Romesma 5:1-21
5 Fu dati ede, now di Gado e si wi leki reti-ati sma fu di wi abi bribi,+ meki wi de bun+ nanga Gado nanga yepi fu wi Masra Yesus Krestes.
2 Nanga yepi fu en èn fu di wi abi bribi, meki wi kisi na okasi tu fu kon krosibei+ na Gado fu a sori wi bun-ati, soleki fa wi e si nownow kaba. Meki wi prisiri, bika wi abi a howpu+ fu kisi a glori fu Gado.
3 Ma a no dati wawan. Wi musu prisiri tu te wi de na ini banawtu,+ bika wi sabi taki banawtu o meki wi horidoro.+
4 Te wi e horidoro, dan Gado o feni wi bun.+ Te Gado feni wi bun, dan wi o abi howpu.+
5 A howpu dati no o meki wi lasi-ati,+ bika Gado poti a lobi fu en+ na ini wi ati+ nanga yepi fu a santa yeye+ di a gi wi.
6 Fu tru, di wi no ben man yepi wisrefi,+ Krestes dede gi sondari na a reti ten.+
7 A no makriki fu feni wan sma di ben o dede gi wan sma di e du san reti.+ Ma kande wan sma ben o wani dede gi wan bun sma+ ete.+
8 Toku Gado sori wi taki a lobi+ wi fu di a meki Krestes dede gi wi, aladi wi ben de sondari ete.+
9 We, fu di a brudu fu Krestes meki taki Gado e si wi leki reti-ati sma,+ wi kan de moro seiker taki nanga yepi fu en wi sa kisi frulusu fu a bigi atibron fu Gado.+
10 Bika efu a dede fu Gado en Manpikin meki taki wi kon bun baka nanga Gado,+ aladi wi ben de feanti,+ dan wi kan de seiker taki now di wi kon bun baka nanga Gado, wi o kisi frulusu nanga yepi fu a libi fu en Manpikin.+
11 Ma a no dati wawan. Wi e prisiri tu, fu di wi kon bun nanga Gado nanga yepi fu wi Masra Yesus Krestes. Na en yepi wi fu kon bun baka nanga Gado.+
12 Sobun, wán man+ meki sondu kon na grontapu èn sondu tyari dede+ kon. Dati meki ala sma e dede, bika den alamala sondu.+
13 Bika sondu ben de kaba na grontapu bifo a Wèt kon. Ma efu wèt no de, dan sma no man kisi strafu fu sondu.+
14 Ma toku dede tiri leki kownu sensi a ten fu Adam teleki a ten fu Moses.+ A tiri srefi den sma di no du a srefi sondu leki Adam+ di gersi a sma di ben musu kon ete.+
15 A kado di Gado gi sma, no de a srefi leki a sondu. Furu sma dede fu di wán man sondu. Ma a bun-ati fu Gado nanga a kado di a gi sma, tyari moro wini gi furu sma. A kado di Gado gi sma makandra nanga a bun-ati, a gi nanga yepi fu wán man,+ Yesus Krestes.+
16 Sosrefi, a kado+ di Gado gi sma, no de a srefi leki den bakapisi fu a sondu fu wán man.+ Bika wán sondu tyari strafu+ kon gi ala sma.+ Ma baka di furu sma sondu Gado gi den wan kado. Disi meki taki Gado e si furu sma leki reti-ati sma.+
17 We, efu a sondu fu wan man+ meki taki dede tiri wi leki kownu,+ dan wi kan de seiker taki sma o libi èn tiri leki kownu+ nanga yepi fu wán man, Yesus Krestes.+ Disi de so, fu di den kisi wini fu a bigi bun-ati+ fu Gado nanga a kado+ di e meki taki a e si den leki reti-ati sma.
18 We dan, neleki fa wán sondu nomo meki taki ala sortu sma kisi strafu,+ na so wán reti sani+ di wán sma du meki taki Gado e si ala sortu sma+ leki reti-ati sma, so taki den kan kisi libi.+
19 Neleki fa furu sma+ tron sondari fu di a wán man dati trangayesi Gado, na so furu sma+ o tron reti-ati sma+ fu di wán sma gi yesi+ na Gado.
20 Now a Wèt+ kon fu tyari kon na krin taki sma e du moro sondu.+ Ma efu sma e du furu sondu,+ dan Gado e sori moro bun-ati.+
21 Fu san ede? We, neleki fa sondu nanga dede tiri leki kownu,+ na so a bun-ati+ fu Gado o tiri leki kownu tu, so taki sma kan tron reti-ati sma. Na so fasi sma kan kisi têgo libi+ nanga yepi fu wi Masra Yesus Krestes.
