Moro leki oiti bifo, regering na heri grontapu gebroiki moro leki 2240 milyard Amerkan dala na ini 2022 gi den legre fu den. Den gebroiki a moro bigi pisi fu a moni disi fu feti teige Rosiakondre di e feti now nanga Ukraini. Na ini april 2023 a Stockholm International Peace Research Institute (SIPRI) skrifi wan raportu di e sori san psa na ini a yari 2022:

•   A yari disi den kondre fu Europa gebroiki „13 procent moro moni gi den legre fu den leki fa a ben de na ini den tra yari baka a ten fu a koude oorlog.”

•   „Rosiakondre . . . gebroiki sowan 9,2 procent moro moni leki oiti bifo gi den legre fu den. Fosi den ben de na a di fu feifi presi, ma now den de na a di fu dri presi.”

•   Amerkankondre e gebroiki moro moni gi a legre fu den leki tra kondre. „Den gebroiki 39 procent fu a moni di tra kondre fu grontapu e gebroiki gi den legre.”

 Dr. Nan Tian, di yepi skrifi a SIPRI raportu, taki: „Furu kondre gebroiki moro moni gi den legre fu den na ini den yari di psa, èn dati e sori taki dei fu dei a no veilig moro fu libi na ini a grontapu disi.”

 Bijbel ben taki dati den tranga kondre fu grontapu ben o strei nanga makandra. A sori tu taki wán fasi nomo de fa freide kan kon.

•   Bijbel e taki dati wi e libi now na ini ’a ten fu a kaba.’​—Danièl 8:19.

•   A Bijbelbuku Danièl ben taki dati na a ten dati den grontapu makti ben o strei nanga makandra. Den grontapu makti disi ben o „strei” fu kisi moro makti leki trawan. Ma dati ben o wani taki tu dati den legre fu den ben o gebroiki bun furu „gudu”, noso moni gi den legre fu den.​—Danièl 11:40, 42, 43.

 Efu yu wani sabi moro fu a span Bijbel profeititori disi, dan luku a video di nen Fa a profeititori fu Danièl kapitel 11 kon tru?.

•   Bijbel e taki dati Gado o poti wan tra regering na presi fu den regering fu libisma. A „o seti wan kownukondre di noiti no o kisi pori. A kownukondre srefi no o gi na nowan tra pipel. A o broko ala den kownukondre disi pisipisi èn a o tyari wan kaba kon na den. A kownukondre srefi o tan fu têgo.”​—Danièl 2:44.

•   Heri esi Yehovah a Gado o du wan sani di libisma no man du. A o tyari trutru freide kon di o tan fu ala ten. Fa a o du dati? A Kownukondre fu en de wan regering di de na hemel èn a o pori ala fetisani. A o tyari wan kba kon tu na ala ogridu.​—Psalm 46:8, 9.

 Fu kon sabi san Gado Kownukondre o du moro, dan leisi na artikel di nen „Onder Gods Koninkrijk ’zal volop vrede zijn’.”