Psalm 78:1-72
Wan maskil* fu Asaf.+
78 Mi pipel, mi e begi unu, gi yesi na a wèt fu mi.+Un poti yesi arki den sani di mi e taigi unu.+
2 Mi o opo mi mofo fu taki wan odo.+Mi o fruteri raitori fu owruten+
3 Di wi ben yere, di wi ben sabi kaba,+Èn di wi eigi papa ben fruteri wi.+
4 Wi no e kibri den tori disi gi den pikin fu wi papa.+Srefi den bakapikin di musu kon ete, wi o fruteri den tori disi.+Wi o taki fu den tumusi moi sani di Yehovah du èn fu a fasi fa a sori a krakti fu en.+Wi o taki sosrefi fu den bigi sani di a du.+
5 A gi Yakob* den komando fu en+Èn a poti wan wèt na ini Israel.+A taigi den afo fu wi san den ben musu du,+So taki den ben kan fruteri den pikin fu den, den sani disi.+
6 Na so fasi den bakapikin di musu kon ete, iya, den pikin di musu gebore ete, kan kon sabi den tori dati.+Dan den fu den sei kan fruteri den pikin fu den, den tori disi.+
7 Na a fasi dati den ben kan leri fu frutrow tapu Gado.+Na so den no ben o frigiti den sani di Gado du,+ ma den ben o hori den wèt fu en.+
8 Den no ben musu tron leki den afo fu den,+Wan tranga-ede pipel di ben opo densrefi teige Gado.+A pipel disi no ben sreka den ati fu dini Gado.+Den no ben e gi yesi na Gado nanga den heri ati.+
9 Den srudati fu den Efrayimsma ben abi bo fu sutu peiri.+Ma toku den lon gowe libi a feti.+
10 Den no hori a frubontu fu Gado+Èn den weigri fu gi yesi na a wèt fu en.+
11 Den frigiti den sani di a du+Èn sosrefi den wondru di a meki den si.+
12 Leti na fesi den afo fu den, a ben du bigi wondru+Na ini a kondre Egepte,+ iya, na ini a kontren fu Sowan.+
13 A prati a se na tu fu meki den abra go na a tra sei.+A meki a watra opo tanapu leki wan dan.+
14 A ben e tyari den nanga wan wolku na deiten+Èn na neti a ben e tyari den nanga a leti fu wan bigi faya.+
15 Na ini a sabana a priti bigi ston na tu+Fu meki watra komoto na ini, so taki den ben kan dringi bogobogo. A watra ben furu leki a watra fu se.+
16 A meki watra lon komoto na ini wan bigi stonbergi.+A ben e meki watra fadon kon neleki watra fu liba.+
17 Toku den ben e sondu teige en moro ete.+Den ben e opo densrefi teige a Moro Heiwan di den ben de na ini a drei sabana.+
18 Na so den tesi Gado fu espresi+Di den aksi en fu gi den a nyanyan di den ben wani.+
19 Dati meki den bigin krutu nanga Gado.+Den taki: „Gado o man gi wi nyanyan dyaso na ini a sabana?”+
20 Na en naki na tapu wan bigi ston+Fu meki furu watra, iya, watra fu bigi liba, lon komoto na ini.+Den taki: „A man gi wi brede?+A man gi en pipel nyanyan?”+
21 Na fu dati ede Yehovah kisi bigi atibron di a yere a sani disi.+Nanga faya a strafu Yakob+Èn na atibron fu Gado saka kon na tapu Israel sosrefi,+
22 Bika den no ben bribi Gado.+Den no ben e frutrow taki a ben o frulusu den.+
23 Ne a gi a loktu di ben lai nanga wolku, wan komandoÈn a opo den doro fu hemel srefi.+
24 Dan a meki mana saka kon na den tapu, neleki alen. Na so den ben kan nyan.+Iya, a gi den nyanyan komoto fu hemel.+
25 Libisma nyan a brede fu den wan di tranga moro libisma.+Gado seni so furu nyanyan kon gi den sma disi, taki den ben kan nyan den bere furu.+
26 A meki wan tranga winti fu hemel wai komoto na owstusei+Èn nanga a krakti fu en a meki wan winti wai komoto na zuidsei.+
27 Ne a meki nyanyan saka kon na den tapu. A ben furu leki a fini doti fu gron.+Iya, a meki fowru di e frei, saka kon. Den ben furu leki den aisanti fu se.+
28 Dan a meki den fowru fadon na ini a kampu fu en.+Den ben de lontu den tenti fu en.+
29 Ne a pipel bigin nyan, teleki den no man nyan moro.+San den ben wani, na dati a gi den.+
30 Den no ben puru a lostu fu den wan bun fasi ete,Iya, a nyanyan ben de na ini den mofo ete,+
31 Di Gado en atibron saka kon na den tapu.+A kiri den deki-ati wan di ben de na den mindri.+A meki den yongu man fu Israel fadon dede.
32 Srefi di ala den sani disi pasa nanga den, toku den sondu moro ete.+Den no ben poti bribi na ini den wondru di Gado du.+
33 Sobun, a syatu a libi fu den, so taki a pasa gowe leki wan blo.+Den heri libi langa, teleki den dede, den ben abi furu problema.
34 Ibri leisi te a ben e bigin kiri den, den ben e aksi en fu yepi den.+Den ben e drai kon baka na Gado èn den ben e suku yepi na en.+
35 Den ben kon memre baka taki na Gado ben de a Stonbergi fu den+Èn taki na Gado, a Moro Heiwan, ben de a sma di ben e strafu den wan di ben e du ogri nanga den.+
36 Den ben e suku fu kori en nanga den mofo.+Nanga den tongo den ben e suku fu lei gi en.+
37 Den no gi yesi na en nanga den heri ati.+Den no hori a frubontu fu en.+
38 Toku a ben e sari den.+ A ben e tapu den sondu+ èn a no ben e kiri den alamala.+Someni leisi a meki na atibron fu en kon saka baka+Èn en ati no ben faya pasa marki.
39 A ben e hori na prakseri taki den na libisma nomo+Èn taki te den blo koti, a libi fu den kaba.+
40 Ibri tron baka den opo densrefi teige en na ini a sabana.+Den ben e hati en di den ben de na ini a sabana!+
41 Doronomo den ben e tesi Gado.+Den ben e meki a Santawan fu Israel firi sari.+
42 Den no memre a fasi fa a yepi den+Na a ten di a frulusu den puru na a anu fu den feanti.+
43 Den no memre den bigi sani di a du na ini Egepte+Nanga den wondru di a du na ini a kontren fu Sowan.+
44 Den no memre fa a kenki a watra fu den kriki fu Nijl-liba kon tron brudu.+Dati meki den no ben man dringi a watra moro di ben de na ini den liba fu den.+
45 Ne a seni kawfrei kon na den tapu fu nyan den.+A seni todo tu fu pori a kondre fu den.+
46 A meki kakalaka nyan den sani di ben e gro na den gron fu denÈn a meki sprenka nyan ala den sani di den ben prani nanga bun furu muiti.+
47 A meki pisipisi ijs fadon komoto na loktu fu kiri den droifibon fu den.+Iya, nanga pisipisi ijs a kiri den figabon fu den.+
48 A meki pisipisi ijs fadon na tapu den meti di ben e tyari lai. Na so a kiri den.+A meki hebi korsu naki den meti fu den, so taki den dede.
49 Ne a meki den firi a bigi atibron fu en.+A mandi srefisrefi nanga den. A krutu den èn a pina den.+Iya, a seni engel kon fu tyari rampu kon na den tapu.+
50 A sreka sani fu sori na atibron fu en.+A no kibri den fu den no dede.A kiri den nanga takru siki.+
51 Te fu kaba a kiri ala den fosi pikin na ini Egepte,+Den fosiwan di gebore na ini den tenti fu Kam.+
52 Bakaten a meki en pipel komoto gowe neleki wan ipi skapu.+Di den ben de na ini a sabana, a tyari den neleki fa wan sma e tyari wan bigi grupu meti.+
53 A heri pisi ten di a tyari den, ogri no ben e miti den èn den no ben e frede noti.+A watra fu se tapu den feanti fu den.+
54 Ne a tyari den go na a santa kondre fu en+Èn a teki a bergikontren disi abra nanga a makti fu en.+
55 Na fu den ede a bigin yagi den tra pipel komoto na ini a kondre.+Nanga wan titei a marki a kondre fu prati en gi en pipel,+So taki den lo fu Israel ben kan abi den eigi oso fu libi na ini.+
56 Ne den bigin tesi a Moro Hei Gado, iya, den ben e opo densrefi teige en.+Den no ben e hori den komando fu en.+
57 Ibri tron den ben e drai baka gi en èn neleki den afo fu den, den no tan gi yesi na en.+Neleki fa sma no man frutrow tapu wan bo di no span bun, na so sma no ben man frutrow tapu den.+
58 Doronomo den ben meki Gado ati kon bron nanga den, fu di den bow hei presi fu go anbegi falsi gado.+Den meki popki fu anbegi den, so taki den meki Gado dyarusu doronomo.+
59 Gado kon sabi san den ben e du+ èn a kisi bigi atibron.+Dati meki a ben tegu srefisrefi gi Israel.+
60 Te fu kaba a gowe libi a tabernakel di ben de na Silo.+Dati na a tenti pe a ben e tan di a ben de nanga libisma.+
61 A meki sma tyari a sani gowe di ben e prenki a krakti fu en.+Iya, en feanti tyari a sani gowe di ben e prenki a glori fu en.+
62 Doronomo a ben meki sma kon feti nanga a pipel fu en.+Iya, a kisi bigi atibron nanga a pipel fu en.+
63 A meki faya bron den yongu man fu en.Sma no ben e prèise den nyunwenke fu en.+
64 Sma kiri den priester fu en nanga feti-owru+Èn di den dede, den wefi fu den no krei gi den.+
65 Ne Yehovah wiki, neleki na sribi a ben e sribi.+Iya, neleki wan tranga man di e kisi ensrefi, baka di a dringi furu win.+
66 Di den feanti fu en lon gowe, a hari go na den baka fu kiri den.+Na so a meki den kisi syen fu ala ten.+
67 A drai baka gi den bakapikin fu Yosef+Èn a no ben wani a lo fu Efrayim moro.+
68 Ma a teki a lo fu Yuda.+Iya, a teki Sion-bergi di a ben lobi.+
69 Ne a bigin bow a santa presi fu en. A poti en hei neleki den bergi,+Neleki a grontapu di a poti steifi fu ala ten.+
70 A teki David leki futuboi.+A puru en na den skapupen.+
71 Fosi, David ben e luku umaskapu di ben abi pikin na bobi.+Ma Gado puru en fu a wroko disi fu tron wan skapuman fu Yakob, a pipel fu Gado+Èn wan skapuman fu Israel di de a gudu fu en.+
72 Ne David bigin tiri a pipel nanga wan krin ati.+A bigin tiri den na wan koni fasi.+
