A fosi brifi fu Petrus 2:1-25
2 Sobun, tapu nanga ala takrudu èn nanga ala bedrigifasi. No hoigri moro, no dyarusu moro èn no taki nowan ogri moro fu trawan.
2 Neleki fa nyunyun pikin e angri fu dringi soifri merki, na so un musu angri fu a wortu fu Gado, so taki dati kan yepi unu fu gro èn kisi frulusu.
3 Ma dati o pasa soso te unu ondrofeni taki Masra bun.
4 Te unu e kon na en di de wan libilibi ston di libisma no ben wani, ma di Gado teki fu di a warti srefisrefi gi en,
5 dan un alamala makandra di de libilibi ston tu, e kon tron wan oso di a yeye fu Gado ben bow, so taki unu kan de sma di e du wan santa priesterwroko. Na so unu kan tyari ofrandi, fu di Gado en yeye e tiri unu. Disi na ofrandi di Gado e feni bun èn di Yesus Krestes e yepi unu fu tyari,
6 bika Gado Buku taki: „Luku, na Sion mi e poti wan ston di misrefi teki, iya, wan ukuston fu a fondamenti. A prenspari srefisrefi. Nowan sma di e bribi na ini en, o kisi syen.”
7 Fu dati ede a warti trutru gi unu, fu di unu na sma di e bribi. Ma fu den sma di no e bribi, Gado Buku e taki: „A srefi ston di den bowman no ben wani, na dati tron a moro prenspari ukuston”,
8 èn „wan ston di e meki sma stotu den futu èn wan bigi ston di e meki sma fadon”. Den sma disi e stotu den futu, fu di den no e du san a wortu e taki. Iya, na dati na san ben musu pasa nanga den sortu sma disi.
9 Ma unu na „wan spesrutu grupu sma di Gado teki, iya, wan grupu priester di o tiri leki kownu, wan santa pipel, wan pipel di de wan spesrutu gudu. Na so fasi unu kan fruteri na ala sei fu den kefalek moi fasi” fu a sma di kari unu komoto na ini a dungru fu kon na ini en tumusi moi leti,
10 bika fosi, unu no ben de Gado pipel, ma now unu na en pipel. Fosi Gado no ben abi sari-ati nanga unu, ma now a abi sari-ati nanga unu.
11 Un lobiwan, unu di de trakondre sma èn di e libi wan syatu pisi ten nomo na ini a grontapu disi, mi e gi unu deki-ati fu tan kakafutu gi den takru lostu fu a sondu skin di e tan feti nanga unu.*
12 Tan tyari unsrefi na wan bun fasi na mindri den grontapusma, so taki te den e kosi unu taki unu na ogriman, den o si den bun sani di unu e du. Dati o meki den gi Gado glori na a ten te a o kon ondrosuku san wi e du.
13 Saka unsrefi na ondro den wan di e tiri unu. Du dati fu Masra ede: awinsi na ondro wan kownu, fu di en na a moro hei sma,
14 noso na ondro granman di a seni kon fu strafu den ogriman èn fu prèise den sma di e du bun,
15 bika disi na san Gado wani: un musu du bun, so taki unu kan tapu a mofo fu den don sma di e taki lawlaw sani.
16 Unu na sma di fri, ma no teki a fri fu unu fu kibri takrudu. Teki en fu dini Gado leki srafu.
17 Gi grani na ala sortu sma, lobi ala brada, lespeki Gado, gi a kownu grani.
18 Den futuboi di e wroko na ini oso musu saka densrefi nanga ala lespeki na ondro den basi fu den. Den no musu saka densrefi nomo na ondro den bun basi di no e aksi tumusi furu fu den, ma sosrefi na ondro den wan di muilek fu plisi,
19 bika efu wan sma di wani abi wan krin konsensi na fesi Gado, e horidoro te tesi miti en èn e nyan pina aladi a no du nowan ogri, dan dati na wan bun sani.
20 Iya, sortu wini a abi efu unu e horidoro te unu e kisi fonfon fu di unu sondu? Ma efu unu e horidoro te unu e nyan pina, fu di unu e du bun, dan dati e plisi Gado.
21 Fu taki en leti, Gado kari unu fu tyari unsrefi na a fasi disi, bika srefi Krestes ben nyan pina gi unu èn a libi wan eksempre gi unu, so taki unu kan waka soifri na en baka.
22 A no du nowan sondu èn a no taki nowan sani fu bedrigi sma.
23 Te sma ben e kosi en fu gi en syen, dan a no ben e kosi den baka. Te sma ben e pina en, dan a no ben e taigi den taki a o du den ogri baka, ma a ben tan saka ensrefi na ondro a sma di e krutu sani na wan reti fasi.
24 Di a ben de na a postu, dan ensrefi teki den sondu fu wi na en tapu, so taki wi no ben o abi noti fu du moro nanga sondu èn wi ben o libi na wan reti fasi. „Na den soro fu en, meki unu kon betre”,
25 bika unu ben de leki skapu di lasi pasi. Ma now unu drai kon baka na a sma di de un skapuman èn di e luku taki sani waka bun nanga unu.
Futuwortu
^ Griki wortu: psuke. Luku „Moro sani”, nr. 8
