A fosi buku fu Samuel 7:1-17
7 Dati meki den man fu Kiriat-Yarim kon teki a santa kisi fu Yehovah, dan den tyari en go na a oso fu Abinadab na tapu a pikin bergi. Den meki Eleasar, a manpikin fu Abinadab, kon santa, so taki a ben kan hori wakti na a santa kisi fu Yehovah.
2 A santa kisi tan na Kiriat-Yarim wan heri pisi ten. Tutenti yari langa a tan drape. Ne heri Israel bigin sari èn den bigin suku Yehovah.
3 Dati meki Samuel taigi ala den sma fu Israel: „Efu unu wani drai kon baka na Yehovah trutru, dan un musu puru den gado fu den trakondre sma na un mindri. Puru den Astoret-popki na un mindri tu èn teki a fasti bosroiti fu dini Yehovah wawan. Dan a o frulusu unu fu den Filisteasma.”
4 Ne den Israelsma puru ala den Bâal-popki nanga den Astoret-popki na den mindri èn den bigin dini Yehovah wawan.
5 Now Samuel taki: „Tyari ala den Israelsma kon makandra na Mispa, so taki mi kan begi Yehovah gi unu.”
6 Sobun, den tyari den Israelsma kon makandra na Mispa, dan den go teki watra èn den kanti en trowe na fesi Yehovah. A dei dati den tan sondro fu nyan fu sori taki den e sari.* Den taki: „Wi sondu teige Yehovah.” Baka dati Samuel bigin koti krutu gi den Israelsma drape na Mispa.
7 Bakaten den Filisteasma kon yere taki den Israelsma kon makandra na Mispa. Ne den Filistea kownu di ben e wroko makandra, hari go feti nanga Israel. Di den Israelsma yere dati, den bigin frede den Filisteasma.
8 Dati meki den Israelsma taigi Samuel: „Tan begi wi Gado Yehovah fu a yepi wi. Meki a frulusu wi fu den Filisteasma.”
9 Ne Samuel teki wan pikin skapu di ben de na bobi ete èn a tyari a heri skapu leki wan bron-ofrandi gi Yehovah. Baka dati, Samuel bigin begi Yehovah fu yepi Israel. Dan Yehovah piki en.
10 Samuel no ben kaba tyari a bron-ofrandi di den Filisteasma kon feti nanga Israel. Ne Yehovah meki dondru bari bun tranga na a dei dati èn den Filisteasma kon bruya. Na so Israel ben man wini den.
11 Dan den srudati fu Israel komoto na Mispa èn den hari go na baka den Filisteasma. Den Israelsma kiri ala den Filisteasma te na a zuidsei fu Bet-Kar srefi.
12 Now Samuel teki wan ston, dan a poti en na mindri Mispa nanga Yesana. A gi a ston a nen Ebeneiser èn a taki: „Te nanga now Yehovah yepi wi.”
13 Na so den Israelsma wini den Filisteasma èn den no kon moro na ini a kontren fu Israel. A heri pisi ten di Samuel ben de na libi, Yehovah gens den Filisteasma.
14 Safrisafri den Israelsma kisi den foto baka, di den Filisteasma ben teki fu den. Ala den foto nanga ala den kontren fu Ekron te go miti Gat, Israel puru na a anu fu den Filisteasma.
Te fu kaba feti no ben de moro na mindri den Israelsma nanga den Amorietsma.
15 Na so Samuel tan wroko leki krutuman fu Israel en heri libi langa.
16 Ibri yari a ben e go na Betel, Gilgal, nanga Mispa fu koti krutu gi den Israelsma na ala den presi disi.
17 Ma ala ten a ben e drai kon baka na Rama, bika na drape en oso ben de èn na drape a ben e koti krutu gi den Israelsma tu. Bakaten a bow wan altari drape gi Yehovah.
Futuwortu
^ Noso: „faste.” Luku „Moro sani”, nr. 24.
