Odo 4:1-27
4 Mi manpikin, arki a leri di wan papa e gi unu.+ Poti prakseri, so taki unu kan kon abi frustan,+
2 bika mi o gi unu bun leri.+ No libi a wèt fu mi.+
3 Mi ben de wan trutru manpikin gi mi papa.+ Mi mama ben lobi mi, neleki mi ben de en wan-enkri pikin.+
4 Doronomo mi papa ben e gi mi leri+ èn a ben e taigi mi: „San mi taigi yu, yu musu kibri dipi na ini yu ati.+ Hori den komando fu mi, dan yu o tan na libi.+
5 Kisi koni.+ Kisi frustan.+ No frigiti den sani di mi taki èn no drai baka gi den.+
6 No gowe libi koni, dan a o luku yu. Lobi en, dan a o kibri yu.
7 Koni na a moro prenspari sani.+ Kisi koni. Awinsi sortu tra sani yu e suku fu kisi, sorgu taki yu e meki muiti fu kisi frustan.+
8 Si koni leki wan sani di prenspari srefisrefi, dan a o hei yu.+ A o gi yu glori, fu di yu brasa en hori.+
9 A o kon de leki wan moi kransi na tapu yu ede.+ A o kon de gi yu leki wan moi kroon.”+
10 Mi manpikin, arki mi èn teki den sani di mi e taki.+ Dan yu o libi langa.+
11 Mi o leri yu fa fu waka nanga koni.+ Mi o sori yu fa fu du sani nanga wan krin ati.+
12 Te yu e waka, nowan sani o tapu yu+ èn te yu e lon, yu no o naki yu futu.+
13 Teki a piri-ai di yu kisi,+ grabu en hori steifi. No lusu en.+ Kibri en bun, bika na dati o gi yu libi.+
14 No go waka a pasi fu den ogri sma+ èn no waka langalanga go teki a pasi fu den sma di e du soso takru.+
15 Tan farawe fu a pasi dati.+ No waka na en tapu.+ No teki a pasi dati. Waka go doro,+
16 bika den ogri sma no e sribi, solanga den no du ogri.+ Den e tan na ai, solanga den no meki wan sma naki futu,+
17 bika ogridu nanga ala sortu ogri-ati sani+ de leki brede nanga win gi den.+
18 Ma a pasi fu den reti-ati sma de leki a leti di e bigin skèin na musudei. Safrisafri a e kon moro krin, teleki a de leki a brenki leti fu son na mindridei.+
19 A pasi fu den ogri sma dungru.+ Den no sabi na sortu sani den e naki den futu ala yuru.+
20 Mi manpikin, poti prakseri na den sani di mi e taki.+ Poti yesi arki den.+
21 No frigiti den.+ Kibri den dipi na ini yu ati,+
22 bika den e gi libi na ala den sma di e feni den+ èn den e meki a heri skin de gosontu.+
23 Kibri yu ati, moro iniwan sani di de fu kibri,+ bika na drape den rutu fu a libi de.+
24 Noiti yu musu taki lei nanga yu mofo+ èn no taki nowan sani fu bedrigi trawan.+
25 Den ai fu yu musu luku langalanga+ go na fesi. Yu eigi brenki ai musu luku go na fesi nomo.+
26 Grati a pasi pe yu e poti yu futu+ èn waka sondro fu degedege.+
27 No beni go na a reti-anusei noso na a kruktu-anusei.+ Puru yu futu na a pasi fu ogridu.+
