Bijbel no e horibaka gi a hori di sma e hori Pasen. Te yu luku pe a fesa disi komoto, dan yu o frustan san Pasen wani taki trutru. Na wan gwenti di abi fu nanga den gado di sma ben anbegi fu kisi furu pikin noso nyanyan na ini owruten. Poti prakseri na den sani di e kon now.

1.   Nen: A buku Encyclopædia Britannica e taki: „Sma no sabi soifri pe na Ingrisi nen gi Pasen komoto. Na Anglo-Saxon priester, Venerable Bede fu a di fu aiti hondro yari ben teki en fu na umagado Eostre.” Tra buku e taki dati a abi fu du nanga na umagado fu den Funisiasma di den Babilonsma ben sabi leki Isjta.

2.   Asi, konikoni: Den sani disi e prenki den „sani di sma na ini Europa nanga Owstusei ben gwenti du te den ben e hori fesa fu anbegi den gado fu den na ini owruten.”​—Encyclopædia Britannica.

3.   Eksi: A Katholieke Encyclopaedie buku e taki dati na eksi e prenki a kisi di sma man kisi furu pikin. A buku Een jaar vol feesten e taki: „A suku di sma ben e suku eksi komoto fu na wondru krakti di sma ben gebroiki fu wiki a krakti fu wan pisi ten fu a yari. A kloru di sma ben e kloru eksi abi fu du nanga wondru tu. Den ben e bribi taki, te den kloru na eksi dan a krakti inisei na eksi e bigin wroko.”

4.   Nyun krosi tapu Pasen: „Den ben abi a gwenti fu weri nyun krosi tapu Pasen fu di den ben e si a sma di no weri nyun krosi leki sma di no ben abi maniri en leki sma di e denki ensrefi nomo. Efu sowan sma ben o taki na umagado fu den Skandinafia-sma odi, dan a ben o meki taki den no de koloku noso a ben tyari takru bakapisi.”​—The Giant Book of Superstitions.

5.   Na anbegi fu a son: A sani disi ben abi fu du nanga na owruten gwenti di sma ben abi fu anbegi a son. A ben abi fu du tu nanga „sani di den ben e du fu gi a son nanga en bigi krakti fu tyari kenki kon na ini ala sani di e gro, wan switikon.”​—Celebrations​—The Complete Book of American Holidays.

 The American Book of Days e taki krin fu pe Pasen komoto. A e taki: „Den kerki fu fosi teki a heiden gwenti disi abra fu sma di ben anbegi falsi gado, èn den meki a fesa disi kon tron wan Kresten fesa gi den srefi.”

 Bijbel e warskow wi fu no moksi na anbegi fu wi nanga gwenti di Gado no feni bun (Markus 7:6-8). 2 Korentesma 6:17 e taki: „prati nanga den’, na so Yehovah taki. ’No fasi den sani moro di no krin.’” Ibri sma di wani taki Gado feni den bun no musu abi noti fu du nanga Pasen, na wan heiden fesa.