A fosi buku fu Samuel 18:1-30
18 Di David kaba taki nanga Saul, Yonatan kon lobi David nanga en heri ati. A kon lobi en leki fa a ben lobi ensrefi.
2 A dei dati, Saul teki David leki futuboi. A no gi David primisi fu drai go baka na en papa oso.
3 Ne Yonatan meki wan frubontu nanga David, fu di a ben lobi en leki fa a ben lobi ensrefi.
4 A puru en dyakti sondro mow, dan a gi dati na David. Boiti dati, a gi David den tra krosi fu en, en feti-owru, en bo, nanga en leribuba.
5 Bakaten, David bigin feti leki srudati tu. Awinsi pe Saul ben e seni en go, David ben e tyari ensrefi na wan koni fasi. Dati meki Saul poti en leki legre-edeman. A pipel nanga den futuboi fu Saul ben breiti nanga dati.
6 Ibri tron te David nanga den man fu en ben wini den Filisteasma èn den ben e drai kon baka fu a feti, den uma fu ala den foto fu Israel ben e waka kon miti Kownu Saul. Den ben e dansi, den ben e singi, èn den ben e bari fu prisiri. Den ben e prei poku nanga tyengretyengre èn nanga tra pokusani di gersi harpu.
7 Ibri tron baka den uma di ben e meki prisiri ben e singi:„Saul kiri dusundusun sma,Ma David kiri someni tenti dusun sma.”
8 A sani disi meki Saul ati kon bron srefisrefi, èn a no ben lobi san den sma ben e singi. A prakseri: „Den e taki dati David kiri someni tenti dusun sma èn taki mi kiri wan tu dusun sma nomo. A wan-enkri sani di den musu du ete, na fu poti en leki kownu!”
9 Sensi a dei dati, Saul no ben e frutrow David moro.
10 A dei na baka, Gado gi pasi taki Saul kisi takru prakseri* èn a bigin tyari ensrefi leki wan profeiti.* Disiten, David ben e prei poku, soleki fa a ben gwenti du. Saul ben e hori wan lansri na ini en anu.
11 Ne Saul fringi a lansri go na David. A taki: „Mi o dyuku David fasi na a skotu!” Ma David wai pasi gi en, tu tron srefi.
12 Now Saul kon frede David, fu di a ben de krin taki Yehovah de nanga David èn taki a ben gowe libi Saul.
13 Dati meki Saul seni David gowe èn a poti en leki edeman fu dusun srudati. Na so a ben teki fesi na ini a legre te den ben e go feti.
14 Ala ten David ben e du sani na wan koni fasi èn Yehovah ben de nanga en.
15 Di Saul si taki David ben e du sani na wan koni fasi, a bigin frede David.
16 Ala sma na ini Israel nanga Yuda ben kon lobi David, fu di a ben e teki fesi na ini a legre te den ben e go feti.
17 Te fu kaba Saul taigi David: „Luku, disi na Merab, a fosi umapikin fu mi. Mi o meki yu trow nanga en, ma yu musu sori mi taki yu na wan deki-ati man èn yu musu feti den feti fu Yehovah.” Ma Saul ben e prakseri: „Misrefi no o kiri en. Mi o meki den Filisteasma kiri en.”
18 Ne David taigi Saul: „Suma na mi èn suma na den famiri fu mi? Den sma na ini a famiri fu mi papa a no prenspari sma na ini Israel. Sobun, fa mi kan trow nanga na umapikin fu Kownu?”
19 Ma di a ten doro taki Saul umapikin Merab ben o trow nanga David, a kon si taki a ben trow kaba nanga Adriyel, wan man fu Mehola.
20 Ma Mikal, wan tra umapikin fu Saul, ben kon lobi David. Di sma go fruteri Saul, a ben breiti.
21 Dati meki Saul prakseri: „Disi na wan moi okasi fu kisi David. Efu mi meki a trow nanga mi umapikin, dan mi kan feni wan fasi fu meki den Filisteasma kiri en.” Dati meki Saul taigi David: „Tide yu o tron mi famiri, fu di yu o trow nanga a di fu tu umapikin fu mi.”
22 Boiti dati, Saul taigi den futuboi fu en: „Un musu go na David, ma no meki sma sabi. Taigi en: ’Luku, Kownu lobi fa yu de èn ala den futuboi fu en kon lobi yu. Sobun, trow nanga na umapikin fu Kownu, dan wi o tron famiri.’”
23 Na dati den futuboi fu Saul go taigi David. Ma David taki: „Mi no abi furu gudu èn sma no e si mi leki wan prenspari man. Toku unu e taki dati mi musu trow nanga na umapikin fu Kownu, neleki dati na wan aladei sani. Fa mi kan du dati?”
24 Ne den futuboi fu Saul drai kon baka èn den taigi en: „Na so-so-so David taki.”
25 Dan Saul taki: „Disi na san un musu taigi David: ’Yu no abi fu gi Kownu moni fu trow nanga en umapikin. Na presi fu dati, Kownu wani taki yu musu koti a fesisei-buba fu a syenpresi fu wán hondro Filistea man puru, dan yu musu tyari den kon gi en. Na so Kownu kan puru atibron na tapu den feanti fu en.’” Ma te yu luku en bun, Saul ben wani taki den Filisteasma ben musu kiri David.
26 Ne den futuboi go taigi David san Kownu wani èn David agri fu pai Kownu na a fasi disi, so taki a ben kan trow nanga na umapikin fu Kownu. Sobun, fosi a ten doro fu David pai Kownu,
27 a opo gowe nanga den man fu en èn a go feti nanga den Filisteasma. Den kiri tu hondro Filistea man, dan den koti a fesisei-buba fu a syenpresi fu den man puru. Ne David tyari ala den fesisei-buba go gi Kownu, so taki a ben kan trow nanga na umapikin fu Kownu. Na so Saul meki David trow nanga en umapikin Mikal.
28 Ne Saul kon si taki Yehovah ben de nanga David trutru. Boiti dati, Mikal, na umapikin fu Saul, ben lobi David.
29 Dati meki Saul kon frede David moro nanga moro èn sensi a ten dati Saul tron wan feanti fu David.
30 Ibri tron te den edeman fu den Filisteasma ben e kon feti nanga den Israelsma, David ben e sori taki en ben de a moro koni srudati fu Saul. Dati meki David ben kisi biginen.
Futuwortu
^ Hebrewtongo: „A takru yeye fu Gado bigin wroko na tapu Saul.”
^ A kan taki den wortu disi abi fu du nanga na aparti fasi fa profeiti ben e taki sani, noso fa den ben e tyari densrefi son leisi. Te sma ben e luku den, dan den no ben man frustan ala ten fu san ede den ben e du so. A ben kan gersi srefi leki den no ben de bun na den ede.
