Te yu lasi yu wroko, yu kan kisi moni problema nanga osofamiri problema. Ma a kan gi yu broko-ede tu èn a kan meki yu firi sari. Luku wan tu koni rai fu Bijbel di kan yepi yu.

•   Fruteri trawan fa yu e firi.

   San Bijbel e taki: „Wan trutru mati e sori lobi ala ten.”​—Odo 17:17.

   Te yu lasi yu wroko, dan kande yu e firi sari, yu e mandi, yu e bruya, noso kande yu abi a firi tu taki yu no du sani bun. Te yu e fruteri famiri nanga bun mati fa yu e firi, dan den kan yepi yu fu firi bun baka. Den kan gi yu bun rai tu di kan yepi yu fu feni wan nyun wroko.

•   No broko yu ede tumusi.

   San Bijbel e taki: „Noiti un musu broko un ede nanga tamara, bika tamara o abi en eigi broko-ede.”​—Mateyus 6:34.

   Bijbel e gi wi deki-ati fu sreka sani na fesi (Odo 21:5). Ma a e gi wi a rai tu fu no broko wi ede tumusi nanga sani fu tamara. Nofo tron wi e broko wi ede nanga sani di kande no o pasa noiti. Moro betre wi poti prakseri na sani di wi musu du tide.

   Bijbel e gi wi tra koni rai tu di kan yepi wi te wi abi furu broko-ede. Leisi na artikel „Omgaan met stress” fu kon sabi moro.

•   Kenki a fasi fa yu e gebroiki yu moni.

   San Bijbel e taki: „Mi sabi . . . san a wani taki fu abi bun furu èn san a wani taki fu no abi noti.”​—Filipisma 4:12.

   Kenki a fasi fa yu ben gwenti du sani fosi. Kande yu o abi fu kenki a fasi fa yu e gebroiki yu moni so taki yu no e bai moro leki san yu abi fanowdu. Luku bun taki yu no go leni moni te a no de fanowdu.​—Odo 22:7.

   Efu yu wani sabi san yu kan du moro fu kenki a fasi fa yu e gebroiki a moni di yu abi now, dan luku na artikel „Rondkomen met minder.”

•   Gebroiki yu ten na wan koni fasi.

   San Bijbel e taki: „Tan waka nanga koni . . . . Gebroiki a ten fu unu na wan koni fasi.”​—Kolosesma 4:5.

   Aladi yu no abi wan fasti ten moro fu go na wroko, pruberi fu tan abi fasti ten fu du sani. Na so fasi yu libi no o waka bruya èn a o meki yu firi bun tu.

•   Fiti yusrefi.

   San Bijbel e taki: „Ala tranga wroko e tyari wini kon.”​—Odo 14:23.

   De klariklari fu du wroko di no de a srefi leki san yu ben gwenti du fosi. Kande yu abi fu suku wroko di no gersi so prenspari noso di no e pai so furu leki a wroko di yu ben abi fosi.

•   Horidoro.

   San Bijbel e taki: „Sai yu siri na mamanten èn no meki yu anu rostu fosi neti tapu, bika yu no sabi pe a siri o gro.”​—Preikiman 11:6.

   Tan suku wroko. Fruteri trawan taki yu e suku wroko. Taki nanga famiriman, sma di yu sabi, sma fu yu owru wrokope noso nanga birtisma. Taki nanga den bedrijf di e yepi sma suku wroko. Luku na ini koranti noso na tapu den poster di sma e plak na den fensre fu wenkri fu sabi efu den e suku wrokoman. Go na den bisnis website fu luku efu den e suku sma. A kan taki furu leisi bedrijf e seni kari yu gi wan interview noso kande yu o abi fu seni bun furu brifi, fosi yu feni wan wroko.