1. Unfa Jesosi bi ta si di konda di a bi ta konda soni u di Könuköndë?

JESOSI bi lo’ u konda soni u di Könuköndë u Gadu. Di Jesosi bi dë a goonliba a bi ta konda soni u di Könuköndë möön gaanfa. A bi taki soni u di Könuköndë möön leki 100 pasi di a bi ta peleiki. Di Könuköndë bi dë wan fanöudu soni da Jesosi seei.​—Lesi Mateosi 12:34.

2. Un mëni sëmbë bi sai dë jei di soni di Jesosi bi taki a Mateosi 28:19, 20, nöö faandi mbei u taki sö?

² Kölö sö di Jesosi weki kumutu a dëdë, hën a miti möön leki 500 sëmbë di bi dë bakama fëën (1 Kolenti 15:6). A kan taa a di seei ten dë Jesosi bi piki de taa „un musu ta waka a dee köndëköndë u goonliba ta paaja di buka u mi da hii sëmbë”. Di wooko aki bi o dë wan taanga wooko seei. * (Luku di pisi a basu.) A bi piki de taa de  bi o ta du di peleikiwooko „u tee a kaba u di goonliba aki”. Te i ta paaja di bunu buka a di ten aki, nöö i ta heepi u mbei di tjabukama woto aki pasa tuu.​—Mateosi 28:19, 20.

3. Andi da dee dii soni dee heepi u fuu paaja di bunu buka?

³ Baka di Jesosi bi piki de taa de musu go peleiki, hën a bi taki taa: „Mi o dë ku unu” (Mateosi 28:20). Sö wë Jesosi bi paamusi dee bakama fëën taa a bi o ta tii di peleikiwooko, söseei taa a bi o heepi de u de sa peleiki a hii di goonliba. Jehovah seei dë ku u tu. A da u ’hii dee soni u abi fanöudu’ u heepi u u du di peleikiwooko (Hebelejën 13:20, 21). A di woto aki woo luku dii soni di a da u. Dee soni aki da: (1) dee soni dee u peleiki ku de u paaja di bunu buka, (2) dee fasi fa u du di peleikiwooko, ku (3) dee lei dee u kisi. Di fosu soni di woo go luku, da dee soni dee u bi peleiki ku de a dee 100 jaa dee pasa dë.

4. Unfa dee peipei soni dee u peleiki ku de, bi heepi u fuu du di peleikiwooko?

⁴ Jesosi bi tei di Könuköndë bosikopu maaka ku soni sii di de paandi a peipei goondoti (Mateosi 13:18, 19). Te wan sëmbë ta paandi wan goon, nöö a ta tei peipei soni u wooko di goon ufö a sa bigi paandi soni nëën. A di wan seei fasi di Könu fuu da u peipei soni di u sa peleiki ku de u heepi sëmbë u haika di bunu buka. U bi peleiki ku so u dee soni aki u wan pisiten nöö, ma u ta peleiki ku so u de jeti. Hii dee soni aki heepi u fuu ko sa u peleiki möön bunu.

5. Andi da wan kotoigi kaita, nöö unfa u bi ta peleiki ku ën?

⁵ A di jaa 1933 dee peleikima bi ta peleiki ku di kotoigi kaita, nöö di kaita aki bi heepi sömëni u de u bigi peleiki. A bi dë wan piki kaita, ka de bi sikifi wan sati bosikopu u Bëibel di an bi taanga u fusutan. So juu de bi ta mbei woto kaita ka de bi ta sikifi wan woto bosikopu. Baaa Erlenmeyer bi abi teni jaa di a bi peleiki ku di kotoigi kaita di fosu pasi. A bi taki taa: „Di soni di u bi lo’ u taki te u bi miti wan sëmbë da: ’Gaantangi, i bi o kë lesi di kaita aki ö?’ Baka di dë di sëmbë bi ta lesi di kaita, nöö u bi ta dëën wan buku, nöö u waka go fuu.”

6. Unfa di kotoigi kaita bi heepi dee peleikima?

⁶ Di kotoigi kaita bi heepi dee peleikima a peipei fasi. So u dee peleikima bi ta sen, nöö hii fa de bi ta kë peleiki seei, de an bi saandi de bi musu taki. Ma woto peleikima bi abi degihati seei. A wantu miniti dendu nöö de bi ta konda hii soni di de bi sabi da di sëmbë di de go peleiki da, nöö so juu de an bi ta taki soni a wan fasi di fiti. Di kotoigi kaita bi heepi hii dee peleikima u peleiki a wan fasi di hii sëmbë bi sa fusutan.

7. Unfa soni bi waka da dee peleikima di de bi ta peleiki ku di kotoigi kaita?

⁷ Ma na hii juu soni bi ta waka bunu. Wan sisa de kai Grace Estep bi taki taa: „So juu dee sëmbë dee u bi ta peleiki da bi ta hakisi u taa: ’Wë, andi sikifi a di kaita? Ja sa konda da mi andi sikifi a di kaita nö?’” So u dee sëmbë de bi ta peleiki da, an bi sa lesi di soni di bi sikifi a di kaita. Wotowan bi ta tei di kaita, nöö de tapa di döö u de. So sëmbë an bi lobi di bosikopu di u bi ta paaja, nöö de bi ta tënë di kaita pisipisi. Hii fa dee soni aki bi ta miti de, tökuseei di kotoigi kaita bi heepi dee peleiki u peleiki da sëmbë, nöö sëmbë bi sabi de kuma dee peleikima u di Könuköndë.

8. Unfa de bi ta peleiki ku di gramofon? (Luku di peentje a bigi u di woto.)

⁸ Wan woto soni di de bi peleiki ku ën baka di jaa 1930, da di gramofon di i bi sa ta tja a maun. So u dee Kotoigi bi ta kai ën Alon, biga di gramofon aki hën bi ta fan, ka u de bi fan.  (Lesi Ëkisodesi 4:14-16.) Ee di sëmbë di de bi ta peleiki da bi kë haika, nöö di peleikima bi ta pëë wan sati Bëibel taki dëën, nöö a bi ta dëën wantu buku tu. So juu wan hii wosudendu bi ta ko sindo haika wan taki! A di jaa 1934 di Watch Tower Society bi bigi mbei wan gramofon di i bi sa ta tja a maun a di peleikiwooko. Te u kaba fëën dee baaa bi hai 92 taki tei.

9. Unfa di gramofon bi heepi sëmbë u ko sabi di tuutuu lei?

⁹ Di wan womi de kai Hillary Goslin jei wan u dee taki aki di fosu pasi, hën a leni wan gramofon u wan wiki u paaja di bunu buka da dee sëmbë dee bi ta libi a di pisiwata ka a ta libi. Di soni aki bi mbei sömëni sëmbë haika di tuutuu lei, hën de tei dopu. Te u kaba fëën tu mujëë mii u Baaa Goslin go a di Giliati-siköö, hën de ko toon sëndëlengi. Leti kumafa di kotoigi kaita bi ta heepi sömëni peleikima u bigi peleiki, sö nöö di gramofon bi heepi de tu. Bakaten di Könu bi o seti di Teokalasia-siköö u lei dee sëmbë fëën u de ko dë möön bunu leima.

10, 11. Unfa de bi peleiki ku kolanti, söseei ku ladio u paaja di bunu buka, nöö faandi mbei dee fasi u peleiki aki bi bunu?

¹⁰ Dee sëmbë u Gadu di dë a di tii u Jesosi basu, bi ta du di peleikiwooko a peipei fasi u de bi sa peleiki da hiniwan sëmbë. Dee fasi u peleiki aki bi dë fanöudu seei, möönmöön fa wa bi abi hia wookoma. (Lesi Mateosi 9:37.) Wan u dee fasi aki da di peleiki di de bi ta peleiki ku kolanti sömëni jaa pasa. Hiniwan wiki Baaa Russell bi ta manda wan Bëibel taki go a wan kamian ka de ta buta soni a kolanti. Nöö de bi ta manda di taki aki go a dee kolanti u Kanada, Europa, ku Amëëkanköndë. A di jaa 1913 dee taki u Baaa Russell bi dë u feni a 2000 kolanti, nöö söwan 15.000.000 sëmbë bi ta lesi de!

¹¹ Di ladio seei bi dë wan u dee bunu soni di de bi ta tei u paaja di bunu buka. A 16 u piki-deewei-liba u di jaa 1922, Baaa Rutherford bi hoi wan u dee fosu taki fëën a ladio, nöö söwan 50.000 sëmbë bi haika ën. An bi tei longi möön hën u bi bigi ta wooko ku di fuu seei ladio stasiön de kai WBBR, nöö di fosu taki bi dë u jei a 24 u bakajailiba u di jaa 1924. The Watch Tower u 1 u tuwalufumu-liba u di jaa 1924 bi taki taa: „U ta biibi taa di ladio da di möön bukopu fasi ku di möön bunu fasi u paaja di bunu buka.” Leti kumafa di kolanti bi heepi u fuu paaja di bunu buka da sömëni sëmbë, sö nöö di ladio seei bi heepi u fuu paaja di bunu buka a dee kamian ka hia peleikima an bi dë.

12. (a) Undi u dee kamian ka hia sëmbë ta waka pasa i möön lo’ u peleiki? (b) Andi sa heepi u fu wa ta fëëë möön u peleiki a kamian ka hia sëmbë ta waka pasa?

¹² Di peleiki di u ta peleiki a kamian ka hia sëmbë ta waka pasa, da wan bunu fasi u paaja di bunu buka da sëmbë a di ten aki. U ta mbei möön möiti u peleiki da sëmbë a dee kamian ka de ta tei besi, talan wagi, ku kamian ka de ta buta wagi, söseei a kamian ka sëmbë lo’ u go hia, nasö a dee wojowojo. I ta senuwe te i ta peleiki a kamian ka hia sëmbë ta waka pasa u? Ee sö, nöö hakisi Jehovah faa heepi i. Luku andi Baaa Manera wan keling-gaanwomi bi taki. A bi taki taa: „U ta si hiniwan njunjun fasi u peleiki kuma wan njunjun fasi u dini Jehovah, söseei wan njunjun fasi u lei taa u ta hoi useei a Gadu hii juu. Nöö u ta dë kabakaba u lei ën taa u kë dini ën a hiniwan fasi di a kë fuu dini ën tu.” Te wa ta fëëë möön, söseei te u ta peleiki a dee njunjun fasi aki, nöö woo ko abi möön futoou a Jehovah, söseei woo ko dë möön bunu peleikima tu.​—Lesi 2 Kolenti 12:9, 10.

13. Faandi mbei di peleiki di u ta peleiki ku di website fuu, da wan bunu fasi u du di peleikiwooko? Konda unfa soni bi waka di i bi peleiki ku di website fuu.

 ¹³ Sömëni peleikima lo’ u konda soni u di website fuu, jw.org da sëmbë. A di website aki de sa lesi nasö download buku a möön leki 700 töngö. Hiniwan daka, a ta pasa 1.600.000 sëmbë di nango luku soni a di website fuu. A di ten di pasa, di ladio bi heepi u fuu peleiki a dee longi kamian. Di wan seei soni di website fuu ta du a di ten aki tu.

14. Un lei dee peleikima bi abi fanöudu, nöö un siköö bi heepi de u de ko dë möön bunu leima?

¹⁴ U bi taki u dee soni dee u ta peleiki ku de, ku dee fasi fa u ta peleiki, nöö u bi si taa de bi heepi seei. Tökuseei dee peleikima u di ten dë bi musu kisi lei u ko sabi unfa de sa du di diniwooko. Biga so juu dee taki dee de bi ta pëë a di gramofon an bi ta kai ku di sëmbë di de bi ta peleiki da. Ma so juu sëmbë bi ta haika, nöö de bi ta kë sabi möön soni. Fëën mbei dee peleikima bi musu sabi andi de musu du te wan sëmbë an bi kë haika, söseei unfa de sa ko dë wan möön bunu leima. Wë di santa jeje u Gadu bi heepi Baaa Knorr faa si taa a dë fanöudu u lei dee peleikima unfa de musu fan ku sëmbë a di peleikiwooko. Fëën mbei a di jaa 1943, hën dee kemeente bigi ta hoi di Teokalasia-siköö. Di siköö aki bi heepi hii dee peleikima u ko dë möön bunu leima.

15. (a) Andi bi miti so u dee baaa fuu di de hoi di fosu taki u de a di Teokalasia-siköö? (b) Unfa di soni di Jehovah paamusi u a Psalöm 32:8 bi heepi i?

¹⁵ Sömëni u dee baaa an bi abi di guwenti u fan a hia sëmbë fesi. Baaa Ramu ta mëni jeti di a bi hoi di fosu taki fëën a di jaa 1944. Di taki fëën bi nama ku di womi a Bëibel de kai Dowëki. A bi taki taa: „Hii mi sinkii bi ta tëëmë tjatjatjatja. Ma bi sa taanpu piii. Mi maun ku mi buka tuu, bi ta tëëmë.” A bi taki söseei taa: „Di soni aki hën bi miti mi di fosu pasi di mi go a  wan podium liba, ma ma bi disa.” Hii fa a bi dë wan taanga soni, tökuseei dee mii seei bi ta hoi taki a di siköö. Baaa Manera ta mëni jeti andi bi pasa di wan piki womi mii bi hoi di fosu taki fëën. A bi taki taa: „A bi ta senuwe tee taa di a bigi hoi di taki, hën a bigi ta këë. Ma tökuseei an bi kë disa tefa a hoi hii di taki këëkëë.” Kandë ja ta da piki a komakandi u di i ta sen, nasö u di i ta si kuma ja sa du ën. Ee di soni aki hën ta miti i, nöö hakisi Jehovah faa heepi i be ja ta fëëë sö möön. A o heepi i kumafa a bi heepi dee baaa ku dee sisa dee bi dë a di Teokalasia-siköö a di ten di pasa.​—Lesi Psalöm 32:8.

16. Andi bi dë di maaka u di Giliati-siköö (a) a di ten di pasa (b) sensi di jaa 2011?

¹⁶ Di ölganisaasi u Gadu bi lei sëmbë soni a di Giliati-siköö. Wan u dee maaka u di siköö aki da u heepi dee baaa ku dee sisa u ko möön lobi u paaja di bunu buka. Di Giliati-siköö bi bigi a di jaa 1943, nöö sensi di ten dë de lei 8500 baaa ku sisa, hën de manda de go a 170 köndë. Sensi di jaa 2011, de bigi ta kai dee apaiti pionili, dee keling-gaanwomi ku dee mujëë u de, söseei dee sëmbë dee ta wooko a Bëtëli, ku dee sëndëlengi dee an go a di Giliati-siköö jeti, u go a di siköö aki.

17. Unfa di Giliati-siköö bi heepi tjika?

¹⁷ Di Giliati siköö bi heepi ö? Wë aai. Luku andi bi pasa a di köndë Japan. A tanvuuwata-liba u di jaa 1949, an bi dou teni peleikima di bi dë a di köndë Japan. Ma a kaba u di jaa dë 13 sëndëlengi bi ta peleiki makandi ku dee peleikima u di köndë seei. Nöunöu söwan 216.000 peleikima dë a di köndë Japan, nöö a fika piki möön nöö hafu u de ta du di pioniliwooko!

18. Un woto siköö dë jeti?

¹⁸ U abi sömëni woto siköö jeti. Dee siköö aki da siköö kuma di Könuköndë Diniwooko-siköö, di Pionili-siköö, di siköö da Könuköndë peleikima, di siköö da dee keling-gaanwomi ku dee mujëë u de, ku di siköö da dee baaa u di Bëikantoo Komite ku dee mujëë u de. Dee siköö aki bi heepi dee baaa ku dee sisa seei, nöö de bi taanga di biibi u de tu. A dë gbelingbelin u si taa Jesosi ta lei sömëni sëmbë te kuma tide jeti.

19. Andi Baaa Russell bi taki u di peleikiwooko, nöö unfa di soni dë pasa tuu?

¹⁹ Di Könuköndë u Gadu ta tii möön leki 100 jaa kaa. Sensi di ten dë di Könu fuu Jesosi Keesitu, bi ta tii di peleikiwooko kaa. A di jaa 1916 Baaa Russell bi abi di biibi taa di bunu buka bi o paaja te dou hii di goonliba. A bi taki taa: „Di wooko nango a fesi seei, nöö möönmöön a o nango a fesi tu. U di a hii di goonliba di ’bunu buka u di Könuköndë’ musu paaja.” (Faith on the March, di A. H. Macmillan sikifi, bladsëidë 69) Di wooko aki u ta du a di ten aki! U ta da Jehovah, di Gadu ka hii kötöhati ta kumutu tangi, u di a da u hii dee soni u abi fanöudu fuu libi kumafa a kë!