Odo 26:1-28
26 Leki fa snew no e fadon na ini a waran ten fu a yari èn leki fa alen no e fadon na ini a kotiten,+ na so a no fiti taki wan don sma e kisi glori.+
2 Leki fa wan fowru no e lowe fu soso èn leki fa wan zwaluw-fowru no e frei gowe fu soso, na so sma no e fluku wan trawan fu soso.+
3 Wan wipi na fu naki wan asi,+ wan titei na fu poti na ini a mofo+ fu wan buriki èn wan tiki na fu naki den don sma na tapu den baka.+
4 No piki wan don sma na a srefi don fasi fu en, noso yu o kon de neleki en.+
5 Piki wan don sma na a srefi don fasi fu en, so taki a no denki taki a koni.+
6 Te wan sma e meki wan don sma luku den afersi fu en, dan a de leki wan sma di e malengri en eigi futu noso leki wan sma di e gi ensrefi mankeri.+
7 Leki fa den futu fu wan malengri sma e seki te a musu tyari watra, na so wan odo de na ini a mofo fu wan don sma.+
8 Leki fa wan sma e kibri wan ston na ini wan ston-ipi, na so wan sma de di e gi glori na wan donman.+
9 Leki fa wan makabusi de na ini na anu fu wan drunguman, na so a de tu te wan don sma e taki wan odo.+
10 Leki fa wan sma di sabi sutu bo e sutu peiri go na tapu ala sani, na so wan sma de di e yuru donman+ noso iniwan sma di e waka pasa fu kon wroko gi en.
11 Leki fa wan dagu e drai go baka fu nyan en eigi brâk, na so wan donman e du den don sani fu en ala leisi baka.+
12 Yu si wan man di denki taki a koni?+ Moro howpu de gi wan donman,+ leki gi a sma dati.
13 A lesiman taki: „Wan yongu lew de na tapu a pasi. Wan lew de na den pren.”+
14 Wan doro e drai na tapu en doropen èn wan lesiman e drai na tapu en bedi.+
15 A lesiman poti en anu na ini a komki nanga nyanyan. A weri tumusi fu tyari en anu go na en mofo.+
16 Wan lesiman denki taki a koni+ moro seibi sma di e gi wan koni piki.
17 Leki wan sma di e grabu den yesi fu wan dagu hori, na so wan sma de di e waka pasa èn e kisi bigi atibron fu wan trobi ede di no de fu en.+
18 Leki fa wan lawman e sutu faya peiri+ èn e tyari dede kon,
19 na so wan man de di e bedrigi wan trawan èn di e taki: „A no prisiri mi ben e prisiri?”+
20 Pe udu no de wan faya e dede. Pe ogri-ati leiman no de trobi e kon kowru.+
21 Leki fa krofaya nanga udu e meki taki wan faya e kon moro bigi, na so wan man di lobi haritaki+ kan meki trobi kon moro bigi.
22 Den tori di wan ogri-ati leiman e taki, de leki sani di sma e swari fu di den gridi. Den sani dati e saka go te na wan sma inibere.+
23 Leki solfru na tapu wan pisi prapi fu wan patu-bakriman, na so a sma de di e taki switi, ma di abi wan takru ati.+
24 Wan feanti e taki na so wan fasi, taki sma no man kon sabi suma a de trutru, ma en ati lai nanga triki.+
25 Awinsi a e taki na wan switi fasi+ no bribi en,+ bika seibi sortu ogri prakseri+ de na ini en ati.
26 Wan sma e kori trawan fu no meki sma kon sabi taki a abi bita-ati. Ma a takru fasi fu en o kon na krin na mindri den sma di kon makandra.+
27 A sma di e diki wan olo gi wan trawan, ensrefi o fadon go na ini.+ A sma di e lolo wan ston gowe, a ston o lolo kon baka na en.+
28 Wan sma di e taki lei no lobi a sma di a hati nanga den lei fu en.+ Wan sma di e taki sani fu kori trawan e pori sma libi.+
