Yu kan du furu bun sani nanga wan cellulair, ma efu yu no luku bun a kan du ogri tu. Fa yu kan leri yu pikin fu gebroiki en na wan koni fasi? O furu ten yu kan gi den ibri dei fu gebroiki den telefon? a

•  San yu musu sabi

•  San yu kan du

•  „Papa nanga mama di lobi den pikin, e poti wet gi den”

•   A cell kan poti den na ini kefar. Na artikel „Yonguwan nanga telefon​—Pisi 1: Mi pikin musu abi wan cell?” ben sori taki wan cell kan meki yu pikin si ala sani di de tapu Internet, bun nanga ogri.

   „A makelek fu frigiti taki telefon kan poti yu pikin na ini kefar. Den kan miti nanga sma noso sani di no bun.”​—Brenda.

•   Sma musu poti den na pasi. Yonguwan gwenti gebroiki Internet, ma furu bigisma na now den e leri fa fu gebroiki en. Ma disi no wani taki dati den bigisma no sabi noti fu den sani disi. Disi no wani taki tu dati pikin kan bosroiti gi densrefi fa èn o ten den o gebroiki Internet nanga telefon.

   A tru taki den pikin sabi wroko moro bun nanga telefon, ma dati no wani taki dati den kan gebroiki en leki fa densrefi wani. Srefi den pikin di koni srefisrefi te a abi fu du nanga den sani disi, abi yepi fanowdu fu den papa nanga mama.

   „Te yu e gi yu pikin wan telefon sondro fu leri en fa fu gebroiki en na wan koni fasi, dan a de neleki yu e poti en baka a stuur fu wan wagi, yu e start en èn yu e taigi en: ’Luku bun, rèi nanga koni’. Ma yu no leri en fa a musu rèi.”​—Seth.

•   Leri fa fu wroko nanga a telefon fu yu pikin. Kon sabi san na den setting tapu a telefon di kan yepi yu pikin fu gebroiki en na wan moro bun fasi. Fu eksempre:

   Sortu setting kan yepi papa nanga mama fu bepaal o furu den pikin kan gebroiki den cellulair?

   Yu ben sabi taki a no ala den setting tapu den telefon e tapu pikin fu no si sani di no bun?

   O moro yu sabi fa fu wroko nanga a telefon fu yu pikin, o moro yu o man yepi en fu gebroiki en cell nanga koni.

   Bijbeltekst: „A man di e gebroiki en frustan e kisi moro krakti.”​—Odo 24:5.

•   Sori yu pikin o fara a mag go. Sori en san a mag du èn san a no mag du. Fu eksempre:

   Yu o meki a gebroiki a telefon te wi e nyan makandra noso te wi go luku famiri noso mati?

   Yu pikin mag hori den telefon na den te den e go sribi?

   Sortu app yu o meki den download?

   O langa den mag gebroiki den telefon?

   Yu o poti wan spesrutu ten gi den ini a dei pe den kan gebroiki en?

   Taigi den san na den regel èn sori den san o pasa te den no e hori densrefi na den.

   Bijbeltekst: „No draidrai fu gi wan pikin piri-ai.”​—Odo 23:13.

•   Luku a telefon ten na ten. Yu musu sabi a password fu a telefon fu yu pikin. Luku ten na ten san a abi na ini, sani soleki sms, app, fowtow nanga den website di a go.

   „Wi ben taigi a meisje fu wi taki wi ben o luku a telefon fu en ten na ten. Wi ben o du dati sondro fu taigi en o ten. Èn efu a no ben gebroiki en bun, wi no ben o meki a gebroiki en so furu moro.”​—Lorraine.

   Leki papa nanga mama yu abi a reti fu sabi fa yu pikin e gebroiki en telefon.

   Bijbeltekst: „Den sani di wan boi e du e sori suma a de trutru. Na so sma kan sabi efu a e du san reti èn efu a e du sani nanga wan krin ati.”​—Odo 20:11.

•   Leri den fu du bun sani. Yepi den fu lobi du sani di bun. Fu san ede disi prenspari? Fu di efu wan pikin wani du sani kibrikibri, a o feni wan fasi nomo fu du dati sondro fu en papa nanga mama sabi. b

   Dati meki yu musu leri yu pikin fu abi bun fasi, leri en fu de eerlijk, fu dwengi ensrefi èn fu tyari frantwortu fu den sani di a e du. Furu tron wan pikin di abi den fasi disi o du muiti fu gebroiki en telefon na wan koni fasi.

   Bijbeltekst: „Tranga nyanyan na gi. . . sma di leri fa fu gebroiki den frustan so taki den kan sabi san bun èn san no bun.”​—Hebrewsma 5:14.