Srudati fu Rosiakondre ben broko go na ini Ukraini tapu 24 februari 2022. A sani disi ben meki taki furu sma ben de na ini nowtu, fu di furu fu den sma di e tan na ini a kondre ben musu lowe. a

 „Wi ben e yere bom e sutu. Wi ben frede srefisrefi, mi no man taki fa wi ben e firi. Di wi yere taki trein ben de fu yepi sma fu lowe, wi teki a bosroiti fu gwe tu. Ala sani san wi ben abi wi ben abi fu poti na ini wan pikin rugtas. Wi ben man teki soso den prenspari papira fu wi, dresi, watra nanga pikinpikin sani fu nyan. Wi libi ala sani na baka èn wi go na ini a trein di wi ben e yere den bom e fadon.”​—Nataliia, fu Kharkiv, Ukraini.

 „Mi wakti teleki a lasti momenti fu di mi no ben bribi taki a feti ben o bigin. Mi yere fa bom ben e sutu na tra presi fu a foto èn mi ben firi fa den fensre ben e seki. Mi bosroiti fu gwe èn teki soso den moro prenspari sani di mi ben o abi fanowdu. Mi gwe fu oso aiti yuru mamanten, dan mi teki wan trein go na lviv èn baka dati mi teki wan bus go na Polen.”​—Nadija, fu Kharkiv, Ukraini.

Den tori na ini na artikel disi

•  San na a trutru reide fu san ede sma musu lowe?

•  Pe den loweman kan feni yepi?

•  Bijbel kan yepi den sma di lowe na ini a ten disi?

 San na a trutru reide fu san ede sma musu lowe?

 Den sma na ini Ukraini ben musu lowe fu di srudati fu Rosiakondre broko kon na ini a kondre. Ma Bijbel e sori taki moro prenspari reide de fu san ede so furu sma e lowe:

•   Den regering fu libisma na heri grontapu no du san de pramisi sma. Furu tron den sma di abi makti na ini den regering e gebroiki dati fu kwinsi den sma.​—Preikiman 4:1; 8:9.

•   Satan Didibri, „a tiriman fu grontapu,” abi sowan krakti na tapu libisma taki Bijbel e taki: „Heri grontapu de na ini a makti fu na ogriwan.”​—Yohanes 14:30; 1 Yohanes 5:19.

•   Boiti den problema di libisma e miti omeni hondro yari kaba, Bijbel ben taki na fesi taki den sani disi ben o pasa. Drape skrifi: „Na ini den lasti dei muilek ten o de di tranga fu pasa” (2 Timoteyus 3:1). Ma san moro ogri na taki na ini den dei disi furu orloku ben o de, rampu ben o de, nyanyan ben o mankeri, takru siki ben o de. Ala den sani disi ben o meki taki sma ben musu lowe.​—Lukas 21:10, 11.

 Pe den loweman kan feni yepi?

 Bijbel e sori wi taki Yehovah, b wi Mekiman e firi èn a abi lobi gi sma di musu lowe noso gwe libi den oso (Deuteronomium 10:18). A pramisi taki a o puru den problema di den loweman abi te a regering fu en di e tiri na hemel o puru den libisma regering na pasi (Danièl 2:44; Mateyus 6:10). Yehovah o gebroiki en Kownukondre fu puru Satan Didibri na pasi (Romesma 16:20). A Kownukondre fu Gado o tiri abra heri grontapu, no wan kondre o abi den eigi regering. Ala libisma na grontapu o de wan bigi famiri. Nowan sma o abi fu gwe libi en oso fu di Bijbel e pramisi taki: „Ibriwan sma o sidon na ondro en eigi droifibon nanga en eigi figabon. Nowan sma o meki den frede, bika na Yehovah srefi, iya, na a Gado di e tiri den legre taki so.”​—Mika 4:4.

 Gado Kownukondre wawan kan lusu den problema di den loweman e kisi na ini a ten disi. Yehovah o puru ala den problema di e meki sma tron loweman. Luku san na wan tu fu den:

•   Feti. „[Yehovah] e meki feti kon na wan kaba” (Psalm 46:9). Fu sabi fa Yehovah o puru feti luku den artikel „Vrede op aarde: Hoe?”

•   Sma e kwinsi trawan èn e du ogri-ati sani nanga den. „[Yehovah] o kibri den libi, so taki sma no man kwinsi den moro noso du ogri-ati sani nanga den” (Psalm 72:14). Fu sabi fa sma kan kenki den takru maniri fu den dan leisi den artikel di nen „Wi man stop bita-ati.”

•   Pôti sma. „[Yehovah] o frulusu den pôti sma di e bari suku yepi” (Psalm 72:12). Fu sabi fa Gado o puru den sani di e meki sma pôti dan leisi na artikel „Libisma o man seti na ekonomia na wan eerlijk fasi?”

•   Angriten. „Furu nyanyan o kon de na grontapu” (Psalm 72:16). Fu sabi san Gado o du so taki nowan sma o de nanga angri moro dan leisi na artikel „Een wereld zonder honger?”

 Bijbel kan yepi den sma di lowe na ini a ten disi?

 Iya. Boiti taki Bijbel e gi den loweman a howpu taki sani o go moro bun na ini a ten di e kon, a man yepi den nownow kaba nanga den problema fu den.

 San Bijbel e taki: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati nanga un frustan.”​—Filipisma 4:6, 7.

 San a wani taki: Aksi Gado fu no bruya èn fu abi wan korostu firi. Luku na artikel „Filippenzen 4:6, 7​—’Maak je nergens zorgen over.’”