Psalm 45:1-17
Gi a fesiman fu den pokuman. Gi den „Leilibromki”.* Wan psalm fu den bakapikin fu Korak. Maskil.* Wan singi di e taki fu den lobi uma.
45 Wan tumusi moi tori naki mi ati.+Mi e taki: „A singi disi fu mi abi fu du nanga wan kownu.”+Meki mi tongo de a skrifitiki+ fu wan sekretarsi di sabi du en wroko bun.+
2 Fu tru, yu moi moro ala tra mansma na grontapu.+Den sani di yu e taki nanga yu mofo, e prisiri sma trutru.+Dati meki Gado blesi yu fu ala ten.+
3 Yu di abi makti,+ fasi yu feti-owru+ na yu seibere.Du disi na wan warti fasi èn nanga glori.+
4 Yu abi glori. Sobun, go wini den feanti fu yu.+Rèi yu asi èn feti gi sani di tru, gi den sma di abi sakafasi èn gi retidu.+Nanga yu reti-anu yu o du sani di o meki sma kisi bigi lespeki gi yu.+
5 Mi Kownu, den srapu peiri fu yu e boro go na ini na ati fu den feanti fu yu.+Doronomo sma e fadon dede na yu futusei.+
6 Gado na yu kownusturu fu ala ten, iya, fu têgo.+Nanga a kownutiki fu yu kownumakti, yu e tiri na wan reti fasi.+
7 Yu lobi retidu.+ Yu no lobi ogridu kwetikweti.+Dati meki Gado, iya, a Gado fu yu,+ salfu+ yu nanga oli, so taki yu kan prisiri+ moro leki den tra kownu.+
8 Ala den krosi fu yu e smeri leki mirre-oli, aluwe-udu, nanga kasia.+Na ini a bigi kownu-oso di den meki kon moi nanga ivoor,+ sma e prei poku. Te yu e yere a poku disi, yu e prisiri.
9 Den umapikin+ fu den kownu de na mindri den lespeki uma fu yu.Mi Kownu, a moro prenspari uma+ fu yu, e tanapu na yu reti-anusei èn a e weri a gowtu fu Ofir.+
10 Mi umapikin, poti yesi arki èn luku.Frigiti den sma fu yu nanga a famiri fu yu papa.+
11 Dan Kownu o lobi yu fu di yu moi,+Bika en na yu masra.+Sobun, saka kindi boigi gi en.+
12 Na umapikin fu Tirus kon drape tu nanga wan kado.+Den gudu sma di e libi na mindri a pipel, o begi yu fu du bun gi den.+
13 Na umapikin fu Kownu de na ini na oso èn a moi srefisrefi.+Nanga gowtu titei den nai moimoi sani na tapu en krosi.
14 Te den o tyari en go na fesi Kownu, a o weri moi krosi di brei.+Sma e tyari den nyunwenke di e waka na en baka, kon na yu sosrefi.+
15 Ala sma o breiti èn den o de nanga bigi prisiri te den e tyari den nyunwenke kon drape.Dan den o go na ini na oso fu Kownu.
16 Den manpikin+ fu yu o teki a presi fu den afo+ fu yu.Yu o poti den leki tiriman fu heri grontapu.+
17 Fu ala ten mi o fruteri sma san yu du na ini yu nen.+Dati meki furu sma o prèise yu fu ala ten, iya, fu têgo.
Futuwortu
^ Kande disi abi fu du nanga wan pokusani, wan fasi fa sma ben e meki poku, noso nanga a poku srefi, ma sma no sabi san a wani taki trutru.
