A fosi Kroniki 14:1-17
14 Na a ten dati Kownu Hiram fu Tirus seni boskopuman go na David. A seni sedre-udu gi en tu. Boiti dati, a seni man go di sabi bow skotu èn man di sabi wroko nanga udu. Na den man disi ben musu bow wan oso gi David.
2 Na so David kon sabi taki Yehovah ben o meki a tan kownu fu Israel, fu di a ben meki a kownukondre fu David kisi bigi glori fu Israel ede di ben de Gado en pipel.
3 Bakaten di David ben de na Yerusalem a teki moro wefi èn a kisi moro manpikin nanga umapikin.
4 Disi na den nen fu den pikin di a kisi na Yerusalem: Samuwa, Sobab, Natan, Salomo,
5 Yibar, Elisuwa, Elpelet,
6 Noga, Nefek, Yafia,
7 Elisama, Beliada nanga Elifelet.
8 Now den Filisteasma kon yere taki sma salfu David leki kownu fu Israel. Ne ala den Filisteasma kon suku David. Di David yere disi, dan a hari go feti nanga den.
9 Ibri tron baka den Filisteasma ben e kon feti nanga den sma di ben e libi na ini Refayim-lagipresi.
10 Dati meki David aksi Gado san a musu du. A aksi en: „Mi musu go feti nanga den Filisteasma? Yu o meki mi wini den?” Ne Yehovah piki David: „Go feti nanga den. Mi o meki yu wini den.”
11 Sobun, David go na Bâal-Perasim èn a wini den Filisteasma. Dan David taki: „Neleki fa bigi watra e wasi ala sani gowe di de na en pasi, na so a tru Gado gebroiki mi fu figi den feanti fu mi puru.” Dati meki sma kari a presi dati Bâal-Perasim.
12 Ne den Filisteasma gowe libi den gado fu den drape. Dan David gi a komando fu sma bron den gado nanga faya.
13 Bakaten den Filisteasma broko kon na ini a lagipresi ete wan leisi.
14 Dan David aksi Gado ete wan tron san a musu du. Ne a tru Gado taigi en: „No hari go na den baka. Waka lontu den. Kibri na baka a busibusi nanga den bâka-bon. Dan yu musu komoto na ini a busibusi fu go feti nanga den.
15 Yu o yere wan babari e komoto na mindri den bâka-bon. A o gersi leki wan legre e waka kon. Te yu yere a babari disi, dan yu musu lon go feti nanga den wantewante, bika na a ten dati a tru Gado o de na yu fesi e feti nanga a legre fu den Filisteasma.”
16 Ne David du ala sani di a tru Gado taigi en fu du. David nanga den man fu en go kiri ala den srudati fu den Filisteasma, fu Gibeon te go miti Geiser.
17 Na so sma na ini ala kondre, kon sabi suma na David èn Yehovah meki ala den pipel kon frede David.
