1, 2. Unfa di Bëibel ta lei taa lobi dë fanöudu?

LOBI da di fasi di Jehovah Gadu abi möön gaanfa (1 Johanisi 4:16). Jesosi da di fosu soni di Jehovah mbei. A bi libi milionmilion jaa ku hën Tata a liba ala, nöö a bi ko sabi taa Jehovah da wan lobihati Gadu (Kolosën 1:15). Di wan seei lobi Jesosi bi lei taa a abi di a bi dë a liba ala, söseei di a bi dë a goonliba aki. Fëën mbei u sa dë seiki taa hii juu Jehovah ku Jesosi o tii a wan lobihati fasi.

² Di wan sëmbë bi hakisi Jesosi andi bi dë di möön hebi wëti, hën a piki taa: „Di möön hebi wan u? Hën da i musu lobi Gadu i Masa te dou ku hii i hati ku hii i akaa [libi, NW] ku hii di pakisei fii di i abi. Hën da di möön hebi wan u hii dee wëti tuu. Ma nöö wan otowan dë leti nëën baka, hën da i musu lobi di otowan fii leti kumafa i lobi i seei.”​—Mateosi 22:37-39.

3. Ambë da „di otowan” fuu?

³ A dë fanöudu u lobi hii sëmbë. Jesosi bi taki taa u musu lobi Jehovah, söseei a bi taki taa u musu lobi di wotowan fuu tu. Ma ambë  da „di otowan” fuu? Ee u toou, nöö di wotowan fuu da di sëmbë di u ku ën toou. Dee baaa ku dee sisa fuu dee dë a di kemeente seei da dee wotowan fuu dee u musu lobi tu. Söseei dee sëmbë dee u ta miti a di peleikiwooko da dee wotowan fuu tu. A di woto aki woo lei unfa u sa lobi di wotowan fuu.

4. Unfa wan toou libi sa waka bunu hii fa u da zöndu libisëmbë?

⁴ Di Jehovah mbei Adam ku Eva, hën a tja de ko a wan. A bi dë di fosu toou. Gadu bi kë u de abi wan piizii toou libi, nöö de bi musu pai miii fuu hii di goonliba (Kenesesi 1:27, 28). Ma soni an bi ta waka bunu a di toou libi u de möön, u di de bi pasa Jehovah buka. Di soni aki bi tja zöndu ku dëdë ko da hii dee bakamii u de (Loomë 5:12). Ma tökuseei soni sa waka bunu a wan toou libi a di ten aki. Jehovah da di Sëmbë di seti di toou libi, nöö a da womi ku mujëë di toou dee möön bunu lai a di Bëibel.​—Lesi 2 Timoteo 3:16, 17.

5. Faandi mbei lobi dë fanöudu a di toou libi?

⁵ Di Bëibel ta lei u taa a dë fanöudu u abi tuutuu lobi da wotowan ee u kë taa u ku de libi waiwai makandi. Sö nöö a musu dë a di toou libi tu. Apösutu Paulosu bi taki u tuutuu lobi taa: „Ee i lobi wan sëmbë joo ta hoi pasensi dëën e. Joo ta fii ku ën. . . . Ja o ta haun ku ën. . . . Ja o ta njan buka ta taki soni ta tuwë dëën. Ja o mbei i seei hei dëën. . . . Ja o ta du fanafiti soni ku ën. Ja o ta suku bunu fii seei wanwan nöö a kaba, ma joo ta suku bunu fii ku ën tuu. . . . Hati fii an o ta boonu ku ën hesihesi, nöö ja o ta hoi ën a bëë tu. . . . Ja o ta abi piizii ku hogi du fëën möönsö, ma te a ta du soni a pasi, nöö joo wai. Ee i lobi wan sëmbë, joo ta tjubi ën fu an kisi sen a lanti. Joo ta suku di bunu pisi fëën nöömö. Joo a’ di mëni taa na sö nöö a o dë, te wan ten seei a o ko bunu nöömö. Ja o lasi hati nëën möönsö. Nöö di soni de kai lobi, hën an o kaba a mundu möönsö e” (1 Kolenti 13:4-8). Te u ta pakisei u dee soni di Paulosu taki aki, söseei te u ta du de, nöö woo sa abi wan piizii toou libi.

6, 7. (a) Andi di Bëibel taki taa wan womi di dë hedima u wan wosudendu musu du? (b) Unfa wan womi di dë bakama u Keesitu musu libi ku ën mujëë?

⁶ Jehovah bi taki ambë musu dë di hedima u di wosudendu. Paulosu bi taki taa: „Masa Gadu hën da di hedima u Masa Jesosi Keesitu, nöö Masa Jesosi hën da di hedima u wan womi, nöö di womi hën da di hedima fëën mujëë” (1 Kolenti 11:3). Jehovah kë taa wan womi musu dë wan lobihati hedima u di wosudendu, nöö an musu abi taku fasi. Jehovah seei da wan Hedima di abi suti fasi, nöö an ta pakisei hënseei nöö. Fëën mbei Jesosi abi lesipeki da di lobihati tii u Gadu. A bi taki taa: „Mi lobi mi Tata” (Johanisi 14:31). Jesosi an bi o taki di soni aki ee hën Tata bi ta gandji dëën.

⁷ Hii fa di womi da di hedima u di mujëë fëën, tökuseei di Bëibel ta piki ën taa a musu ta lesipeki di mujëë fëën (1 Petuisi 3:7). Unfa wan womi sa du di soni aki? A sa pakisei dee soni di hën mujëë abi fanöudu, nöö a musu abi lesipeki da dee soni di hën mujëë möön lobi. Di Bëibel ta taki taa: „Un dee womi, un musu lobi dee mujëë fuunu leti kumafa Jesosi Keesitu lobi u dee sëmbë fëën teefa a dëdë da u” (Efeise 5:25). Jesosi bi dëdë da dee bakama fëën. Ee wan womi dë wan lobihati hedima kuma Jesosi, nöö an o taanga da di mujëë fëën u lobi ën, söseei u abi lesipeki dëën, nöö a o abi lesipeki da dee soni di hën manu buta taa a o du tu.​—Lesi Titusi 2:3-5.

8. Unfa u musu libi ku dee baaa ku dee sisa fuu?

⁸ A di ten aki milionmilion sëmbë ta dini Jehovah a hii së u goonliba. Dee sëmbë aki da dee baaa ku dee sisa fuu. Unfa u musu libi ku de? Di Bëibel ta taki taa: „Ee u feni pasi u du wan sëmbë bunu nöö u musu du ën wante. Sö u musu libi  ku hii sëmbë e, ma möön gaanfa ku dee oto sëmbë dee ta biibi Masa kuma u seei” (Galasia 6:10; lesi Loomë 12:10). Apösutu Petuisi bi sikifi taa „un bi jei di tuutuu lei u Gadu kaa, nöö hën wë i si un ta piki ën” buka, te u kaba fëën hën „un ko ta lobi unu na unu söndö ganjan”. Petuisi bi piki dee Keesitu sëmbë söseei taa: „Ma di gaan soni, hën da un musu ta lobi unu na unu makandi gaanfa.”​—1 Petuisi 1:22; 4:8.

9, 10. Faandi mbei dee sëmbë u Gadu ta libi makandi ku de na de?

⁹ Di ölganisaasi fuu di dë a hii së u goonliba, dë wan apaiti wan seei. Faandi mbei? Wë u di u abi tuutuu lobi da dee baaa ku dee sisa fuu. Boiti di dë, u di u lobi Jehovah, söseei u di u ta hoi dee wëti fëën, mbei a ta heepi u ku di möön gaan kaakiti u hii di mundu. Di kaakiti aki da di santa jeje fëën. Di santa jeje u Gadu ta heepi u fuu libi makandi kuma tuutuu baaa ku sisa.​—Lesi 1 Johanisi 4:20, 21.

¹⁰ Paulosu bi taki faandi mbei a dë fanöudu taa Keesitu sëmbë musu lobi de na de. A bi sikifi taa: ’Un musu a’ tjalihati u otowan. Un musu libi ku ën ku bunuhati, ku saka fasi. Nöö un musu abi sapifasi ta mëni di otowan fii ta hoi pasensi dëën. Un musu a’ tifihedi da unu na unu e. Ee i ku sëmbë a’ soni, nöö ja musu hoi ën a bëë, leti kumafa Jehovah an ta hoi i a bëë. Nöö u hii dee libi aki tuu, nöö lobi hën da di mama u de e. Biga te un lobi unu na unu, nöö un sa libi makandi ku wan hati kumafa Gadu kë’ (Kolosën 3:12-14). U ta wai taa lobi ta mbei u ta „libi makandi ku wan hati” aluwasi un pei nasiön sëmbë u dë!

11. Na un soni i sa si di ölganisaasi u Gadu sabi?

¹¹ Di tuutuu lobi di dee dinima u Jehovah abi da de na de, söseei di libi di de ta libi makandi ku deseei, ta lei taa de abi di tuutuu biibi. Jesosi bi taki taa: „Biga te un ta lobi sö kaa, nöö hii sëmbë o si taa bakama u mi gbelin un dë e” (Johanisi 13:34, 35). Nöö apösutu Johanisi bi sikifi taa: „Nöö ee i kë sabi ambë da dee mii u Gadu ku  ambë da dee mii u didibi, nöö i luku a di libi u de nöö joo sabi. Biga di sëmbë di an ta libi bunu, nöö hën an sa dë mii u Gadu e. Söseei ee wan sëmbë ja ta lobi di otowan fii, nöö ja dë Masa Gadu mii tu. Wë biga di awoo buka di un bi ta jei a fesi te kisi tide, nöö hën da disi: u musu ta lobi di otowan fuu” (1 Johanisi 3:10, 11). Di lobi di u lobi dee baaa ku dee sisa fuu ku di libi di u ta libi makandi, ta lei taa Jehovah Kotoigi da dee tuutuu bakama u Keesitu, dee sëmbë di Gadu tei u paaja di bunu buka u di Könuköndë a hii së u goonliba.​—Mateosi 24:14.

12, 13. Andi dee „gaan hia sëmbë” ta du a di ten aki, nöö un bunu de o feni abiti möön?

¹² Gaansë u dee dinima u Jehovah a di ten aki da dee „gaan hia sëmbë” di kumutu a dee peipei köndë u goonliba, nöö de ta lei taa de tei di së u di Könuköndë. De da dee sëmbë dee „pasa di gaan hogi sitaafu [gaan fuka, NW] söndö bia baka disa Gadu. De wë da dee sëmbë di bi tei di paima di di Sikafumii bi paka da de, di a dëdë tuwëën buuu a goon. Hën wë mbei i si de ko dë limbolimbo faan sö.” Dee „gaan hia sëmbë” lobi Jehovah ku di Womi Mii fëën, nöö de ta dini Jehovah „ndeti ku didia.”​—Akoalimbo 7:9, 14, 15.

¹³ Abiti möön Gadu o poi di hogi goonliba aki a di ten u di „gaan fuka” (Mateosi 24:21; lesi Jelemia 25:32, 33). Ma Jehovah o tjubi dee dinima fëën, nöö a o tja de go a di njunjun goonliba u di a lobi de. Söwan 2000 jaa pasa Jehovah bi paamusi taa „a o feki hiniwan u de wojowata puu. Këë an o ta kisi de möön. Dëdë ku tjali ku kusumi an o dë a de dendu möön tu. Söseei sinkii hati an o dë möön seei”. I dë seei ta wakiti u libi a di Paladëisi ka hogidu, fuka ku pena ku dëdë an o dë möön u?​—Akoalimbo 21:4.

14. Un mëni dee gaan hia sëmbë ko dë nöunöu?

¹⁴ Di dee lasiti daka bigi a di jaa 1914, nöö söwan 5000 dinima u Gadu nöö bi dë a di ten dë. U di de bi lobi di wotowan u de, söseei u di di santa jeje u Gadu bi heepi de, mbei di piki kulupu u dee salufu baaa ku sisa bi sa paaja di bunu buka u di Könuköndë hii fa soni bi ta miti de. Andi bi pasa te u kaba fëën? A di ten aki Gadu bigi pii dee gaan hia sëmbë tja ko a wan di o libi u teego a goonliba aki. Söwan 8.000.000 Kotoigi dë a möön leki 115.400 kemeente dë a hii së u goonliba, nöö möönmöön de ta ko möön hia. Te i luku di diniwooko jaa 2014, nöö möön leki 275.500 Kotoigi tei dopu. Boo taa söwan 5300 sëmbë ta tei dopu hiniwan wiki.

15. Unfa sömëni sëmbë ta jei soni u di bunu buka a di ten aki?

¹⁵ A ta bigi da u seei u si fa hia sëmbë ta jei soni u di bunu buka u di Könuköndë. A di ten aki dee buku fuu dë u feni a möön leki 700 töngö. Di Hei Wakitimawosu da di buku di ta paati a hii së u goonliba möön dee woto buku. Hiniwan liba de ta doloki pasa 52.000.000, nöö de ta puu de ko a 247 töngö. Di buku Andi di Bëibel ta lei u tuutuu?, di u ta tei u lei sëmbë soni u Bëibel, bi puu ko a möön leki 250 töngö. De doloki möön leki 200.000.000 buku kaa.

16. Unfa a du ko taa di ölganisaasi u Jehovah ta göö daka fu daka?

¹⁶ Di ölganisaasi fuu ta göö daka fu daka, u di u abi biibi a Gadu, söseei u di u ta si di Bëibel kuma di Wöutu fëën (1 Tesalonika 2:13). Hii fa Saatan ta buuse u, ta du peipei soni ku u, tökuseei Jehovah ta mbei u ta feni gaan bunu.​—2 Kolenti 4:4.

17, 18. Unfa Jehovah kë fuu ta si dee sëmbë dee an ta dini ën?

¹⁷ Na hii sëmbë ta si di peleikiwooko fuu a di wan seei fasi. So sëmbë ta haika te u ta peleiki da de, ma wotowan ta buuse di wooko di u ta du. Unfa Jehovah kë fuu ta si dee sëmbë dee an ta dini ën? Aluwasi sëmbë ta haika nasö ee de an ta haika te u ta peleiki da de, ma u musu ta du di soni di Bëibel ta piki u taa u musu du. A piki u taa: „Te woon fan ku sëmbë, nöö un musu fan  a wan bunuhati fasi. Wan musu ta fan sösö soni, ma di fan fuunu musu abi goma. Nöö un musu sabi fa fuun ta piki dee sëmbë dee o ta hakisi unu soni, kumafa a fiti wan biibima” (Kolosën 4:6). Te u ta konda soni u di biibi fuu, nöö u musu du ën „ku saapi fasi, ku lesipeki”, u di u lobi di wotowan fuu.​—1 Petuisi 3:15.

¹⁸ Ee sëmbë an kë haika u, u di hati u de ta boonu ku u, tökuseei u musu lei taa u lobi di wotowan fuu, nöö a sö wan fasi u ta djeesi Jesosi. Di dee „sëmbë bi ta kosi” Jesosi „ta dëën gaan buka ku gaan sen dë, nöö an jabi buka kosi de möönsö e. Di de du hogihogi ku ën, an bë wojo da de möönsö tu”. Ma Jesosi bi buta hii ën futoou a Jehovah (1 Petuisi 2:23). Fëën mbei u musu abi sakafasi hii juu, nöö u du di soni di Bëibel taki. A taki taa: „Ee wan sëmbë du hogi ku i, ja musu du hogi ku ën baka e. Ee wan sëmbë kosi i, disëën. Na toona kosi ën baka, ma begi Gadu dëën be a feni bunu.”​—1 Petuisi 3:8, 9.

19. Unfa u musu libi ku dee felantima fuu?

¹⁹ Ee u abi sakafasi, nöö a o heepi u fuu hoi wan fanöudu mama wëti di Jesosi bi da u. Jesosi bi taki taa: „Un bi jei de bi taki taa i musu lobi di sëmbë di ta libi bunu ku i, ma di felantima fii i sa buuse ën. Ma nöö mii taki da unu taa un musu lobi dee felantima fuunu e. Un musu ta begi da dee sëmbë dee ta du hogi ku unu. Nöö te un du sö kaa, nöö woon djeesi unu Tata a liba kuma miii fëën gbelingbelin. Wë biga fa a sai dë, nöö te di sonu fëën ta jabi, nöö a ta jabi da dee bunu sëmbë ku dee hogi wan tuu. Te tjuba fëën ta kai, a ta kai te dou a hii sëmbë, dee ta libi bunu nëën wojo ku dee an ta libi bunu nëën wojo tuu” (Mateosi 5:43-45). U kuma dee dinima u Gadu musu lobi dee felantima fuu, aluwasi andi de ta du ku u.

20. Unfa u du sabi taa sëmbë o lobi Gadu ku di wotowan fëën a hii së u goonliba? (Luku di peentje a bigi u di woto.)

²⁰ Hii juu u musu ta lei taa u lobi Jehovah ku di wotowan fuu. Aluwasi sëmbë ta du ku u, nasö ee de an kë haika di bunu buka, tökuseei u ta heepi de te de dë ku fuka. Apösutu Paulosu bi sikifi taa: „Wan musu abi oto paima a unu liba fuun paka möönsö, boiti di paima di un abi kaa taa un musu ta lobi unu seei makandi. Biga di sëmbë di ta lobi di otowan fëën, nöö hën ta hoi hii dee wëti u Gadu tuu. Biga dee soni dee i si Gadu taki naandë sö, kuma ja musu waka ku wan mujëë di na mujëë fii u wosu, ja musu kii sëmbë, ja musu fufuu, ja musu haun, ku hii dee oto wëti tuu dee Gadu buta da u, nöö a di wan kodo wöutu aki nöö de tuu nama taa i musu lobi di otowan fii kumafa i lobi i seei. Biga di sëmbë di lobi di otowan fëën kaa, nöö an o du hogi ku ën e. I si? Fëën mbei baa lobi hën wanwan tö sa mbei i ta hoi hii dee wëti u Gadu tuu ku telu” (Loomë 13:8-10). Dee sëmbë u di hogi goonliba u Saatan aki an ta libi makandi ku deseei, ma tökuseei dee dinima u Gadu ta lei taa de lobi di wotowan u de tuutuu (1 Johanisi 5:19). Baka te Jehovah o kii Saatan ku dee taku jeje fëën, söseei te a o poi di hogi goonliba aki, nöö hii sëmbë u goonliba o lobi de na de. A o dë wan gaan bunu ten seei te hii sëmbë di o dë a goonliba o lobi Jehovah ku di wotowan fëën!