A fosi buku fu Samuel 27:1-12
27 Ma David prakseri: „Wan dei Saul o kiri mi ete. Moro betre mi lowe go na a kondre fu den Filisteasma. Dan Saul o kon weri fu waka suku mi na ala sei fu Israel. Na so fasi mi kan tan na libi.”
2 Sobun, David nanga siksi hondro man go na Akes, a manpikin fu Mayok, di ben de kownu fu Gat.
3 Na so David nanga den man fu en tan libi na Akes na ini Gat. Ibriwan fu den ben go tan drape nanga en osofamiri. David ben de nanga den tu wefi fu en, Ahinowam, na uma fu Yisreyel, nanga Abigayil, na uma fu Karmel. Na a uma disi ben trow fosi nanga Nabal.
4 Baka wan pisi ten Saul yere taki David lowe go na Gat. Sensi a ten dati a no suku David moro.
5 Bakaten, David taigi Akes: „Efu yu feni en bun, dan meki mi go tan na wan fu den pikin foto na den boitipresi, bika fu san ede mi leki yu futuboi musu tan dyaso nanga yu na ini a foto fu den kownu?”
6 Sobun, a dei dati Akes gi David a foto Siklak. Dati meki den kownu fu Yuda e tiri Siklak te na a dei fu tide.
7 Wán yari nanga fo mun David tan libi na den boitipresi fu a kondre fu den Filisteasma.
8 Na ini a pisi ten dati, David nanga den man fu en go feti nanga den Geisursma, den Girsietsma, nanga den Amalèksma. Den sma disi ben e libi na ini a heri kontren na mindri Telam, Sur, nanga a kondre Egepte.
9 Te David ben e go feti nanga den sma fu a kondre, dan a ben e kiri ala den man nanga uma. Ma a ben e teki den skapu, den kaw, den buriki, den kameili, nanga den krosi fu den sma. Baka dati, a ben e drai kon baka na Akes.
10 Te Akes ben e aksi David: „Pe unu go feti tide?”, dan David ben e piki: „Wi go feti na zuidsei fu Yuda, na zuidsei fu a kontren fu den Yerameyel-sma èn na zuidsei fu a kontren fu den Kenietsma.”
11 Ma David no ben e tyari nowan man noso uma kon na Gat libilibi. A taki: „Den no musu fruteri sma, taki na so-so-so David du.” (A heri pisi ten di David ben e tan na den boitipresi na ini a kondre fu den Filisteasma, a ben e du a sani disi.)
12 Dati meki Akes bribi ala den sani di David taki. Akes prakseri: „A musu fu de taki a man disi kon de leki wan tingi sani gi den sma fu Israel. Fu ala ten a musu de mi futuboi.”
