A fosi Kroniki 13:1-14
13 Dan David go taki nanga den fesiman fu den grupu fu wán dusun srudati èn den fesiman fu wán hondro srudati èn nanga ibri tra fesiman.
2 Baka dati David taigi ala den Israelsma di ben de drape nanga en: „Efu unu feni en bun èn Yehovah wi Gado, feni en bun, dan meki wi seni boskopu gi den kondreman fu wi di de ete na den tra presi fu Israel. Wi musu seni boskopu tu gi den priester nanga den Leifisma di de na ini den foto èn na den weigron lontu den foto disi. Meki den kon na wi.
3 Dan meki wi tyari a santa kisi fu wi Gado kon dyaso na wi.” David taki disi, fu di sma no ben poti prakseri na a santa kisi na a ten di Saul ben e tiri.
4 Ala den sma di ben de drape, ben agri nanga san David taki. Dati meki den agri fu du san a taki.
5 Ne David seni kari ala Israelsma di ben e libi na ini a kontren na mindri Egepte-liba nanga Hamat. Den ben musu go na Kiriat-Yarim fu teki a santa kisi fu a tru Gado.
6 Dan David nanga ala den tra Israelsma go na Bala, dati na Kiriat-Yarim, di de na ini a kontren fu Yuda. Den teki a santa kisi fu a tru Gado di e sidon na tapu den kerub-engel. Na a santa kisi disi sma e kari a nen fu Yehovah.
7 Ma den poti a santa kisi fu a tru Gado na tapu wan nyun wagi. Ne den tyari en komoto na a oso fu Abinadab. Usa nanga Ahio ben e tyari a wagi.
8 David nanga ala den tra Israelsma ben e meki prisiri na fesi a tru Gado. Den ben e meki bigi prisiri. Den ben e singi èn den ben e prei harpu, tyengretyengre, gengen, trompeti, nanga tra pokusani di gersi harpu.
9 Baka wan pisi ten den doro krosibei fu Kidon na wan presi pe sma e masi aleisi. Di Usa si taki den mankaw ben o meki a santa kisi kanti, dan a langa en anu fu grabu en hori.
10 Ne Yehovah ati kon bron srefisrefi nanga Usa. Dati meki a kiri Usa, fu di Usa ben langa en anu fu hori a santa kisi. Na so Usa dede leti drape na fesi Gado.
11 Di David si taki Yehovah kiri Usa nanga bigi atibron, a mandi. Dati meki sma e kari a presi dati Peres-Usa te na a dei fu tide.
12 A dei dati, David kon frede a tru Gado. A taki: „Fa mi o tyari a santa kisi fu a tru Gado go na pe mi e tan?”
13 Dati meki David no tyari a santa kisi go na a Foto fu David pe a ben e tan. Na presi fu dati a koti komoto na a pasi, dan a tyari a santa kisi go na a oso fu Obed-Edom, wan man fu Gat.
14 Dri mun langa a santa kisi fu a tru Gado tan na ini na oso fu Obed-Edom nanga en osofamiri. A heri pisi ten dati, Yehovah blesi na osofamiri fu Obed-Edom nanga ala den sani di a ben abi.
