A fosi Kroniki 15:1-29
15 David tan bow oso gi ensrefi na ini a Foto fu David. Boiti dati, a sreka wan presi fu poti a santa kisi fu a tru Gado èn a meki wan tenti fu poti en na ini.
2 Ne David taki: „Nowan sma musu tyari a santa kisi fu a tru Gado, boiti den Leifisma, bika Yehovah taki dati na den musu tyari a santa kisi fu Yehovah èn na den a teki fu wroko gi en fu ala ten.”
3 Dan David tyari ala den Israelsma kon na wán na Yerusalem, fu tyari a santa kisi fu Yehovah go poti na a presi di a ben seti gi en.
4 Ne David tyari den bakapikin fu Aron nanga den tra Leifisma kon na wán.
5 Disi na den sma di a tyari kon na wán: Fu den bakapikin fu Keihat a teki Uriyel, di ben de fesiman, nanga tra famiriman fu en. Ala nanga ala wán hondro tutenti sma.
6 Fu den bakapikin fu Merari a teki Asaya, di ben de fesiman, nanga tra famiriman fu en. Ala nanga ala tu hondro tutenti sma.
7 Fu den bakapikin fu Gersom a teki Yoèl, di ben de fesiman, nanga tra famiriman fu en. Ala nanga ala wán hondro dritenti sma.
8 Fu den bakapikin fu Elisafan a teki Semaya, di ben de fesiman, nanga tra famiriman fu en. Ala nanga ala tu hondro sma.
9 Fu den bakapikin fu Hebron a teki Eliyel, di ben de fesiman, nanga tra famiriman fu en. Ala nanga ala aititenti sma.
10 Fu den bakapikin fu Usiyel a teki Aminadab, di ben de fesiman, nanga tra famiriman fu en. Ala nanga ala wán hondro nanga twarfu sma.
11 Boiti dati, David seni kari Priester Sadok nanga Priester Abiatar èn a seni kari Uriyel, Asaya, Yoèl, Semaya, Eliyel, nanga Aminadab tu, di ben de Leifisma.
12 Ne a taigi den: „Luku, unu na den famiri-edeman fu den Leifisma. Unu nanga den tra famiriman fu unu musu sreka unsrefi, so taki unu kan de santa èn un musu tyari a santa kisi fu Yehovah, a Gado fu Israel, go poti na a presi di mi sreka gi en,
13 bika a fosi leisi di unu no ben du dati, Yehovah wi Gado ati bron srefisrefi nanga wi, fu di wi no ben du ala san a ben taigi wi.”
14 Sobun, den priester nanga den Leifisma sreka densrefi fu kan de santa, so taki den ben kan tyari a santa kisi fu Yehovah, a Gado fu Israel.
15 Na so den Leifisma tyari a santa kisi fu a tru Gado gowe, soleki fa Yehovah ben taigi Moses. Den opo a santa kisi na den tiki, dan den syow en na tapu den skowru.
16 Ne David taigi den edeman fu den Leifisma fu poti den tra Leifisma di ben de singiman, fu prei den pokusani disi: harpu, gengen, nanga tra pokusani di gersi harpu. Nanga den heri ati den ben e prei poku, so taki sma ben kan meki prisiri.
17 Na so den Leifisma poti Heiman, Asaf, nanga Etan fu singi èn fu prei poku. Heiman ben de a manpikin fu Yoèl. Asaf ben de a manpikin fu Berekia. Etan ben de a manpikin fu Kusaya èn wan bakapikin fu Merari. Den alamala ben de famiriman.
18 Boiti dati, den famiriman fu den di ben de fu a di fu tu grupu, ben e yepi den. Den man disi ben de Sakaria, Ben, Yasiyel, Semiramot, Yehiyel, Uni, Eliab, Benaya, Maseya, Matitya, Elifele, Mikneya, sosrefi Obed-Edom nanga Yehiyel, di ben de waktiman fu a portu.
19 Den poti den singiman Heiman, Asaf, nanga Etan tu fu prei poku nanga kopro gengen, so taki sma kan yere en.
20 Den poti Sakaria, Asiyel, Semiramot, Yehiyel, Uni, Eliab, Maseya, nanga Benaya fu prei pokusani di gersi harpu èn di den ben seti fu prei hei.*
21 Matitya, Elifele, Mikneya, Obed-Edom, Yehiyel, nanga Asasia ben e prei harpu di den ben seti fu prei lagi.* Den man disi ben de fesiman fu den sma di ben e meki poku.
22 Kenanya ben de wan fesiman fu den Leifisma. A ben e teki fesi te den ben musu tyari a santa kisi èn a ben e sori sma fa fu du dati, fu di a ben sabi du a wroko dati heri bun.
23 Berekia nanga Elkana ben e hori wakti na a santa kisi.
24 Den Leifisma poti den priester Sebanya, Yosafat, Netaneyel, Amasai, Sakaria, Benaya, nanga Eliyeser fu bro den trompeti tranga na fesi a santa kisi fu a tru Gado. Obed-Edom nanga Yehia ben musu hori wakti na a santa kisi.
25 David, den owru man fu Israel, nanga den fesiman fu wán dusun srudati, ben e waka makandra nanga den Leifisma. Den ben e meki prisiri di den go teki a santa kisi fu a frubontu fu Yehovah na a oso fu Obed-Edom.
26 Fu di a tru Gado ben yepi den Leifisma di den ben e tyari a santa kisi fu a frubontu fu Yehovah, meki den tyari seibi yongu mankaw nanga seibi manskapu leki ofrandi.
27 David, den Leifisma di ben e tyari a santa kisi, den singiman, nanga fesiman Kenanya, di ben e teki fesi te den singiman ben e tyari a santa kisi, ben weri dyakti di no abi mow èn di ben meki nanga spesrutu krosi. Ma David ben weri wan fesikoki fu linnen krosi.
28 Na so a pipel fu Israel tyari a santa kisi fu a frubontu fu Yehovah gowe, aladi den ben e bari fu prisiri. Den ben e bro tutu nanga trompeti, den ben e naki gengen èn den ben e prei harpu nanga tra pokusani di gersi harpu, so taki sma kan yere den.
29 Di a santa kisi fu a frubontu fu Yehovah doro a Foto fu David, dan Saul umapikin Mikal ben de na a sodro fu na oso. A ben e tanapu na a fensre e luku go na gron. Dan a si fa Kownu David e dansi èn e dyompodyompo e meki prisiri. Ne Mikal bigin wisiwasi David na ini en ati.
Futuwortu
^ Na ini Hebrewtongo dyaso skrifi „Alamot”. A wortu disi abi fu du nanga poku. Wi no sabi trutru san a wani taki. Kande a abi fu du nanga a fini sten fu yongu uma, noso boi.
^ Na ini Hebrewtongo dyaso skrifi „Syeminit”. Kande a abi fu du nanga pokusani di sma seti fu prei lagi.
