A fosi brifi gi den Tesalonikasma 3:1-13
3 Sobun, di wi no ben man moro, wi ben feni en moro bun fu tan wi wawan na Ateine.
2 Dati meki wi ben seni wi brada Timoteyus kon na unu. En na wan dinari fu Gado di e preiki a bun nyunsu fu Krestes. A kon na unu fu tranga unu èn fu trowstu unu fu meki un bribi kon tranga,
3 so taki den pina disi di e miti unu, no o meki nowan fu unu degedege, bika unu srefi sabi taki wi no man wai pasi gi den sani disi.
4 Srefi di wi ben de nanga unu, wi ben fruteri unu na fesi kaba taki wi ben o nyan pina. We, na dati pasa tu, soleki fa unu sabi.
5 Fu dati ede, di mi no ben man moro, mi seni Timoteyus kon na unu fu sabi fa a de nanga a bribi fu unu, bika kande a sma di e tesi libisma feni wan fasi fu tesi unu, san ben kan meki taki a tranga wroko fu wi ben de fu soso.
6 Ma Timoteyus komoto na unu. Didyonsro a kon na wi nanga a bun nyunsu fu a bribi nanga a lobi fu unu. A fruteri wi tu taki te now ete unu e prisiri te unu e prakseri wi èn taki unu e angri fu si wi, neleki fa wi e angri fu si unu.
7 Na fu dati ede, mi brada, a fasi fa sani e waka nanga unu èn a bribi di unu e sori, de wan trowstu gi wi na ini ala wi nowtu nanga wi banawtu.
8 Wi e firi bun baka, fu di unu e tanapu kánkan leki bakaman fu Masra.
9 We, na sortu fasi wi kan sori Gado taki wi de nanga tangi fu unu ede èn fu ala prisiri di unu e gi wi na fesi wi Gado?
10 Dei nanga neti wi e begi Gado fayafaya fu wi kan miti unu èn fu wi kan gi unu san e mankeri, so taki a bribi fu unu kan kon tranga.
11 We, meki Gado wi Tata èn wi Masra Yesus opo a pasi gi wi fu kon na unu.
12 Sosrefi, meki Masra yepi unu fu meki un lobi gro, iya, fu meki un sori lobi gi makandra èn gi ala tra sma moro nanga moro, neleki fa wi e sori lobi gi unu moro nanga moro.
13 Na so fasi a o meki un ati kisi krakti. A o meki unu de sondro fowtu èn santa na fesi Gado wi Tata, te wi Masra Yesus kon nanga ala den santawan fu en.
