A fosi buku fu Samuel 22:1-23
22 Sobun, David komoto drape, dan a lowe go kibri na ini a bergi-olo na Adulam. Di den brada fu en nanga a heri osofamiri fu en papa yere a tori, den alamala go miti en drape.
2 Boiti dati, ala sma di ben de na nowtu, ala sma di ben de na paiman èn ala sma di ben e mandi fu di a libi fu den no ben e waka bun, bigin kon drape pe David ben de, dan a tron edeman fu den. Te fu kaba, sowan fo hondro man ben de nanga en.
3 Bakaten, David komoto na ini a bergi-olo, dan a go na Mispe na ini Moab. A taigi a kownu fu Moab: „Mi e begi yu, meki mi papa nanga mi mama tan nanga unu teleki mi sabi san Gado o du nanga mi.”
4 Na so a tyari en papa nanga mama go tan na ini a kontren fu a kownu fu Moab. Den tan drape a heri pisi ten di David ben de na ini a bergi-olo pe sma no man doro so makriki.
5 Baka wan pisi ten a profeiti Gad taigi David: „Yu no musu tan na ini a bergi-olo. Go tan na a kontren fu Yuda.” Dati meki David gowe go tan na ini a busi fu Heret.
6 Wan dei di Saul ben e sidon na ondro wan tamarisk-bon na tapu wan pikin bergi na Gibeya, a yere taki sma kon sabi pe David nanga den man fu en e tan. Saul ben e hori wan lansri na ini en anu èn ala den futuboi fu en ben e tanapu na en lontu.
7 Ne Saul taigi den futuboi fu en: „Un Benyaminsma, mi e begi unu, arki mi. Mi gi un alamala gron nanga droifidyari. Unu denki taki a manpikin fu Isai o man gi unu den sani disi tu? Unu denki taki a o poti unu leki edeman fu dusun sma èn leki edeman fu hondro sma?
8 Toku un alamala span anu makandra fu gens mi. Nowan fu unu kon taigi mi taki mi eigi manpikin meki wan frubontu nanga a manpikin fu Isai. Nowan fu unu sari mi srefi. Unu no kon taigi mi taki mi manpikin gi mi futuboi deki-ati fu opo ensrefi teige mi, fu du mi ogri, bika na dati a e du now.”
9 Ne Dowek, na Edomsma di ben de edeman fu den futuboi fu Saul, piki: „Mi si a manpikin fu Isai na a foto Nob. A ben go na Akimeilek, a manpikin fu Ahitub.
10 Ne Akimeilek aksi Yehovah san David musu du. Boiti dati, a gi David nyanyan èn a gi en a feti-owru fu a Filistea man Goliat.”
11 Wantewante Kownu seni kari Akimeilek, a manpikin fu Priester Ahitub. A seni kari ala den tra priester fu Nob di ben de na ini na osofamiri fu Akimeilek en papa. Ne den alamala go na Kownu Saul.
12 Saul taki: „Yu manpikin fu Ahitub, mi e begi yu, arki mi!” Ne Akimeilek piki en: „Iya, mi masra.”
13 Saul taigi en: „Fu san ede unu nanga a manpikin fu Isai span anu makandra fu gens mi? Unu gi David brede èn unu gi en wan feti-owru, dan unu aksi Gado san David ben musu du. Na so a ben kan opo ensrefi teige mi, fu du mi ogri, bika na dati a e du now.”
14 Ne Akimeilek taigi Kownu: „David na wan reti-ati sma, a trow nanga na umapikin fu Kownu èn a de edeman fu den waktiman fu yu. Sortuwan fu den futuboi fu yu de leki en?
15 A no tide wawan mi aksi Gado san David musu du. Fa mi kan span anu makandra nanga trawan fu du yu ogri? Kownu no musu taki dati mi nanga na osofamiri fu mi papa du a sani disi, bika yu futuboi no ben sabi noti fu a tori kwetikweti.”
16 Ma Kownu taki: „Akimeilek, na dede yu o dede, makandra nanga a heri osofamiri fu yu papa.”
17 Ne Kownu taigi den srudati di ben abi a wroko fu lon na en fesi: „Un drai, dan un kiri den priester fu Yehovah, bika den e wroko makandra nanga David. Den ben sabi taki en na wan loweman, toku den no kon taigi mi!” Ma den futuboi fu Kownu no ben wani kiri den priester fu Yehovah.
18 Te fu kaba Kownu taigi Dowek: „Yu drai èn kiri den priester!” Wantewante Dowek, a man fu Edom, drai. A waka go na den priester, dan a kiri den. A dei dati a kiri aititenti na feifi man di ben e weri wan priester fesikoki fu linnen krosi.
19 Nanga feti-owru a kiri srefi ala den sma na ini a foto Nob pe furu priester ben e libi. A kiri ala den man, den uma, den pikin, den beibi, den kaw, den buriki, nanga den skapu.
20 Ma Abiatar, wan fu den manpikin fu Akimeilek di ben de a manpikin fu Ahitub, ben man lowe. A go na David èn a tron wan bakaman fu David.
21 Abiatar taigi David: „Saul kiri den priester fu Yehovah.”
22 David taigi Abiatar: „Sensi a dei di Dowek, a man fu Edom, si mi, mi ben sabi taki a ben o go taigi Saul. Na mi meki taki na ogri disi pasa nanga ala den sma na ini na osofamiri fu yu papa.
23 Tan nanga mi. No frede. A srefi sma di e suku fu kiri yu, e suku fu kiri mi tu. Solanga yu de nanga mi, noti no o pasa nanga yu.”
