Ibri mun, wi e angri fu luku den programa nanga den felem di e kon tapu JW Broadcasting. Ma toku, furu fu wi brada nanga sisa na ini Afrika no man feni den programa disi di de tapu Internet. Fu san ede den no man feni den?

 Furu presi na ini Afrika no abi Internet. Èn den presi pe Internet de, na Internet slow noso a diri fu pai. Fu eksempre, wan leisi wan kring owruman na ini Madagaskar ben download wan JW Broadcasting programa gi a mun dati na wan Internet café. A ben musu pai 16 Amerkan dala. A moni dati furu moro leki san son sma e wroko na ini wàn wiki ini Afrika! a

 Aladi a muilek so, toku milyunmilyun sma na ini Afrika kan prisiri now fu luku JW Broadcasting sondro taki den abi Internet. Fa dati kan?

 Sensi a yari 2017, den sma di e libi na a zuidsei fu a Sahara na ini Afrika, kan luku JW Broadcasting nanga yepi fu wan satelliet di e seni en go na wan telefisi kanaal. Den no abi fu pai gi disi èn a de 24 yuru langa, seibi dei na ini wan wiki, na ini 16 tongo.

 Fu man du disi, dan Yehovah Kotoigi e pai wan telefisi station fu gebroiki satelliet so taki den kan sori sani tapu TV. A satelliet di den e gebroiki e yepi sowan 35 kondre na a zuidsei fu a Sahara na ini Afrika. A moni di Yehovah Kotoigi musu pai gi disi na moro leki 12.000 Amerkan dala ibri mun. Ten na ten den abi fu pai moro fu sori son programa live na wan tra kanaal. A sani disi e meki taki dusundusun sma kan prisiri fu luku kongres programa nanga spesrutu programa soleki te wan brada fu na edekantoro fisiti wan bijkantoro.

 Furu sma, sosrefi sma di no de Kotoigi, e luku den programa disi tapu telefisi na den oso nanga yepi fu a JW satelliet. Ma toku, brada nanga sisa de di no man pai den sani di de fanowdu fu luku den programa na a fasi disi. Fu yepi den brada disi, na organisâsi poti aparaat na ini moro leki 3670 Kownukondre zaal so taki den brada nanga sisa kan luku a JW Broadcasting na ini a Kownukondre zaal. Efu wan Kownukondre zaal abi wan telefisi noso wan beamer kaba, dan a e kostu sowan 70 Amerkan dala fu bai èn seti a sani disi na a zaal. Efu wan zaal no abi telefisi noso beamer ete, dan ala sani e kostu sowan 530 Amerkan dala.

 Den brada nanga sisa fu wi breiti srefisrefi nanga a sani disi. Wan owruman na ini Kameroen e taki: „Gi wi famiri a sani disi de leki mana na ini wan sabana.” Wan brada na ini Nigeria di nen Odebode, e taki: „Wi osofamiri e luku a telefisi kanaal disi dri tron wan wiki. Den pikin fu mi ala ten e wakti fu den dei doro te wi o luku den programa disi. Son leisi, den e aksi mi fu kenki go na a JW telefisi na presi fu luku tra telefisi programa.” Rose di de fu Nigeria tu, e taki: „Mi breiti fu taki dati a JW satelliet kanaal kon na a presi fu den nyunsu di mi ben lobi luku ala ten tapu telefisi. Te mi ben e luku den nyunsu disi, dan mi brudu ben e kon hei, fu di mi ben e atibron fu den sani di mi e si. Ma JW Broadcasting na wan sani di e gi mi deki-ati èn di e meki mi firi heri bun! Now disi de a kanaal di mi lobi srefisrefi. Na wan bigi blesi fu Yehovah.”

 Wan kring owruman na ini Mosambik e fruteri taki na ini a kring fu en, den brada seti sani na den Kownukondre zaal so taki den kan fanga den programa nanga yepi fu satelliet. Na ini den gemeente disi den brada nanga sisa e kon wan yuru moro fruku na a konmakandra, soso fu luku a JW Broadcasting nanga yepi fu a satelliet.

 Wi ben gebroiki a satelliet disi tu gi na Internationaal Kongres fu 2019 na ini Johannesburg na Zuid-Afrika. Wi ben gebroiki en fu seni den moro prenspari lezing go na neigi tra presi, èn sosrefi den lezing di den brada fu a Tiri Skin ben hori. Brada Sphumelele fu a Broadcasting kantoro fu a bijkantoro fu Zuid-Afrika, e taki: „Ini a ten di pasa wi ben e seni den lezing nanga yepi fu Internet. Ma fu ben man du dati, wi ben musu abi wan bun Internet, èn wi ben musu pai furu gi dati. A JW satelliet no ben diri so, èn a bun moro a Internet.”

 Furu fu den brada nanga sisa fu wi na ini Afrika kan luku JW Broadcasting nanga yepi fu satelliet, fu di unu e gi bijdrage nanga un heri ati fu horibaka gi a wroko di e du na heri grontapu. Wi e warderi en srefisrefi taki unu e gi bijdrage nanga yepi fu den difrenti fasi fa un kan du dati soleki fa a de fu si tapu donate.pr418.com.