2 Korentesma 9:1-15
9 We, a no de fanowdu trutru taki mi e skrifi unu fu a wroko+ di unu e du gi den santawan,
2 bika mi sabi taki unu de klariklari fu yepi trawan. Na fu a sani dati mi e meki bigi gi unu na den Masedoniasma. Mi fruteri den taki wan heri yari kaba, unu di de na ini Akaya, de srekasreka fu yepi.+ A faya di unu abi, gi furu fu den deki-ati fu yepi tu.
3 Fu dati ede, mi e seni den brada kon na unu, so taki den kan si taki a no fu soso wi meki bigi gi unu na ini a tori disi, ma taki unu de srekasreka trutru+ soleki fa mi ben taki fu unu.
4 Bika efu den Masedoniasma ben o kon nanga mi èn den ben o si taki unu no de srekasreka, dan wi nanga unu ben o kisi syen fu di wi ben frutrow unu.
5 Fu dati ede mi ben feni en fanowdu fu aksi den brada fu kon na unu fosi mi èn fu sreka den sani di unu pramisi fu gi nanga un heri ati.+ Na so den sani o de srekasreka te wi e kon èn a o de krin taki unu gi disi nanga un heri ati èn no fu di sma dwengi unu.+
6 Ma un musu sabi taki a sma di e sai pikinso nomo+ o koti pikinso tu èn a sma di e sai bogobogo+ o koti bogobogo tu.
7 Meki ibri sma gi soleki fa a bosroiti na ini en ati. A no musu du dati nanga krutukrutu+ noso fu di sma dwengi en, bika Gado lobi a sma di e gi sani nanga prisiri.+
8 Boiti dati, Gado man sori unu ala en bun-ati. Dati meki ala ten unu o abi ala san unu abi fanowdu èn unu o abi furu sani fu man du ala sortu bun wroko.+
9 (A de soleki fa Gado Buku taki: „Na ala sei a e prati sani gi sma. A e gi den pôtiwan sani tu. Fu têgo a e du san reti.”+
10 We, a sma di e gi a saiman furu siri èn di e gi sma brede fu nyan,+ o gi unu a siri di un musu sai èn a o meki den siri kon moro furu. A o meki unu abi furu bun bakapisi fu den bun sani di unu e du.)+
11 Gado e blesi unu na ini ala sani, so taki unu kan du furu bun gi trawan na ala sortu fasi. Dati meki sma o taki Gado tangi fu den sani fu unu di wi tyari.+
12 Bika a wroko di unu e du fu a bun fu trawan, no de nomo fu gi den santawan ala san den abi fanowdu.+ Ma a wroko disi o meki sosrefi taki furu sma e taki Gado tangi.
13 Te sma si den bakapisi fu a wroko disi, dan den o gi Gado glori, fu di unu e gi yesi na a bun nyunsu fu Krestes, soleki fa unu e preiki.+ Den o gi Gado glori tu fu di unu lobi fu gi sani na den èn na ala tra sma.+
14 Boiti dati, den e begi fayafaya gi unu èn den e sori taki den lobi unu, fu di Gado sori unu a bun-ati+ fu en di bigi moro ala tra sani.
15 Tangi fu Gado taki a gi wi wan kado di bigi pasa marki.+
