A fosi Kroniki 10:1-14
10 Now den Filisteasma go feti nanga Israel. Ne den man fu Israel lowe gi den Filisteasma, ma den Filisteasma kiri furu fu den Israelsma na Gilbowa-bergi.
2 Den Filisteasma tan lon na baka Saul nanga den manpikin fu en, teleki den doro krosibei fu den. Ne den kiri Yonatan, Abinadab, nanga Malkisuwa, den manpikin fu Saul.
3 A feti ben kon hebi gi Saul. Den man di ben e sutu nanga bo, tan sutu teleki wan peiri kisi en. Na so den gi en mankeri.
4 Dati meki Saul taigi en futuboi di ben e syow den fetisani fu en: „Teki yu feti-owru, dan yu dyuku mi kiri, bika mi no wani taki den man disi di no besnèi, kon pina mi.” Ma Saul en futuboi no ben wani kiri en, fu di a ben frede srefisrefi. Ne Saul teki a feti-owru èn a trowe ensrefi na tapu.
5 Di a futuboi si taki Saul dede, dan ensrefi teki en feti-owru, a trowe ensrefi na tapu èn a dede.
6 Na so Saul dede makandra nanga den dri manpikin fu en èn ala den sma fu en osofamiri di ben de nanga en.
7 Ne den Israelsma na ini a lagipresi kon si taki a legre fu Israel lowe èn taki Saul nanga den manpikin fu en dede. Dati meki den bigin lowe komoto na ini den foto fu den tu. Baka dati den Filisteasma go tan na ini den foto dati.
8 A tra dei di den Filisteasma kon teki den sani fu den sma di den kiri, den si den dedeskin fu Saul nanga den manpikin fu en na Gilbowa-bergi.
9 Ne den puru ala sani na en skin, den koti en ede puru, den teki den fetisani fu en, dan den seni boskopu go na ala sei fu a kondre fu den Filisteasma. Den seni boskopu go na den falsi gado fu den èn na a pipel, fu fruteri den san pasa.
10 Te fu kaba den poti den fetisani fu Saul na ini a tempel fu a gado fu den. Dan den fasi en edekrabasi na a tempel fu Dagon.
11 Na so den sma fu Yabes na Gilead kon yere ala den sani di den Filisteasma du nanga Saul.
12 Ne ala den deki-ati man opo, den teki a dedeskin fu Saul nanga a di fu den manpikin fu en, dan den tyari den go na Yabes. Baka dati den beri den bonyo fu den na ondro a bigi bon na Yabes. Seibi dei langa den man no nyan noti, fu di den ben e row gi den.
13 Na so Saul dede, fu di a trangayesi Yehovah krinkrin di a no du san Yehovah ben taigi en fu du èn fu di a go aksi wan bonuman rai.
14 Saul no ben go aksi Yehovah san fu du. Dati meki Gado kiri en, dan a poti David, a manpikin fu Isai, leki kownu na presi fu en.
