A feti na ini Ukraini, nanga den bigi kenki di de fu si na ini a weer e meki taki nofo n’nyan no de na heri grontapu. Disi e psa spesrutu na ini pôti kondre pe a muilek gi furu sma feni nofo n’nyan.

•   „A muilek fu feni n’nyan fu di a weer e kenki, fu di feti de èn fu di ala sani e kon diri.”​—António Guterres, edeman fu de Verenigde Naties, 17 yuli 2023.

•   „Ondrosukuman e taki dati na heri grontapu a o muilek fu feni n’nyan, fu di Rosiakondre puru ensrefi na ini a kontrakt di ben sorgu taki n’nyan ben kan seni kmoto fu Ukraini go na tra kondre. Den taki dati a sani disi o meki en moro muilek gi den pôti kondre, spesrutu kondre leki Noord-Afrika nanga Midden Oosten.”​—Atalayar.com, 23 yuli 2023.

 Luku san Bijbel e taki fu den ten pe a o muilek fu feni n’nyan èn fu a ten di e kon.

•   Yesus ben taki: „A wan pipel o go feti nanga a tra pipel, èn a wan kownukondre o go feti nanga a tra kownukondre. Na ini a wan presi baka a trawan angriten o de.”​—Mateyus 24:7.

•   A Bijbel buku Openbaring e taki fu fo man di e rèi na tapu asi. Wan fu den man disi e prenki feti. Leti na en baka wan trawan e kon di e prenki angriten, wan ten pe a ben o muilek fu feni n’nyan èn pe sma ben o aksi bun furu moni gi n’nyan. „Mi si wan blaka asi èn a sma di ben e sidon na en tapu ben abi wan wegi na ini en anu. Dan mi yere wan sten. . . . A taki: ’Wán kilo aleisi gi wán dei moni, nanga dri kilo groto gi wán dei moni.’”​—Openbaring 6:5, 6.

 Den Bijbel profeititori disi di e taki fu angriten e kon tru now na ini a ten di Bijbel e kari „den lasti dei” (2 Timoteyus 3:1). Efu yu wani sabi moro fu „den lasti dei” nanga den fo asi fu Openbaring, dan luku a felem di nen Grontapu kenki sensi 1914 èn leisi na artikel di nen „Suma na den fo man na tapu den asi?”

•   Bijbel abi moi rai di e sori wi san wi kan du te problema e miti wi, soleki te den prijs fu n’nyan-sani e kren noso srefi te a muilek fu feni n’nyan. Luku wan tu eksempre na ini na artikel „Gebroiki yu moni nanga koni​—Fa yu kan du dati.”

•   Bijbel e gi wi a howpu tu taki a libi o kon moro betre. A e pramisi wi taki wan ten o kon pe ’furu n’nyan o de na grontapu’ èn pe ala sma o abi nofo fu nyan (Psalm 72:16). Fu sabi sortu howpu Bijbel abi gi a ten di a kon èn fu san ede yu kan de seiker taki disi o kon tru, dan leisi na artikel di nen „Echte hoop op betere tijden.”