TAN NA AI!
Ogri di sma e du fu kenki sani na politiek sei—San Bijbel e taki?
Na heri grontapu sma e du bigi ogri fu di den wani kenki sani na politiek sei.
Na ini Meksikow, den kiri 39 politiekman na ini a pisi ten di a verkiezing fu 2023-2024 ben e hori. Disi de moro sma leki iniwan tra ten. Boiti dati, sma du wan lo tra ogri tu fu di den wani taki sani kenki na politiek sei.
Na ini a ten di no psa so langa ete, sma na Europa du wan lo ogri fu di den wani taki sani kenki na politiek sei. Na so den pruberi fu kiri a minister-presidenti fu Slowakia tapu 15 mei 2024.
Tapu 13 yuli 2024, furu sma na Amerkankondre skreki di wan sma pruberi fu kiri Donald Trump di ben de presidenti fosi.
Fu san ede sma e du so furu ogri fu kan kenki sani na politiek sei? Wan ten o de taki disi no o psa moro? San Bijbel e taki?
Bijbel taki dati sma no ben o agri nanga makandra na politiek sei
Bijbel taki dati na ini a ten disi di Gado Wortu e kari „den lasti dei”, furu sma ben o firi fu du ogri èn den no ben o agri nanga makandra.
„Na ini den lasti dei muilek ten o de di tranga fu pasa, bika sma . . . no o de nanga tangi. . . . Den no o wani meki kruderi. . . . Den o du ogri-ati sani. . . . Den o tori trawan. Den o du san densrefi wani. Den o abi bigimemre.”—2 Timoteyus 3:1-4.
Bijbel taki tu dati na ini a ten disi dyugudyugu ben o de fu di sma opo densrefi teige tiriman èn fu di furu bruya de na politiek sei (Lukas 21:9). Ma wan ten o kon taki sma no o du ogri moro na politiek sei èn pratifasi no o de moro.
Wan kba o kon na ogri di sma e du na politiek sei
Na ini Bijbel skrifi taki Gado o puru ala libisma regering èn na presi fu den regering disi, a o poti en eigi regering di de na hemel.
„A Gado fu hemel o seti wan kownukondre di . . . o broko ala den [tra] kownukondre disi pisipisi èn a o tyari wan kaba kon na den. A kownukondre srefi o tan fu têgo.”—Danièl 2:44.
Gado Kownukondre o tyari pipel kon na wán èn a o meki taki freide de na heri grontapu.
A Tiriman fu a Kownukondre na Yesus Krestes. Bijbel e kari en „Granman fu Freide”. En o sorgu taki „ala ten sani o waka bun”.—Yesaya 9:6, 7.
Srefi nownow kba den sma di abi a Kownukondre disi leki regering e leri fu libi na ini freide. San na a bakapisi? Bijbel taki: ’Den o naki den feti-owru kon tron plugu èn den lansri o tron grasinefi. Nowan pipel o teki feti-owru fu go feti nanga wan tra pipel èn den no o leri fu feti moro.’—Yesaya 2:3, 4.
Efu yu wani leri moro fu a tori disi, dan leisi na artikel di nen „San Gado Kownukondre o du?” èn luku a felem di nen San na Gado Kownukondre?