Yehovah Kotoigi e broko den ede trutru nanga den brada nanga sisa fu den (1 Petrus 2:17). Furu fu wi e firi leki Sisa Tannis fu Kenia. A taki: „Ala ten mi wani sabi fa a e go nanga den brada nanga sisa fu mi na heri grontapu.” Fa Tannis nanga milyunmilyun tra Kotoigi sabi san e pasa? Sensi 2013, wi abi wan pisi tapu wi website jw.org di nen Nyunsu.

 Na a pisi disi yu e feni nyunsu fu Yehovah Kotoigi di abi fu du nanga den nyun Bijbel di meki, fa den yepi sma di kisi fu du nanga wan rampu, sortu sani den bow nanga tra prenspari sani di pasa. Wi man leisi tu fa a e go nanga den brada nanga sisa fu wi di de na strafu-oso fu di den de Kotoigi. Yu abi moi ondrofenitori tu fu spesrutu preikiwroko di du nanga a Memrefesa di hori na difrenti presi. San musu du fu skrifi den nyunsu artikel disi?

 Na afdeling Office of Public Information (OPI) e seti ala sani na a pisi di nen Nyunsu. Na afdeling disi de na a edekantoro fu wi èn a de ondro a tiri fu a Fesiman Komte fu a Tiri Skin. Na a OPI moro leki 100 brada nanga sisa e wroko èn furu fu den na friwani-wrokoman di no e libi na edekantoro. Yu abi sma di e skrifi a nyunsu, sma di e ondrosuku moro sani fu den tori di musu skrifi, sma di e teken noso meki fowtow gi den artikel èn sma di e vertaal sani gi den artikel. Trawan e go taki nanga sma fu lanti, datra noso sabiman èn tra nyunsuman te dati de fanowdu. Na heri grontapu moro leki 80 nyunsu afdeling de na difrenti bijkantoro di e horibaka gi na afdeling OPI.

 OPI e wroko skinskin nanga den afdeling disi fu skrifi den nyunsu. Te den brada bosroiti fu sortu tori den o skrifi, dan den e ondrosuku ala sani di abi fu du nanga a tori dati èn den e luku efu ala sani de so trutru. Disi wani taki dati den abi fu interview son sma èn den abi fu taki nanga sma di abi moro sabi fu a tori di den wani skrifi. Baka te den kaba nanga a pisi disi, dan den o skrifi wan artikel fu a tori, den o luku efu son sani musu kenki na ini na artikel, wan sma o luku finifini efu ala wortu nanga tra sani skrifi bun èn den o poti fowtow na ini na artikel. Baka dati den e seni na artikel gi a Fesiman Komte fu luku efu den feni en bun.

 Fa den brada nanga sisa feni a pisi di nen Nyunsu? Cheryl, wan sisa na den Filippijnen taki: „Ibri mamanten mi lobi leisi den nyunsu fu Yehovah organisâsi nanga en pipel.”

 Furu sma di e leisi den artikel fu wi e si a difrenti fu den nyunsu fu wi nanga tra nyunsu. Tatiana fu Kasakstan taki: „Mi breiti taki mi man frutrow a nyunsu tapu jw.org. Den sani di skrifi tru èn den e taki fa sani de trutru.” Wan sisa na ini Meksikow di nen Alma taki: „Nofo tron wi e yere nyunsu fu soso ogri sani di e pasa, ma a pisi Nyunsu e gi mi deki-ati.”

 A nyunsu tapu jw.org no de fu frutrow nomo, ma a e tranga a bribi fu wi tu. Bernard fu Kenia taki: „Den nyunsu yepi mi fu si den brada nanga sisa leki mi echte famiri, awinsi pe den de. Te mi e begi, dan mi man kari den nen èn mi man taki fu den situwâsi fu den.” Wan sisa di nen Bybron èn di e libi na Kenia tu taki: „Mi e prisiri te mi e leisi taki a Bijbel kon na doro ini wan tra tongo! Den artikel e memre mi taki Yehovah no lobi a wan sma moro a trawan.”

 Srefi den tori fu den brada nanga sisa di e kisi frufolgu kan gi wi deki-ati. Jackline ini Kenia taki: „Te mi e prakseri a deki-ati di den brada nanga sisa disi abi, dan mi bribi e kon moro tranga. Ala ten mi e luku san e yepi den fu horidoro. Mi kon si taki na ’gewoon’ sani soleki begi, leisi Bijbel èn singi srefi e yepi den fu abi wan tranga bribi.”

 Wan sisa na ini Kosta Rika di nen Beatriz lobi den nyunsu di abi fu du nanga rampu di pasa. A taki: „Te mi e leisi den nyunsu disi, dan mi e si fa na organisâsi fu wi e go yepi den brada nanga sisa wantewante, fa den seti ala sani bun, èn fa den e sori lobi gi den brada nanga sisa. Dati e meki mi si krin taki disi na Yehovah en organisâsi.”

 Wi breiti srefisrefi taki wi man sabi ala den nyun sani di e pasa nanga den brada nanga sisa fu wi na heri grontapu! Disi man pasa soso nanga den bijdrage di furu fu unu e gi nanga yepi fu donate.pr418.com. Grantangi fu den bijdrage di unu e gi nanga un heri ati fu horibaka gi a wroko di wi e du na heri grontapu.