 2; Josua 10:40.

2. GADU WANWAN BI TA TAKI NA UN TEN DE BI MUSU FETI. Dee dinima u Gadu bi musu wakiti ku pasensi u di juu dou te Gadu bi o piki de u de go feti ku dee sëmbë dee bi ta pena de, ta du hogihati soni ku de. Ma de an bi musu go feti ee Gadu an bi manda de. Te de bi go feti söndö u Gadu manda de, nöö Gadu an bi ta dë ku de. Wë di Bëibel ta lei taa ee na Gadu hën bi manda dee Isaëli sëmbë u de go feti, nöö hogi bi ta miti de. *

3. GADU AN TA WAI TE SËMBË TA DËDË, ALUWASI DI SËMBË DË DA WAN HOGIHATI SËMBË. Jehovah Gadu hën da di sëmbë di ta da libi, nöö hën mbei libisëmbë tu (Psalöm 36:9). Fëën mbei an ta kë si sëmbë ta dëdë. Ma a dë wan tjali soni taa hogihati sëmbë dë di ta suku fasi u pena wotowan, nöö de ta kii woto sëmbë seei tu (Psalöm 37:12, 14). U di Gadu bi kë u dee soni dë kaba, mbei so juu a bi ta da sëmbë pasi u de feti ku dee hogihati sëmbë dë. Ma hii dee jaa dee a bi piki dee Isaëli sëmbë u go feti ku dee sëmbë dee bi ta pena de, Gadu bi abi „tjalihati” u dee sëmbë dë, nöö ’hati fëën an bi ta boonu hesi’ ku de tu (Psalöm 86:15). A bi piki dee Isaëli sëmbë taa ufö de bi go feti ku wan köndë, nöö de bi musu hakisi dee sëmbë ee „de an kë u de disa di feti”. A sö wan fasi dee sëmbë bi sa bia libi, nöö de an bi o pena feti seei (Detolonomi 20:10-13). Sö wë Gadu bi lei taa „an ta wai te wan hogihati sëmbë dëdë, ma a ta wai te wan hogihati sëmbë bia libi, nöö a libi go dou.”​—Ezekiëli 33:11, 14-16. *

U si taa na awooten Gadu bi ta si feti kuma wan fasi u puu di pena di sëmbë ta pena wotowan ku di hogi di sëmbë ta du ku wotowan. Ma u si tu taa Gadu hën bi abi di leti u taki na un ten feti bi musu feti, söseei ambë ku ambë bi musu feti. Na libisëmbë hën bi abi di leti u taki dee soni dë. Ma a dë sö taa Gadu bi feti dee feti dë u di a bi kë kii hia sëmbë u? Kwetikweti. Di fasi fa Gadu bi du soni ta lei taa a buuse hogidu (Psalöm 11:5). Di fasi fa Gadu bi ta si feti bi ko tooka di di Womi Mii fëën, Jesosi Keesitu, bi bigi du di peleikiwooko u?