A fosi Kroniki 18:1-17
18 Bakaten David go feti nanga den Filisteasma èn a wini den. A meki den Filisteasma tron futuboi fu en èn a puru a foto Gat na den anu. A teki sosrefi den dorpu krosibei fu a foto disi.
2 Baka dati David go feti nanga den Moabsma. Di a wini den Moabsma, a meki den tron en futuboi èn den ben abi fu pai en belasting-moni.
3 Di Kownu Hadadeiser fu Soba ben de na pasi fu go na Eufraat-liba, fu di a ben wani tiri a pisi kontren dati, dan David hari go feti nanga en na Hamat èn a kiri en.
4 Ne David grabu wán dusun fetiwagi fu Hadadeiser, seibi dusun srudati di e rèi asi èn tutenti dusun srudati di e waka nanga futu, dan a tyari den gowe leki katiboman. Baka dati David koti a bakafutu-titei fu den asi di ben e hari den fetiwagi, ma nanga wán hondro fu den asi, a no du noti.
5 Di den Siriasma fu Damaskus kon yepi Kownu Hadadeiser fu Soba, dan David kiri tutenti na tu dusun srudati fu Siria.
6 Baka dati David poti wan tu grupu srudati na Damaskus na ini Siria. A meki den Siriasma tron en futuboi èn den ben abi fu pai en belasting-moni. Awinsi pe David ben e go, Yehovah tan yepi en.
7 Boiti dati, David teki den lontu gowtu skelt fu den futuboi fu Hadadeiser èn a tyari den skelt disi go na Yerusalem.
8 Na ini Tibat nanga Kun, den foto fu Hadadeiser, David teki bun furu kopro. Dati na a kopro di Salomo teki bakaten fu meki a bigi kopro watrabeki, den pilari, nanga den kopro wrokosani.
9 Now Kownu Towu fu Hamat kon yere taki David kiri a heri legre fu Kownu Hadadeiser fu Soba.
10 Wantewante Towu seni en manpikin Hadoram go na Kownu David fu aksi en fa a e go nanga en èn fu fristeri en taki a wini Hadadeiser. (Hadadeiser nanga Towu ben gwenti feti nanga makandra.) Hadoram tyari ala sortu gowtu sani, solfru sani, nanga kopro sani gi David.
11 Ne Kownu David taki dati ala den sani dati musu de santa sani gi Yehovah, neleki a gowtu nanga a solfru di a ben teki fu den trakondre sma. Dati na den Edomsma, den Moabsma, den Amonsma, den Filisteasma, nanga den Amalèksma.
12 Abisai, a manpikin fu Seruya, ben go feti nanga den Edomsma na ini Sowtu-lagipresi èn a kiri tina-aiti dusun fu den.
13 Ne a poti wan tu grupu srudati na ini Edom èn ala den Edomsma tron futuboi fu David. Na ala sei pe David ben e go, Yehovah tan yepi en.
14 Na so David tiri heri Israel. Ala ten a ben e koti krutu gi en pipel na wan reti fasi.
15 Yoab, a manpikin fu Seruya, ben de legre-edeman. Yosafat, a manpikin fu Ahilud, ben abi a wroko fu skrifi ala sani di ben e pasa na a ten dati.
16 Den priester ben de Sadok, di ben de a manpikin fu Ahitub, nanga Akimeilek, di ben de a manpikin fu Abiatar. Sawsa ben de sekretarsi.
17 Benaya, a manpikin fu Yoyada, ben de edeman fu den Kreitisma nanga den Pleitisma. Den manpikin fu David ben tron edeman tu di ben e wroko gi Kownu.
