A fosi brifi gi den Korentesma 7:1-40
7 Now mi wani taki fu den sani di unu skrifi mi. A bun te wan man no e fasi wan uma.
2 Ma fu di hurudu de na ala sei, meki ibri man musu abi en eigi wefi èn ibri uma musu abi en eigi masra.
3 Meki a masra gi en wefi san a abi reti na tapu, èn meki a wefi du a srefi tu gi en masra.
4 A wefi a no basi fu en eigi skin, ma na en masra. Na so a masra a no basi fu en eigi skin, ma na en wefi.
5 No weigri fu gi makandra san unu abi reti na tapu, boiti efu unu ala tu agri fu du dati fu wan pisi ten, so taki unu kan teki ten fu begi. Dan un musu kon makandra baka so taki Satan no tesi unu fu di unu no man dwengi unsrefi.
6 Ma na wan rai mi e gi unu fu du dati, a no wan komando.
7 Mi winsi taki ala sma ben de leki mi. Ma Gado meki ala sma tra fasi. Dati meki a wan sma man du disi, èn a trawan man du dati.
8 Now mi e taigi den sma di no trow èn den uma di den masra dede kaba, taki a bun efu den tan leki mi.
9 Ma efu den no man hori densrefi, dan meki den trow, bika a moro bun fu trow leki fu meki tranga lostu moro den.
10 A rai di mi wani gi den sma di trow, na taki wan wefi no musu prati fu en masra. A no mi e gi a rai dati, ma na Masra.
11 Ma efu toku a e prati fu en masra, dan a musu tan sondro masra, noso a musu meki en bun baka nanga en masra. Wan masra no musu gowe libi en wefi tu.
12 Mi wani taigi den trawan wan sani tu. A no Masra e taki en, ma na mi. Efu wan brada abi wan wefi di no de na bribi èn efu a wefi wani tan nanga en, dan a brada no musu gowe libi en.
13 Efu wan uma abi wan masra di no de na bribi èn efu a masra wani tan nanga en, dan na uma no musu gowe libi en masra.
14 Bika a masra di no de na bribi, kon santa fu di en wefi de na bribi, èn a wefi di no de na bribi, kon santa fu di en masra de na bribi. Efu dati no ben de so, dan den pikin fu unu no ben o krin. Ma now den santa.
15 Ma efu a patna di no de na bribi wani gowe, dan meki a gowe. Te dati pasa, dan wan brada noso wan sisa no de fruplekti fu tan nanga en patna. Gado wani taki un musu libi na ini freide.
16 Wefi, yu sabi efu yu o man frulusu yu masra? Masra, yu sabi efu yu o man frulusu yu wefi?
17 Na a ten di Yehovah kari unu, un alamala ben de soleki fa a ben gi unu pasi fu de. Meki ibriwan fu unu tan so. Na disi mi e taigi den sma fu ala den gemeente fu du.
18 A de so taki wan sma ben besnèi kaba di Gado kari en? Meki a tan wan sma di besnèi. A de so taki wan sma no ben besnèi di Gado kari en? Meki a no besnèi.
19 A no wani taki noti efu wan sma besnèi noso efu a no besnèi. San e teri, na te wan sma e hori den komando fu Gado.
20 Meki ibriwan sma tan libi a libi di Gado ben gi en fosi a kari en.
21 Yu ben de wan srafu di Gado kari yu? No broko yu ede nanga dati. Ma efu yu kan kon fri, dan yu musu teki na okasi dati.
22 Bika iniwan dinari fu Masra di ben de wan srafu di a kisi a kari, kon fri èn a de fu Masra. Na so a de tu taki wan sma di ben fri di a kisi a kari, na wan srafu fu Krestes.
23 Gado pai gi unu di a bai unu. No tron srafu fu libisma moro.
24 Brada, meki ibriwan sma tan libi a libi di Gado ben gi en fosi a kari en, èn meki a tan krosibei fu Gado.
25 Mi no abi wan komando fu Masra gi den sma di no trow,* ma mi o taki san mi e denki. Unu kan frutrow mi, fu di Masra sori sari-ati gi mi.
26 Fu dati ede, mi denki taki a bun efu wan sma e tan soleki fa a de, fu di wi de na ini muilek ten.
27 Yu abi wan wefi? No suku fu prati nanga en. Yu no abi wan wefi moro? No suku wan wefi.
28 Ma srefi efu yu ben o trow, dan yu no du sondu. Efu wan sma di no trow, ben o trow, dan a no du sondu. Ma den wan di e trow o kisi banawtu na ini den libi. Ma mi no wani meki den sani dati miti unu.
29 Boiti dati, brada, mi e taigi unu taki a ten di tan abra kon syatu. Meki den wan di abi wefi, de now leki den no abi wefi.
30 Meki den wan di e krei, de leki sma di no e krei, èn meki den wan di e prisiri, de leki sma di no e prisiri. Meki den wan di e bai sani, de leki sma di no abi noti,
31 èn meki den wan di e gebroiki den sani fu grontapu, de leki sma di no e gebroiki den sani fu grontapu dorodoro. Bika sani na grontapu e kenki.
32 Iya, mi no wani taki unu musu abi broko-ede. A man di no trow e broko en ede nanga den sani fu Masra, fu di a wani taki Masra feni en bun.
33 Ma a man di trow e broko en ede nanga den sani fu grontapu, fu di a wani plisi en wefi
34 èn a no man poti prakseri na wán sani nomo. Sosrefi, na uma di no trow èn a nyunwenke, e broko den ede nanga den sani fu Masra, so taki a skin nanga a denki fu den kan de santa. Ma na uma di trow e broko en ede nanga den sani fu grontapu, fu di a wani plisi en masra.
35 Mi e taki a sani disi fu un eigi bun, èn a no fu tapu unu fu du son sani. Na presi fu dati, mi wani gi unu deki-ati fu du san fiti èn fu dini Masra doronomo sondro taki sani puru un prakseri.
36 Ma efu wan sma di no trow feni taki a e tyari ensrefi na wan fasi di no fiti wan sma di no trow èn efu a no yongu tumusi, dan meki a trow efu dati na san a wani. A no wan sondu a e du. Meki den trow.
37 Ma efu wan sma bosroiti na ini en ati fu no trow èn a e tan hori ensrefi na a bosroiti dati, fu di a no e feni en fanowdu fu trow èn a man dwengi ensrefi, dan a e du bun.
38 Sobun, a sma di trow, e du bun, ma a sma di no trow, o du moro bun.
39 Wan wefi musu tan na en masra solanga en masra de na libi. Ma efu en masra dede, dan a fri fu trow nanga suma a wani, ma a musu trow soso nanga wan sma di de wan bakaman fu Masra.
40 Ma mi denki taki a o de moro koloku efu a tan soleki fa a de. Mi denki taki mi abi a yeye fu Gado tu.
Futuwortu
^ Na ini Grikitongo disi wani taki „sma di no abi seks ete”.
