Ufö u piki dee hakisi aki, boo taki u wan soni di sa da u kötöhati: Gadu ta si di pena di sëmbë ta pena wotowan a goonliba a di ten aki, nöö a o du wan soni u heepi de (Psalöm 72:13, 14). A di Wöutu fëën, di Bëibel, Gadu paamusi taa dee sëmbë dee wotowan ta pena, ’a o da böö u dee fuka i si de ta tja naandë’. Na un ten a o du di soni dë? „Te Gadu mbei Masa Jesosi tja di kaakiti fëën ko a limbo. Biga di juu dë, a o kumutu a liba ala ta bazia ta ko, hën ku dee hebi basia fëën köndë. . . . , faa sitaafu dee sëmbë dee an sabi Gadu, dee an bi kë piki di Bunu Buka fuu Masa Jesosi Keesitu möönsö” (2 Tesalonika 1:7, 8). A di ten di ta ko, Jesosi o tja di kaakiti fëën ko a limbo a „di gaan feti a di Daka di di Gadu di abi hii makiti u mundu buta”. Di feti dë seei di Bëibel ta kai Amagedon.​—Akoalimbo 16:14, 16.

A di feti di ta ko, na libisëmbë Gadu o tei u feti, ma a o tei di Womi Mii fëën, Jesosi Keesitu, ku woto ëngëli di abi makiti, u de feti ku dee hogihati sëmbë. Dee makiti ëngëli aki o puu di pena di sëmbë ta pena wotowan a goonliba.​—Jesaaja 11:4; Akoalimbo 19:11-16.

Te kuma tide, di fasi fa Gadu ta si feti an tooka. A ta si feti kuma wan fasi u puu hogidu a goonliba, ku di pena di sëmbë ta pena wotowan. Ma kumafa a bi dë a di ten di pasa, sö nöö a dë taa Gadu wanwan abi di leti u taki na un ten wan feti bi musu feti, söseei ambë ku ambë bi musu feti. U bi si taa Gadu buta wan daka kaa taa a o feti u puu di hogi di sëmbë ta du a goonliba,  nöö a o hopo feti da dee sëmbë di wotowan ta pena. Di Womi Mii fëën, Jesosi Keesitu da di sëmbë di a buta u feti di feti. Di soni aki kë taki taa na wan u dee feti di sëmbë ta feti a di ten aki da feti di Gadu feni bunu, aluwasi sëmbë ta feti u di de kë u soni go bunu.

Luku wan woto aki. Boo taa tu baaa ta feti ku deseei a wan ten di de tata an dë a wosu. Te wan pisi, de disa di feti, hën de bëli de tata. Wan u dee baaa piki di tata taa di wotowan hën bigi ku di feti, ma di wotowan piki di tata taa di wotowan bi ta du hogihogi ku ën. Hiniwan u de taki dee soni aki u di de kë u de tata tei di u de së. Ma di di tata haika de te a kaba, hën a piki de taa de an musu feti möön. A piki de tu taa te a ko a wosu, nöö a o koti di taki. Hën dee tu baaa dë ta wakiti di tata. Ma an tei longi seei, hën de bigi ta feti baka. Di di tata ko dou, hën hati fëën boonu ku hii de tuu, hën a sitaafu hii de tuu, u di na wan u de bi piki hën buka.

A di ten aki, sömëni sëmbë u dee köndë dee nango a feti lo’ u begi Gadu faa heepi de. Ma Gadu an ta tei na wan sëmbë së a dee feti dee ta pasa a di ten aki. Ma a piki u gbelingbelin a di Wöutu fëën, di Bëibel, taa: „Ee wan sëmbë du hogi ku i, nöö ja musu toona du hogi ku ën baka”. Söseei a ta piki u taa: „Wan musu paka hogi ku hogi baka” (Loomë 12:17, 19). Boiti di dë, a lei libisëmbë taa de musu „wakiti” ku pasensi u te di juu dou faa feti na Amagedon (Psalöm 37:7). Te dee köndë nango ta feti ku deseei u di de an kë wakiti Gadu, nöö Gadu an ta feni dee feti dë bunu. De ta du wan soni di de an abi leti u du. Te Amagedon dou, nöö Gadu o puu di hatiboonu fëën a dee hogihati sëmbë liba, nöö a o „mbei feti kaba a goonliba palalaa te dou” (Psalöm 46:9; Jesaaja 34:2). Awa, Amagedon o dë di feti di o puu hii feti a goonliba.

Di kaba di feti o kaba, da wan u dee sömëni gaan bunu di di Könuköndë u Gadu o tja ko a goonliba. Jesosi bi konda soni u di tii dë a di nëbai begi fëën. A bi taki taa: „Di Tii fii musu paaja a hii goonliba, be di fii kë pasa a goonliba aki leti kumafa a ta pasa a i a liba ala” (Mateosi 6:10). Na puu nöö di Könuköndë u Gadu o puu hii feti a goonliba, ma a o puu di soni di ta tja feti ko tu, hën da hogidu. * (Psalöm 37:9, 10, 14, 15). Fëën mbei an ta foondo u taa dee bakama u Jesosi ta wai seei u si dee gaan bunu di di Könuköndë u Gadu o tja ko.​—2 Petuisi 3:13.

Ma nöö un longi u musu wakiti u di Könuköndë u Gadu puu hogidu, ku di pena di sëmbë ta pena wotowan a goonliba? Dee tjabukama woto u Bëibel dee ta pasa tuutuu ta lei taa u ta libi a „dee lasiti daka u di goonliba aki” (2 Timoteo 3:1-5). * Abiti möön, dee lasiti daka aki o kaba te di Könuköndë u Gadu o tja di feti u Amagedon ko.

U bi si a di woto aki taa dee sëmbë dee o dëdë a di lasiti feti aki, o dë dee sëmbë dee an „kë piki di Bunu Buka fuu Masa Jesosi Keesitu möönsö” (2 Tesalonika 1:8). Ma hoi a pakisei taa Gadu an ta wai te sëmbë ta dëdë, aluwasi di sëmbë dë da wan hogihati sëmbë (Ezekiëli 33:11). U di Gadu an kë u „na wan kodo sëmbë musu lasi kaba a sösö” a di lasiti feti dë, mbei a si taa a dë fanöudu u paaja di bunu buka fuu Masa Jesosi „be hii föluku musu jei” ufö di kaba dou (2 Petuisi 3:8, 9; Mateosi 24:14; 1 Timoteo 2:3, 4). Awa, di peleiki di dee Jehovah Kotoigi ta peleiki a hii së u goonliba ta heepi sëmbë a di ten aki u feni di okasi u ko sabi soni u Gadu, söseei u de libi a wan fasi di ta kai ku di bunu buka u Jesosi, sö taa de sa libi a di ten ka na wan feti o dë a goonliba möön.