A fosi buku fu Samuel 12:1-25
12 Te fu kaba Samuel taigi a heri pipel fu Israel: „Di unu taigi mi fu poti wan kownu fu tiri unu, mi du san unu taki.
2 We, luku a kownu di o tiri unu! Misrefi kon owru kaba, mi ede-wiwiri kon weti èn den manpikin fu mi de nanga unu. Misrefi de nanga unu sensi mi yongu èn mi de nanga unu te now ete.
3 Un luku mi, dan un piki mi leti na fesi Yehovah nanga en salfuwan: Oiti mi teki wan kaw noso wan buriki fu unu? Mi bedrigi unu, noso mi kwinsi unu? Mi teki tyuku fu tapu mi ai gi na ogri di unu du? Efu mi du iniwan fu den sani disi, dan mi o pai unu baka.”
4 Ne den piki en: „Nôno, yu no bedrigi wi. Yu no kwinsi wi èn yu no teki tyuku fu nowan fu wi tu.”
5 Dati meki Samuel taigi den: „Tide Yehovah nanga en salfuwan yere fa unsrefi taki dati mi no teki nowan sani fu unu.” Ne den taki: „Iya, a yere ala san wi taki.”
6 Dan Samuel taigi a pipel: „Yehovah na wan kotoigi. Na en poti Moses nanga Aron fu wroko gi en èn na en tyari den afo fu unu komoto na a kondre Egepte.
7 Sobun, un tanapu na fesi Yehovah meki mi krutu unu. Meki mi fruteri unu ala den reti sani di Yehovah du gi unu èn gi den afo fu unu.
8 Di Yakob kon na ini Egepte èn den afo fu unu begi Yehovah fu a yepi den, dan Yehovah seni Moses nanga Aron fu tyari den afo fu unu komoto na Egepte, so taki den ben kan kon tan na a presi disi.
9 Ma den frigiti Yehovah, a Gado fu den. Dati meki a libi den gi Sisera, na edeman fu a legre fu Hasor èn a libi den gi den Filisteasma nanga a kownu fu Moab. Ibri tron baka den feanti ben go feti nanga den afo fu unu.
10 Ne den begi Yehovah fu a yepi den. Den taki: ’Wi sondu, bika wi gowe libi Yehovah èn wi go dini den Bâal-gado nanga den Astoret-popki. Wi e begi yu, frulusu wi fu wi feanti, so taki wi kan dini yu.’
11 Dan Yehovah seni Yerubâal, Bedan, Yefta, nanga Samuel fu frulusu unu fu ala den feanti di ben de na un lontu. A ben wani taki sani waka bun gi unu.
12 Di unu si taki Kownu Nahas fu den Amonsma kon feti nanga unu, dan unu taigi mi: ’Wi no wani yere noti. Na wan kownu musu tiri wi!’ Na dati unu taki, aladi Yehovah un Gado, na un Kownu.
13 We luku, a kownu fu unu de dya now. Disi na a kownu di unu ben wani. Luku, Yehovah poti wan kownu fu tiri unu.
14 Efu unu abi bigi lespeki gi Yehovah èn unu dini en, efu unu gi yesi na en èn unu no trangayesi a komando fu Yehovah, dan unu nanga a kownu di o tiri unu, o sori krin taki unu na bakaman fu Yehovah un Gado.
15 Ma efu unu no gi yesi na Yehovah èn unu trangayesi a komando fu Yehovah, dan Yehovah o strafu unu nanga den tata fu unu.
16 Sobun, un luku a bigi sani di Yehovah o du leti na un fesi.
17 Na kotiten wi de, a no so? Mi o aksi Yehovah fu meki dondru bari èn fu meki alen fadon. Te unu si den sani disi, dan unu o kon frustan taki unu du wan bigi ogri na fesi Yehovah, fu di unu aksi en fu poti wan kownu gi unu.”
18 Ne Samuel begi Yehovah. Dan Yehovah meki dondru bari èn a meki alen fadon na a dei dati. Den sani disi meki taki a heri pipel kon frede Yehovah nanga Samuel srefisrefi.
19 Ne a pipel taigi Samuel: „Begi Yehovah yu Gado gi den futuboi fu yu, bika wi no wani dede. Boiti ala den sondu di wi du kaba, wi du ete wan ogri di wi aksi en fu poti wan kownu gi wi.”
20 Dati meki Samuel piki a pipel: „No frede. A tru taki unu du ala den ogri disi. Ma sorgu nomo taki unu no gowe libi Yehovah èn taki unu tan dini Yehovah nanga un heri ati.
21 Un no musu go dini gado di de soso sani di no e tyari wini kon èn di no man frulusu unu, bika den gado disi na soso sani.
22 Yehovah no o gowe libi en pipel, fu di a e prakseri a bigi nen fu en. Na Yehovah srefi teki a bosroiti fu meki unu tron en pipel.
23 Misrefi o tan begi Yehovah gi unu tu, fu di mi no wani sondu teige en. Boiti dati, mi o leri unu san bun èn san reti.
24 Ma sorgu nomo taki unu abi bigi lespeki gi Yehovah èn taki unu tan dini en nanga un heri ati, soleki fa en wani. Memre den bigi sani di a du gi unu.
25 Efu unu tan du ogri fu espresi, dan Gado o kiri unu, makandra nanga a kownu fu unu.”
