Bijbel e gi wi deki-ati fu abi a gwenti fu gi sma sani, ma wi musu du dati nanga wi heri-ati. Na sowan fasi a sma di e kisi wan sani èn a sma di e gi o de nanga prisiri (Odo 11:25; Lukas 6:38). Yesus ben taki: „Wan sma sa de moro koloku te a e gi sani, leki te a e kisi sani.”​—Tori fu den apostel 20:35.

•  O ten Gado o prisiri nanga den sani di wi e gi?

•  O ten Gado no e prisiri nanga den sani di wi e gi?

•  Bijbeltekst di e taki fu a gi di wan sma e gi trawan sani

 Te wan sma e gi sani komoto fu en ati, dan dati bun srefisrefi. Bijbel e taki: „Meki ibri sma gi soleki fa a bosroiti na ini en ati. A no musu du dati nanga krutukrutu noso fu di sma dwengi en, bika Gado lobi a sma di e gi sani nanga prisiri.”​—2 Korentesma 9:7.

 Wi musu gi nanga wi heri-ati efu wi wan taki Gado feni na anbegi fu wi bun (Yakobus 1:​27). Te wan sma e yepi trawan di de na nowtu, dan a e wroko makandra nanga Gado èn Gado e si leki na leni a sma dati leni en wan sani (Odo 19:17). Bijbel e leri wi taki Gado o pai a sma dati baka.​—Lukas 14:12-​14.

 Te wi e du dati fu kisi wini gi wisrefi. Wan tu eksempre na:

•   Fu meki sma prèise wi.​—Mateyus 6:2.

•   Fu kisi wan sani baka.​—Lukas 14:12-14.

•   Pruberi fu pai fu man kisi frulusu.​—Psalm 49:6, 7.

 Te wi ben o horibaka gi sani di Gado e krutu. Fu eksempre, a ben o de wan fowtu sani fu gi sma moni fu go dòbel, fu go bai drugs noso fu go bai sopi fu dringi pasa marki (1 Korentesma 6:​9, 10; 2 Korentesma 7:1). A no ben o bun tu fu gi sma moni di man sorgu densrefi, ma di e weigri fu wroko.​—2 Tesalonikasma 3:​10.

 Te wi e gi sma so furu sani taki wi no man tyari wi eigi frantwortu na wan bun fasi. Bijbel e leri wi taki famiri edeman musu sorgu gi den sani di den osofamiri abi fanowdu (1 Timoteyus 5:8). A no ben o de wan bun sani efu wan famiri edeman ben e gi sma so furu sani, taki en eigi osofamiri ben o bigin go na baka. Na leti so, Yesus ben krutu den wan di ben e weigri fu sorgu gi den papa nanga mama di kon owru kaba, fu di den e taki dati ala san den ben abi „ na sani di gi spesrutu na Gado.”​—Markus 7:​9-​13.