A fosi Kroniki 26:1-32
26 Disi ben de den grupu di ben e hori wakti na den portu: Den bakapikin fu Korak di ben e hori wakti na den portu ben de Meselemia, a manpikin fu Korei, wan bakapikin fu Asaf.
2 Meselemia ben abi manpikin. Sakaria ben de a fosiwan. Yediyael ben de a di fu tu. Sebadya ben de a di fu dri. Yatniyel ben de a di fu fo.
3 Elam ben de a di fu feifi. Yohanan ben de a di fu siksi. Elyehowenai ben de a di fu seibi.
4 Obed-Edom ben abi manpikin. Semaya ben de a fosiwan. Yosabad ben de a di fu tu. Yoa ben de a di fu dri. Sakar ben de a di fu fo. Netaneyel ben de a di fu feifi.
5 Amiyel ben de a di fu siksi. Isaskar ben de a di fu seibi. Peyuletai ben de a di fu aiti. Na so Gado ben blesi Obed-Edom.
6 Semaya, a manpikin fu Obed-Edom, ben kisi manpikin. Den ben tron edeman fu den famiri fu den, fu di den ben de tranga man di ben abi ondrofeni.
7 Den manpikin fu Semaya ben de Otni, Refael, Obed, nanga Elsabad. Elsabad ben abi ete tu brada, Elihu nanga Semakia. Den man disi ben abi ondrofeni.
8 Ala den man disi ben de bakapikin fu Obed-Edom. Den nanga den manpikin èn den famiriman fu den, ben de sma di ben abi ondrofeni èn den ben sabi du den wroko bun. Ala nanga ala yu ben abi siksitenti na tu bakapikin fu Obed-Edom.
9 Meselemia ben abi manpikin nanga tra famiriman di ben abi ondrofeni, tina-aiti man.
10 Hosa, di ben de wan bakapikin fu Merari, ben abi manpikin tu. Simri ben de edeman fu den manpikin fu Hosa. Aladi a no ben de a fosi manpikin fu Hosa, toku en papa poti en leki edeman fu a famiri.
11 Helkia ben de a di fu tu manpikin. Tebalia ben de a di fu dri èn Sakaria ben de a di fu fo. Ala nanga ala yu ben abi tinadri manpikin nanga famiriman fu Hosa di ben e wroko leki waktiman.
12 Den edeman fu den waktiman disi nanga den wan di ben e wroko makandra nanga den, ben e du a srefi wroko. Den alamala ben e dini na ini na oso fu Yehovah.
13 Dati meki ibriwan fu den famiri iti lòt, awinsi o bigi den ben de. Na so den kon sabi na sortuwan fu den portu ibri famiri ben o hori wakti.
14 Di den iti lòt, Selemia kisi a wroko fu hori wakti na a portu di de na owstusei. Baka dati den iti lòt fu kon sabi pe Sakaria, a manpikin fu Selemia, ben musu wroko. Na so Sakaria, wan koni raiman, kisi a wroko fu hori wakti na a portu na noordsei.
15 Obed-Edom ben kisi a wroko fu hori wakti na a portu di de na zuidsei èn den manpikin fu en ben e hori wakti na den maksin.
16 Supim nanga Hosa ben kisi a wroko fu hori wakti na a portu di de na west-sei. A portu disi ben de krosibei fu Saleket-portu di ben de na a bigi pasi. Den waktiman ben prati na tu grupu di ben e wroko sei na sei.
17 Siksi man fu a lo fu Leifi ben e hori wakti na owstusei. Ibri dei fo man ben e hori wakti na noordsei èn fo na zuidsei. Tu na tu den ben e hori wakti na den maksin.
18 Na a gadri na west-sei den poti waktiman tu. Fo ben de na a bigi pasi èn tu na a gadri.
19 Na so den prati den waktiman di ben de bakapikin fu Korak èn fu Merari.
20 Fu den Leifisma den teki Ahia fu luku den gudu na ini na oso fu a tru Gado èn den gudu di sma ben meki kon santa.
21 Fu den manpikin fu Ladan, di ben de bakapikin fu Gerson, den teki Yehiyeli. A ben de wan fu den famiri-edeman na ini a famiri fu Ladan, di ben de wan bakapikin fu Gerson tu.
22 Seitam nanga en brada Yoèl ben de manpikin fu Yehiyeli. Na den ben e luku den gudu na ini na oso fu Yehovah.
23 Fu den Amramsma, den Yisharsma, den Hebronsma, nanga den Usiyelsma,
24 den teki Sebuwel leki edeman fu den maksin. A ben de wan bakapikin fu Gersom, a manpikin fu Moses.
25 Fu den famiriman fu Sebuwel, di ben de bakapikin fu Eliyeser, den teki Rehabia, Yesaya, Yoram, Sikri, nanga Selomot. Rehabia ben de a manpikin fu Eliyeser. Yesaya ben de a manpikin fu Rehabia. Yoram ben de a manpikin fu Yesaya. Sikri ben de a manpikin fu Yoram. Selomot ben de a manpikin fu Sikri.
26 Selomot nanga den brada fu en ben e luku den gudu di sma ben meki kon santa. Na Kownu David nanga den famiri-edeman, den fesiman fu dusun srudati èn den fesiman fu hondro srudati, ben meki den gudu disi kon santa.
27 Ibri tron te den ben e go feti, den ben e teki gudu fu den feanti fu den. Den meki wan tu fu den gudu disi kon santa èn den gebroiki den fu sorgu na oso fu Yehovah.
28 Selomit nanga den brada fu en ben e luku ala den sani di Samuel, a man di ben e kisi fisyun, Saul, a manpikin fu Kes, Abner, a manpikin fu Ner, nanga Yoab, a manpikin fu Seruya, ben meki kon santa. Selomit nanga den brada fu en ben e luku iniwan sani sosrefi di tra sma ben meki kon santa.
29 Kenanya nanga den manpikin fu en ben de bakapikin fu Yishar. Den ben e wroko leki fesiman èn krutuman fu Israel. Den ben e wroko dorosei fu na oso fu Gado.
30 Hasabia nanga den famiriman fu en ben de Hebronsma di ben e teki fesi na ini Israel na ini a kontren fu Yordan-liba na west-sei. Drape den wán dusun seibi hondro man disi, di ben abi ondrofeni, ben musu du ala a wroko fu Yehovah èn fu Kownu.
31 Yeria ben de wan Hebronsma. A ben de na edeman fu ala den Hebronsma. Na ini a di fu fotenti yari di David ben e tiri leki kownu, wan tu sma fu David go luku efu den ben man feni tranga, deki-ati Hebronsma. Na so den feni man na ini a foto Yaeser na ini a kontren fu Gilead.
32 Den teki tu dusun seibi hondro famiriman fu Yeria. Den man disi ben abi ondrofeni èn den ben de famiri-edeman. Dati meki Kownu David poti den leki fesiman fu a lo fu Ruben, fu a lo fu Gad èn fu na afu lo fu Manase. Na den ben musu luku den tori fu a tru Gado èn den di fu Kownu.
