Fa yu kan libi fu têgo?
A piki fu Bijbel
Bijbel e taki: „A sma di e du san Gado wani o tan fu têgo” (1 Yohanes 2:17, Holy Bible—Easy-to-Read Version). San Gado wani taki yu musu du?
Leri fu sabi Gado nanga en Manpikin, Yesus. Di Yesus ben begi Gado, a taki: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). San a wani taki fu „leri sabi” Gado nanga Yesus? Wi kan kon sabi den te wi e studeri Bijbel en te wi e fiti den Bijbel leri na ini wi libi. a Bijbel e tyari kon na krin san na a denki fu Yehovah wi Mekiman, a Gado di e gi libi (Tori fu den Apostel 17:24, 25). Bijbel e fruteri wi tu fu en Manpikin Yesus di ben „abi wortu di e gi sma têgo libi”.—Yohanes 6:67-69.
Sori bribi na ini a frulusu-ofrandi fu Yesus. Di Yesus kon na grontapu a „kon fu dini sma èn fu gi en libi leki wan lusu-paiman fu frulusu furu sma “ (Mateyus 20:28). A dede fu Yesus opo a pasi gi libisma so taki den kan libi fu têgo na ini wan Paradijs dya na grontapu b (Psalm 37:29). Yesus ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). Wi no musu taki nomo dati wi e bribi na ini Yesus. Wi musu ’sori bribi na ini en’, dati wani taki dati wi musu libi soleki fa a leri wi, èn soleki fa en Tata wani.—Mateyus 7:21; Yakobus 2:17.
Tan abi wan tranga matifasi nanga Gado. Gado wani taki wi kon krosibei na en èn taki wi tron en mati (Yakobus 2:3; 4:8). Gado e tan fu ala ten. Yehovah no man dede, dati meki a wani den mati fu en libi fu têgo. Nanga yepi fu En Wortu, Gado e sori wi san a wani gi ala den sma di e suku en: „Meki a de so, taki un ati tan naki fu têgo.”—Psalm 22:26.
Fowtu denki fu a libi fu têgo
Fowtu denki: A muiti di libisma e meki, sa sorgu taki sma o man libi fu têgo.
San tru: Aladi datra go na fesi so taki libisma kan libi moro langa, toku a muiti di den e meki no man meki sma libi fu têgo. Na Gado wawan kan gi sma têgo libi, bika na En wawan na „a sma di e gi libi” (Psalm 36:9). Gado e pramisi taki A „o swari dede fu têgo” èn taki A sa gi têgo libi na libisma di e tai hori na En.—Yesaya 25:8; 1 Yohanes 2:25.
Fowtu denki: Na soso wán sortu ras sa libi fu têgo.
San tru: Gado no lobi a wan ras moro a trawan. Dati meki Bijbel e taki dati „awansi fu sortu kondre wan sma de, efu a e lespeki Gado èn a e du san reti, dan Gado feni en bun” (Tori fu den Apostel 10:34, 35). Sobun a no abi trobi fu sortu ras wi de noso fu sortu kulturu wi komoto, ma efu wi e gi yesi na Gado, dan wi o libi fu têgo.
Fowtu denki: Têgo libi o soi.
San tru: Na Gado e gi sma a libi fu têgo. Gado lobi wi, èn a wani taki wi de koloku (Yakobus 1:17; 1 Yohanes 4:8). A sabi taki efu wi wani di koloku, dan wi musu du wroko di e gi wi prisiri (Preikiman 3:12). Gado e pramisi taki den sma di o libi fu têgo na grontapu o du wroko di o tyari wini gi den nanga den osofamiri.—Yesaya 65:22, 23.
Boiti dati, den sma di o libi fu têgo sa tan leri nyun sani fu a Mekiman fu den èn den furu sani di A o du. Gado meki libisma nanga a firi fu tan libi go doro èn fu leri moro fu En, ma toku „libisma noiti no man kon sabi finifini fa a tru Gado meki den sani fu en” (Preikiman 3:10, 11). Dati meki, den sma di o libi fu têgo o abi ala ten fu leri èn fu du moi sani.
a Yehovah Kotoigi wani studeri Bijbel nanga yu sondro taki yu abi fu pai gi dati. Efu yu wani sabi moro, luku a felem Fa wi e studeri Bijbel nanga sma?
b Luku na artikel „Fa Yesus e frulusu sma?”
Kande yu lobi den tori disi tu
PIKI TAPU AKSI FU BIJBEL
Fa Yesus e frulusu libisma?
Fu san ede a de fanowdu taki Yesus e taki gi wi? Na bribi nomo wan sma musu bribi na ini Yesus fu man kisi frulusu?
A WAKTITOREN
Yehovah „no lobi a wan sma moro a trawan”
Gado e arki èn a e piki den begi fu den anbegiman fu en, awinsi fu sortu ras noso kondre den de, noso awinsi den gudu noso pôti. Fa wi du sabi dati?
