Na tide jaa de ta hoi Bëdaki kuma wan piizii daka, di sëmbë ta si kuma di daka di de pai Jesosi. Sömëni u dee soni dee sëmbë ta du te de ta hoi Bëdaki, ta mbei u ta hakisi useei ee unfa dee soni aki nama ku di pai di de pai Jesosi.

Wan u dee soni, hën da di kontu woto u di tata de ta kai Kerstman. A di ten aki sëmbë sabi ën kuma wan womi di lo’ u lafu, nöö a abi wan weti bia faan sö, nöö a ta bisi bë. A di jaa 1931 sëmbë bigi tei di Kerstman u mbei popokanda da wan masikapei di ta mbei söfu. A di jaa 1950 so sëmbë di ta libi a Balaziliköndë bi pooba u mbei wan woto Kerstman, nöö de bi tei wan womi u di köndë dë di de bi ta kai Taata Ingi. Unfa soni bi waka? Wë, sëmbë bi lobi di Kerstman möön Taata Ingi. Wan sabima de kai Carlos E. Fantinati taki söseei taa: „Sëmbë bi lobi di Kerstman gaanfa möön di mii Jesosi. Nöö di kerstman bi ko dë di womi di sëmbë ta möön mëni a 25 u tuwalufumu-liba.” Ma dee kontu dee nama ku di kerstman hën da di wan kodo soni di na bunu a Bëdaki ö? Wë ee u kë feni di piki, nöö boo go luku di ten u dee Keesitu sëmbë u fesiten.

Wan buku taki taa: „A dee tu höndö jaa di di Keesitu biibi bi seti, nöö te de bi kii wan sëmbë u di biibi fëën hedi, dee Keesitu sëmbë an bi ta mëni di daka di de pai di sëmbë dë. Fëën mbei di daka di de pai Jesosi seei de an bi kë hoi tu” (Encyclopedia Britannica). Faandi mbei? Dee Keesitu sëmbë bi ta si di daka di de pai wan sëmbë, kuma wan daka di dee sëmbë di an ta dini di tuutuu Gadu guwenti u hoi. Nöö de bi ta si ën kuma wan soni di ja musu du seepiseepi. Wë a di Bëibel seei de an sikifi di daka di de pai Jesosi.

Hii fa dee Keesitu sëmbë an bi kë mëni di daka di de pai wan sëmbë, tökuseei di Lomusu keiki bi taki taa sëmbë sa hoi Bëdaki. Di Lomusu keiki bi kë taa möön hia sëmbë ko a di keiki u de, fëën mbei de bi puu dee möön gaan soni di bi o sa tapa sëmbë u ko a di keiki u de. Dee soni aki bi dë dee biibi u dee Loomë sëmbë di an bi ta dini Gadu, ku di fesa di de bi ta hoi a di kötö pisiten u di jaa. Hiniwan u 17 u tuwalufumu-liba te go miti 1 u jailiba „gaansë u dee Loomë sëmbë bi ta hoi fesa, de bi ta pëë peipei pëë, de bi ta libi fanjanfanjan, ta bebe ta piizii, de bi ta lontu köndë, söseei de bi ta dini dee pindi gadu u de”. Sö wan buku de kai Christmas in America, di Penne L. Restad sikifi, ta taki. Nöö a 25 u tuwalufumu-liba dee Loomë sëmbë bi ta hoi di fujai daka u di sonu di de ta taki taa abi gaan kaakiti. U di di keiki bi ta hoi Bëdaki a di daka dë, mbei de bi sa ganjan dee Loomë sëmbë u mëni di daka di de pai Jesosi ka u de mëni di fujai daka u di sonu. Gerry Bowler bi taki a wan buku taa, a sö wan fasi dee Loomë sëmbë „bi sa ta hoi di fesa u de jeti a di kötö pisiten u di jaa” (Santa Claus, a Biography). Te u luku ën bunu, nöö de bi bigi „ta hoi dee njunjun piizii daka, hii fa de bi ta hoi dee awoo guwenti u de jeti”.

Di soni mbei so sëmbë an ta hoi Bëdaki, hën da u di de sabi taa an nama ku bumbuu soni. Stephen Nissenbaum sikifi a wan buku fëën de kai The Battle for Christmas taa: „Bëdaki da wan piizii daka di sëmbë di an ta dini Gadu ta hoi, ma de ta mökisi ën ku di Keesitu biibi.” Ma Bëdaki an ta gafa Jehovah ku di Womi Mii fëën Jesosi Keesitu. U musu si di soni aki kuma wan piki soni ö? Di Bëibel ta taki taa: „Biga wan sëmbë di ta libi bunu a Gadu wojo ku wan sëmbë di an ta libi bunu a Gadu wojo, unfa de o sa fii ku deseei? Luku fa dungu ku limbo sai dë, de an sa mökisi möönsö. Goonliba an mbei sö” (2 Kolenti 6:14). Kuma wan pau di göö bendibendi, sö nöö Bëdaki dë bendibendi, u te de an sa butëën ko „tololo möön”.—Peleikima 1:15.