A fosi buku fu Samuel 5:1-12
5 Bakaten den Filisteasma teki a santa kisi fu a tru Gado, dan den tyari en fu Ebeneiser go na Asdod.
2 Ne den tyari a santa kisi fu a tru Gado go poti na ini a tempel fu a gado Dagon na sei a popki fu Dagon.
3 A tra dei den Asdodsma opo fruku mamanten. Ne den si taki Dagon fadon nanga en fesi na gron na fesi a santa kisi fu Yehovah. Sobun, den opo Dagon poti na en presi baka.
4 A dei baka dati di den opo fruku mamanten, den si taki Dagon fadon baka nanga en fesi na gron na fesi a santa kisi fu Yehovah. Na ede nanga den anu fu Dagon ben koti puru èn den ben de na a doromofo fu a tempel fu Dagon. Soso a pisi fu en skin di ben gersi wan fisi, ben de ete.
5 Fu dati ede te na a dei fu tide, den priester fu Dagon nanga ala den tra sma di e go na ini a tempel fu Dagon, no e tanapu na a doromofo fu a tempel fu Dagon na ini Asdod.
6 Ne Yehovah pina den sma fu Asdod srefisrefi. A meki den bruya èn a meki den kisi sweri na ini den bille. Iya, a du dati nanga ala sma na ini Asdod èn na ini den kontren lontu a foto disi.
7 Di den sma fu Asdod kon frustan san e pasa nanga den, den taki: „No meki a santa kisi fu a Gado fu Israel tan dyaso, bika a Gado fu den e pina wi srefisrefi èn a du ogri nanga wi gado Dagon.”
8 Dati meki den seni kari ala den kownu fu den Filisteasma di ben e wroko makandra, dan den aksi den: „San wi o du nanga a santa kisi fu a Gado fu Israel?” Den kownu taki: „Meki wi seni a santa kisi fu a Gado fu Israel go na Gat.” Sobun, den tyari a santa kisi fu a Gado fu Israel go drape.
9 Di den tyari a santa kisi go na Gat, dan Yehovah meki taki den sma fu a foto dati kon bruya srefisrefi. A bigin pina den sma fu a foto, yonguwan nanga owruwan. A meki den kisi sweri na ini den bille.
10 Dati meki den seni a santa kisi fu a tru Gado go na Ekron. Ma di a santa kisi fu a tru Gado doro na Ekron, dan den Ekronsma bigin bari, taki: „Den tyari a santa kisi fu a Gado fu Israel kon dyaso fu kiri wi nanga a pipel fu wi!”
11 Dati meki den seni kari ala den kownu fu den Filisteasma di ben e wroko makandra, dan den taki: „Un seni a santa kisi fu a Gado fu Israel go baka na a presi pe a ben de, so taki a no kiri wi nanga a pipel fu wi.” Den taki disi, fu di ala sma na ini a foto ben kon bruya te fu dede. Iya, a tru Gado ben e pina den srefisrefi.
12 Ma den sma na ini a foto di no dede, ben kisi sweri na ini den bille. Dati meki den sma fu a foto bari fu kisi yepi èn a babari fu den opo go na hemel.
