Pakisei taa i go köi a wan köndë di ja bi sabi jeti. I ta miti sëmbë di ja sabi, de abi guwenti di ja sabi, de ta njan soni di ja guwenti u njan, de ta wooko ku wan möni di ja sabi. Wë kandë ja bi o fii bunu.

Di wan seei fasi i sa fii te i lesi di Bëibel fosu pasi. Te i ta lesi ën, nöö a ta dë kuma i go a wan awooten goonliba, ka i ta si soni di ja guwenti. Nöö ala i ta miti wanlö sëmbë de ta kai Filisiti sëmbë, i ta lesi u sëmbë di ta ’tënë dee koosu a de sinkii zaaa’ nasö u wan soni di sëmbë bi ta njan de ta kai mana, söseei i ta lesi u wan pei möni de ta kai talënti. (Ëkisodesi 16:31; Josua 13:2; 2 Samuëli 3:31; Mateosi 18:24) Hii dee soni aki sa buuja i. Ee i bi go a wan woto köndë go köi ka ja go wan daka, ja bi o wai ee wan sëmbë di sabi soni u di köndë dë ko heepi i ö?

Sensi di fosu pasi di de sikifi di buku u Gadu aki a di jaa 1513 Bi.K., sëmbë bi dë u heepi wotowan u fusutan dee soni dee sikifi nëën. Mosesi, di bi dë di fosu sëmbë di bi ta tei fesi da dee Isaëli sëmbë, bi „mbei de ko fusutan” dee soni dee bi dë sikifisikifi a di buku u Gadu.—Detolonomi 1:5.

Söwan 1000 jaa baka di dë, sëmbë bi dë jeti di bi sabi soni u Bëibel tjika u sa lei dee woto sëmbë. A di jaa 455 Bi.K., gaan hia Dju bi ta ko makandi a wan kamian a Jelusalen ka sëmbë bi lo’ u miti, te kisi dee mii seei. Sëmbë di bi ta lei sëmbë soni u Bëibel bi ta sai dë u „lesi di [wan seei santa] buku” be hii sëmbë jei. Ma na di soni dë nöö de bi ta du. „De bi ta heepi dee sëmbë u de ko fusutan dee soni de bi ta lesi.”—Nehemia 8: 1-8.

Feifi höndö jaa baka di dë, Jesosi Keesitu seei bi ko ta lei sëmbë soni u Bëibel tu. Sëmbë bi möön sabi Jesosi kuma wan mësitë di bi ta lei sëmbë soni (Johanisi 13:13). A bi ta lei gaan hia sëmbë soni makandi nasö a bi ta lei de soni apaiti. Wan daka a bi fan ku gaan hia sëmbë di a bi hoi di nëbai taki a di kuun liba, nöö „hii sëmbë tuu foondo gaanfa seei” (Mateösi 5:1, 2; 7:28). A di jaa 33, Jesosi bi fan ku tu u dee bakama fëën di de bi dë a pasi nango a wan köndë di dë zuntu ku Jelusalen. ’A bi ta fan ku de a di pasi ta puu Gadu Buku da de’.—Lukasi 24:13-15, 27, 32.

Dee bakama u Jesosi seei bi ta lei sëmbë soni a di Wöutu u Gadu. Wan daka wan heiheima u di köndë de kai Etiopia bi ta lesi wan pisi a di Wöutu u Gadu. Wan bakama u Jesosi bi ko hakisi ën taa: „Mati o, dee soni i ta lesi dë, i ta fusutan de nö?” Hën a taa: „Wë nönö mati, unfa mi sa du fusutan de? Biga ma a’ sëmbë u puu de da mi.” Hën Filipi puu da di womi andi hii dee soni de kë taki.—Tjabukama 8: 27-35.

Leti kumafa sëmbë bi ta lei sëmbë soni u Bëibel a di ten di pasa, sö nöö dee Jehovah Kotoigi ta lei sëmbë soni u Bëibel a di ten aki a 239 köndë a hii së u goonliba (Mateosi 28:19, 20). Hiniwan wiki de ta heepi möön leki nëigi milion sëmbë u ko fusutan dee soni dee sikifi a di Bëibel. Gaansë u dee sëmbë dë an bi ta biibi a Keesitu. Jehovah Kotoigi an ta mbei sëmbë paka de te de ta lei sëmbë soni u Bëibel, söseei de nango a sëmbë pisi u lei de soni nasö a wan kamian di bunu da di sëmbë. De ta bia fëlön u lei sëmbë soni u Bëibel ku tëlëfön nasö de ta wooko ku computer nasö tablet u lei sëmbë soni u Bëibel.

Ee i kë u wan Jehovah Kotoigi ko a i u ko lei i soni u Bëibel, nöö mbei möiti u miti wan u de. Joo ko si taa di Bëibel an dë wan buku di taanga u fusutan, ma a dë wan buku di „sa heepi i fii sabi di lei u Gadu di dë tuutuu. A sa heepi i tu, fu te ja ta libi bunu nöö a leti i buta a pasi. A sa bai i seei fii disa hogilibi.” Nöö a sö wan fasi joo „sa du hiniwan bumbuu wooko di Gadu buta da i fii du.”—2 Timoteo 3:16, 17.