Iya. Gado e broko en ede nanga den futuboi fu en di e siki. Bijbel e taki fu den sma di e dini en nanga den heri ati: „Yehovah o yepi en te a e didon siki na tapu en bedi” (Psalm 41:3). Efu yu abi wan siki di no man dresi, dan kande den dri sani disi o yepi yu:

1.   Begi Gado fu gi yu a krakti fu horidoro. Yu kan kisi „a freide fu Gado di bigi moro iniwan sani di libisma man frustan”. Disi kan yepi yu fu horidoro èn fu no broko yu ede tumusi.​—Filipisma 4:6, 7.

2.   Pruberi fu abi prisiri na ini a libi. Bijbel e taki: „Wan ati di e prisiri, bun leki dresi, ma te wan sma e sari, dan dati e meki en bonyo kon drei” (Odo 17:22). Na presi fu si ala sani so seryusu ala ten, pruberi fu lafu pikinso èn fu abi prisiri. Disi kan yepi yu fu no sari tumusi èn a bun gi a gosontu fu yu.

3.   Tranga yu bribi na ini den pramisi fu Gado gi a ten di e kon. Te yu e bribi taki den sani disi o pasa trutru, dan yu o firi koloku aladi yu e siki (Romesma 12:12). Bijbel taki dati wan ten o kon pe „nowan sma” o taki: „Mi siki” (Yesaya 33:24). Gado o puru ala den siki di datra no man dresi na ini a ten disi. Luku fu eksempre san Bijbel e taki fu owrusma: „Meki en skin kon moro moi leki di a ben yongu. Meki a kon abi krakti baka neleki di a ben yongu.”​—Yob 33:25.

 Ete wan sani: Aladi Yehovah Kotoigi sabi taki Gado man yepi sma, toku den e suku yepi tu na datra te den abi wan siki di no man dresi (Markus 2:17). Ma den no o taigi sma sortu datrayepi den musu teki èn sortuwan den no musu teki. Disi na wan bosroiti di ibri sma musu teki ensrefi.