A fosi Kroniki 12:1-40
12 David ben de na Siklak na a ten di Saul, a manpikin fu Kes, ben e meki taki David no ben man go pe a wani. Ne sma kon na en drape. Den tranga man di kon na en ben de na ini a grupu di ben yepi David fu feti.
2 Den man disi ben e waka nanga bo. Nanga den reti-anu èn nanga den kruktu-anu den ben man slenger ston noso sutu peiri nanga wan bo. Den ben de fu a lo fu Benyamin neleki Saul.
3 Ahiyeiser ben de na edeman fu den. Boiti dati, yu ben abi Yoas, di ben de a manpikin fu Sema, wan Gibeyasma. Yu ben abi sosrefi Yesiyel nanga Pelet. Den man disi ben de manpikin fu Asmafet. Dan yu ben abi Beraka, Yehu fu a foto Anatot,
4 nanga Yismaya, wan man fu Gibeon. En ben de wan fu den dritenti tranga fesiman. A ben de edeman tu fu dritenti srudati. Dan yu ben abi Yeremia, Yahasiyel, Yohanan, nanga Yosabad, wan man fu a foto Geidera.
5 Boiti dati, yu ben abi Elusai, Yerimot, Beyalia, Semaria, Sefatya, di ben de wan bakapikin fu Harif,
6 Elkana, Yisia, Asarel, Yoweiser, nanga Yasobam. Den man disi ben de bakapikin fu Korak.
7 Yu ben abi sosrefi Yowela nanga Sebadya, di ben de manpikin fu Yeroham, wan man fu Geidor.
8 Di David ben de na ini a sabana na wan presi pe sma no ben man doro so makriki, wan tu fu den Gadsma ben teki a sei fu en. Den ben de tranga, deki-ati srudati di ben abi bigi skelt nanga lansri. Ala ten den ben seti den fetisani disi na so wan fasi, taki den ben de srekasreka fu go feti. Den ben abi deki-ati leki lew èn den ben man lon leki den dia di de na tapu den bergi.
9 Eser ben de a moro bun wan fu den, a di fu tu ben de Obadya, a di fu dri ben de Eliab,
10 a di fu fo ben de Mismana, a di fu feifi ben de Yeremia,
11 a di fu siksi ben de Atai, a di fu seibi ben de Eliyel,
12 a di fu aiti ben de Yohanan, a di fu neigi ben de Elsabad,
13 a di fu tin ben de Yeremia èn a di fu erfu ben de Makbanai.
14 Ala den man disi ben de den bakapikin fu Gad di ben de legre-edeman. A moro swakiwan fu den man disi ben o man feti nanga wán hondro sma èn a moro trangawan ben o man feti nanga wán dusun sma.
15 Na den man disi abra Yordan-liba na ini a fosi mun, na a ten di a liba ben sungu den syoro. Ne den yagi ala den sma di ben e libi na den lagipresi. Den yagi den go na owstusei èn na west-sei.
16 Wan tu sma fu a lo fu Benyamin èn fu a lo fu Yuda go fu miti David te na wan presi pe sma no man doro so makriki.
17 Ne David hari go miti den. Di a doro na den, a taigi den: „Efu na bun tyari unu kon dyaso, fu di unu wani yepi mi, dan unu o de mi mati. Ma efu unu kon fu tori mi, so taki mi feanti kan kiri mi, aladi mi no du noti, dan meki a Gado fu den afo fu wi ondrosuku a tori èn meki a koti krutu na wi mindri.”
18 Ne a yeye fu Gado kon na tapu Amasai, na edeman fu den dritenti srudati. Dan Amasai taki:„David, wi na fu yu. Manpikin fu Isai, wi e horibaka gi yu.Soso bun wi e winsi yu èn wi e winsi bun tu gi den wan di e yepi yu,Bika na a Gado fu yu yepi yu.”Sobun, David poti den leki edeman fu den srudati fu en.
19 Wan tu srudati fu a lo fu Manase ben drai baka gi Saul fu go yepi David. Na a ten dati David ben e horibaka gi den Filisteasma fu go feti nanga Saul. Ma den kownu fu den Filisteasma, di ben bondru kon na wán, taki nanga makandra fu a tori fu David. Den taki: „Dyonsro a o drai baka gi wi. A o go horibaka gi Saul, a kownu fu en, dan den o kiri wi.” Sobun, den seni David gowe. Dati meki a no kisi na okasi fu yepi den Filisteasma fu feti nanga Saul.
20 Disi na den man fu a lo fu Manase di kon yepi David di a ben de na Siklak: Adna, Yosabad, Yediyael, Mikael, Yosabad, Elihu, nanga Siletai. Ala den man disi ben de edeman fu den grupu fu wán dusun sma na ini a lo fu Manase.
21 Fu di den man disi ben de tranga, deki-ati man, meki den ben kon yepi David fu feti nanga ogri-ati fufuruman. Den man di kon yepi David tron edeman fu a legre.
22 Ibri dei moro nanga moro sma ben e kon fu yepi David, teleki a legre fu en ben kon bigi srefisrefi, neleki a legre fu Gado.
23 Na so den edeman fu den srudati ben kon na David na Hebron. Den ben kon yepi David fu tron kownu na presi fu Saul, soleki fa Yehovah ben taki. Dyaso skrifi nanga omeni den ben de:
24 Na ini a lo fu Yuda yu ben abi siksi dusun aiti hondro man di ben man feti na ini a legre. Den man disi ben e tyari lansri nanga bigi skelt.
25 Na ini a lo fu Simeon yu ben abi seibi dusun wán hondro tranga, deki-ati man di ben man feti na ini a legre.
26 Fo dusun siksi hondro man ben de fu a lo fu Leifi. Den alamala ben e horibaka gi a legre.
27 Yoyada ben de a fesiman fu den bakapikin fu Aron èn dri dusun seibi hondro man ben de nanga en.
28 Boiti dati, yu ben abi Sadok di ben de wan tranga, deki-ati yonkuman. A ben de nanga tutenti na tu fesiman fu a famiri fu en.
29 Dri dusun man ben de fu a lo fu Benyamin. Den ben de famiriman fu Saul. Te na a ten dati furu fu den man disi ben horibaka gi Saul nanga en famiri.
30 Tutenti dusun aiti hondro man ben de fu a lo fu Efrayim. Den ben de tranga, deki-ati man di ben abi barinen èn di ben de famiri-edeman.
31 Tina-aiti dusun man ben de fu na afu lo fu Manase. Den man disi, di den ben kari na den nen, kisi a spesrutu wroko fu poti David leki kownu.
32 Tu hondro man ben de fu a lo fu Isaskar. Den ben de edeman di ben abi a koni fu kan taki san den Israelsma ben musu du èn o ten den ben musu du dati. Ala den famiriman fu den edeman disi ben e du san den ben e taigi den.
33 Feifitenti dusun man ben de fu a lo fu Seibulon. Den man disi ben de srekasreka fu hari go feti èn den ben abi ala sortu fetisani. Den go na David fu horibaka gi en nanga den heri ati.
34 Wán dusun man ben de fesiman fu a lo fu Naftali. Dritenti na seibi dusun man ben de nanga den. Den ben e tyari lansri nanga bigi skelt.
35 Tutenti na aiti dusun siksi hondro man fu a lo fu Dan seti densrefi leki wan legre fu go feti.
36 Fotenti dusun man fu a lo fu Aser ben seti densrefi leki wan legre fu go feti.
37 Wán hondro tutenti dusun man komoto na abrasei fu Yordan-liba. Den ben de fu a lo fu Ruben, a lo fu Gad, nanga na afu lo fu Manase. Den man disi ben abi ala sortu fetisani.
38 Ala den man disi ben de srudati di ben de srekasreka fu go feti leki wan legre. Noti no ben man tapu den fu go na Hebron fu poti David leki kownu fu heri Israel. Ala den tra Israelsma ben wani taki David ben musu tron kownu.
39 Dri dei langa den tan nanga David. Den ben e nyan èn dringi, fu di den man fu Yuda ben sreka sani gi den.
40 Boiti den man fu den lo di ben de na ini a birti fu den, sma fu den lo Isaskar, Seibulon, nanga Naftali srefi tyari nyanyan kon na tapu buriki, kameili, kaw, stonburiki.* Den tyari nyanyan-sani di meki nanga blon, den tyari figakuku, korentikuku, win, nanga oli. Boiti dati, den tyari kaw nanga skapu kon. Den tyari bogobogo fu den sani disi kon, bika bigi prisiri ben de na ini Israel.
Futuwortu
^ Disi na wan pikin fu wan manburiki nanga wan uma-asi.
