A fosi brifi gi den Tesalonikasma 5:1-28
5 We, mi brada, a no de fanowdu fu skrifi unu fu den ten nanga den spesrutu pisi ten,
2 bika unu sabi heri bun taki a dei fu Yehovah o kon leki wan fufuruman na neti.
3 Te sma e taki: „Freide de èn ala sani e waka bun!”, dan wantronso wan pori o kon na den tapu neleki fa a hebi pen fu wan uma di de fu meki wan pikin, e kon na en tapu wantronso. Den no o man lowe kwetikweti.
4 Ma mi brada, fu di unu no de na dungru, meki a dei dati no o kon na un tapu leki fa deiten e kon miti fufuruman wantronso,
5 bika un alamala na manpikin fu a leti èn manpikin fu deiten. Wi a no sma fu a neti, noso sma fu a dungru.
6 Sobun, meki wi no sribi go doro leki fa den tra sma e sribi, ma meki wi tan wikiwiki èn meki wi tan na ai,
7 bika den sma di e sribi, gwenti sribi te neti èn den sma di e kon drungu, e drungu te neti.
8 Ma meki wi di de fu deiten, de na ai èn meki a bribi nanga a lobi fu wi de leki wan sani di wi e weri fu kibri a borsu fu wi. Meki a howpu di wi abi taki wi o kisi frulusu, de leki wan hèlm gi wi,
9 bika Gado no wani taki wi firi a bigi atibron fu en, ma taki Masra Yesus Krestes frulusu wi.
10 Yesus dede gi wi, so taki wi o man libi makandra nanga en, awinsi wi de na libi noso awinsi wi dede.*
11 Sobun, tan gi makandra deki-ati èn tan yepi makandra, soleki fa unu e du kaba.
12 Mi brada, now wi e begi unu fu lespeki den sma di e wroko tranga na un mindri, di e teki fesi na un mindri te den e du a wroko fu Masra èn di e gi unu rai.
13 Abi furu lespeki gi den èn lobi den gi a wroko di den e du. Du ala san un man du fu libi bun nanga tra sma.
14 Na a tra sei, mi brada, wi e gi unu deki-ati fu warskow den sma di no e tyari densrefi soleki fa a fiti. Taki na wan fasi di e trowstu den sma di lasi-ati. Yepi den swakiwan èn abi pasensi nanga ala sma.
15 Luku bun taki nowan fu unu e pai trawan ogri fu ogri. Ma ala ten un musu du muiti fu du bun gi makandra èn gi ala tra sma.
16 Ala ten un musu prisiri.
17 Begi doronomo.
18 Taki Gado tangi gi ala sani, bika na dati Gado wani taki un musu du, fu di unu na bakaman fu Krestes Yesus.
19 No tapu a yeye fu Gado fu a wroko na ini unu.
20 No si den profeititori leki soso sani.
21 Ondrosuku ala sani fu luku efu den tru. Tan du sani di bun.
22 Tan farawe fu ibri sortu ogridu.
23 Meki a Gado fu freide srefi meki unu kon santa dorodoro. Brada, meki a heri fasi fa unu e denki, a heri libi* fu unu nanga a heri skin fu unu tan bun na ala fasi èn meki a tan de krin teleki wi Masra Yesus Krestes kon.
24 A sma di e kari unu, e du ala ten san a pramisi. A no abi misi taki a o du en.
25 Mi brada, tan begi gi wi.
26 Gi ala brada odi nanga wan santa bosi.
27 Mi e begi unu na ini a nen fu Masra fu leisi a brifi disi gi ala brada.
28 Meki wi Masra Yesus Krestes sori unu bun-ati.
