Odo 13:1-25
13 A piri-ai fu wan papa e meki wan manpikin kisi koni,+ ma wan spotuman na wan sma di no wani teki rai.+
2 San wan man e taki nanga en mofo kan meki sani waka bun gi en,+ ma den wan di e bedrigi trawan e suku nomo fu du sma ogri.+
3 A sma di e luku bun san a e taki nanga en mofo e kibri en libi.+ A sma di e piri en mofo opo o kisi pori te fu kaba.+
4 A lesiman wani ala sortu sani èn toku a no abi noti.+ Ma den wan di e wroko tranga o kon fatu.+
5 Wan reti-ati sma no lobi lei kwetikweti,+ ma den ogri sma e tyari densrefi na wan syen fasi èn den e du sani di o meki den fesi fadon.+
6 Retidu e kibri a sma di no e du ogri,+ ma ogridu e pori a libi fu wan sondari.+
7 Yu abi sma di e du neleki den gudu, ma den no abi notinoti.+ Yu abi sma tu di e du neleki den pôti, ma den lai gudu.
8 Wan man kan bai ensrefi kon fri nanga den gudu fu en,+ ma sma no o firi fu piri-ai gi wan pôtiman.+
9 A leti fu den reti-ati sma o gi den prisiri,+ ma a faya fu a lampu fu den ogri sma o dede.+
10 Wan sma di abi heimemre e tyari soso problema kon,+ ma den wan di e suku rai na trawan, abi koni.+
11 Den gudu di wan sma kisi sondro fu meki muiti, e lasi gowe safrisafri,+ ma den gudu fu a sma di e tyari sani kon na wán pikinsopikinso, o kon moro furu.+
12 Te wan sma no man kisi san a e fruwakti, dan en ati o kon siki,+ ma te a kisi a sani di a ben wani trutru, dan dati na wan bon di e gi libi.+
13 A sma di no e du san a wèt e taki,+ o lasi a sani di a gi leki panti, ma a sma di e lespeki a wèt, o kisi blesi.+
14 A wèt fu den koni sma na wan peti di e gi libi.+ A e puru sma na ini den trapu fu dede.+
15 Te wan sma e si a dipi fu wan tori, dan dati e tyari wini kon,+ ma a pasi fu den wan di e bedrigi trawan, takru srefisrefi.+
16 Ibriwan sma di koni o sori taki a sabi san a e du,+ ma a sma di de sondro frustan o sori ala sma fa a don.+
17 Wan takru-ati boskopuman o go du ogri,+ ma wan boskopuman di yu kan frutrow e tyari wini kon.+
18 A sma di no wani teki piri-ai, o kon pôti èn a o kisi syen,+ ma a sma di e teki rai, o kisi grani.+
19 Te wan sma e kisi san a wani, dan dati switi gi en,+ ma gi den sma sondro frustan a de wan tegu sani fu drai den baka gi ogridu.+
20 Te wan sma e waka nanga koniwan, dan ensrefi o kon koni,+ ma te wan sma e waka nanga don sma, dan sani no o waka bun gi en.+
21 Den wan di e kisi ala sortu problema, na den sondari,+ ma na den reti-ati sma e feni bun.+
22 Te wan bun sma dede, a o libi en gudu gi den bakapikin fu en èn na den reti-ati sma o kisi den gudu fu den sondari.+
23 Te wan pôti sma e wroko a gron fu en, dan a gron e gi furu nyanyan,+ ma yu abi sma di e lasi ala san den abi, fu di den no man krutu sani na wan reti fasi.+
24 A sma di no e strafu* en pikin, no lobi en,+ ma a sma di lobi en pikin trutru, e suku ala ten fu leri en fa a musu tyari ensrefi.+
25 Wan reti-ati sma abi nofo fu kan nyan en bere furu,+ ma den ogri sma o tan nanga angribere.+
Futuwortu
^ Hebrewtongo: „no e gebroiki en tiki.”
