Odo 19:1-29
19 Wan pôti sma di e tyari ensrefi na wan reti fasi, betre moro+ wan leiman noso wan sma di no abi frustan.+
2 A no bun te wan sma e du sani sondro fu abi sabi.+ A sma di e du sani tumusi esi e sondu.+
3 Na a don fu libisma meki taki den e pori den libi,+ ma toku den ati e bron srefisrefi nanga Yehovah.+
4 Gudu e meki sma kisi furu mati,+ ma a mofinawan e lasi srefi a wán mati di a abi.+
5 Wan falsi kotoigi o kisi en strafu+ èn a sma di e fruteri soso lei o kisi en pai.+
6 Furu sma e du sani fu meki heihei sma feni den bun+ èn ala sma na mati fu den wan di e prati kado.+
7 Den brada fu wan pôtiman no lobi en.+ We, den bunbun mati fu en libi moro takru nanga en!+ A e pruberi fu taki nanga den, ma nowan fu den wani arki en.+
8 A sma di e kon abi wan koni ati+ lobi ensrefi. A sma di e du muiti ala ten fu si sani krin o feni bun.+
9 Wan falsi kotoigi o kisi en strafu+ èn a sma di e fruteri soso lei o dede.+
10 Efu a no fiti taki don sma abi furu gudu,+ dan a no fiti kwetikweti taki wan futuboi e tiri granman.+
11 Koni fu man si sani krin e meki taki wan man en ati no e bron esi+ èn a moi te wan sma no e prakseri den fowtu fu trawan moro.+
12 Na atibron fu wan kownu de leki a babari fu wan yongu lew,+ ma a bun fu en de leki dow na tapu grasi.+
13 Wan manpikin di no abi frustan e gi en papa soso problema.+ Te wan wefi e meki trobi, dan a de leki wan daki di e leki èn di e meki taki sma wani gowe libi na oso.+
14 Den sani di papa e libi na baka gi den pikin fu den na wan oso nanga gudu,+ ma wan koni wefi na san Yehovah e gi wan man.+
15 Lesi e meki wan sma fadon na ini wan dipi sribi+ èn angri o kiri wan lesiman.+
16 A sma di e hori den komando fu Gado no o lasi en libi.+ Ma sma o kiri a wan di no e broko en ede nanga a fasi fa a e libi.+
17 A sma di e du bun gi den mofinawan e leni Yehovah+ èn A o pai a sma dati baka gi den bun di a du.+
18 Piri-ai gi a manpikin fu yu te na okasi de ete.+ No winsi dede gi en.+
19 A sma di e kisi bigi atibron musu butu gi dati,+ bika efu yu ben o pruberi fu yepi en, dan yu o abi fu du dati ibri tron baka.+
20 Arki rai èn teki piri-ai,+ so taki yu kan tron wan koni sma bakaten.+
21 Furu sani de di sma abi na prakseri fu du,+ ma san Yehovah abi na prakseri, na dati o kon tru.+
22 San moi na libisma na a lobi di den abi gi trawan.+ Wan pôti sma betre moro wan leiman.+
23 Bigi lespeki gi Yehovah kan meki wan sma kisi libi.+ A o pasa a neti bun+ èn ogri no o miti en.+
24 A lesiman poti en anu na ini a komki nanga nyanyan.+ A lesi srefi fu tyari en anu go na en mofo.+
25 Yu musu naki a spotuman,+ so taki a sma sondro ondrofeni kan kisi koni.+ Piri-ai gi a sma di abi frustan, so taki a kan kisi sabi.+
26 Wan manpikin di e libi takru nanga en papa èn di e yagi en mama+ e du wan syen sani èn a e gi den porinen.+
27 Mi manpikin, efu yu no wani arki moro te sma e bari yu, dan yu o drai baka gi koni rai.+
28 Wan wisiwasi kotoigi no abi lespeki gi retidu+ èn a mofo fu den ogri sma e swari ogridu.+
29 Spotuman o kisi strafu+ èn sma di no abi frustan o kisi fonfon.+
