A fosi brifi fu Yohanes 4:1-21
4 Un lobiwan, no bribi ala boskopu di gersi leki den kon fu Gado, ma ondrosuku den boskopu disi fu si efu den kon fu Gado trutru, bika furu falsi profeiti de na grontapu.
2 Disi na fa unu e kon sabi den boskopu fu Gado: Te wan sma e taki dati Yesus Krestes kon leki wan libisma, dan a sani di a taki kon fu Gado.
3 Ma te wan sma e taki dati Yesus no kon leki libisma, dan a sani di a taki no kon fu Gado. Boiti dati, disi na den sani di a feanti fu Krestes* taki. Unu yere taki a feanti fu Krestes ben o kon èn now a de kaba na grontapu.
4 Mi pikin, unu na fu Gado èn unu wini den falsi profeiti, bika Gado di de wán nanga unu, bigi moro Didibri di de wán nanga grontapu.
5 Den na fu grontapu. Dati meki den e taki sani di de fu grontapu èn grontapu e arki den.
6 Wi na fu Gado. A sma di e kon sabi Gado, e arki wi. A sma di no de fu Gado, no e arki wi. Disi na fa wi kan kon sabi efu sma e taki sani di e kon fu Gado, iya, efu den e taki sani di tru, noso efu den e taki lei.
7 Un lobiwan, meki wi tan lobi makandra, bika lobi e kon fu Gado. Ibri sma di lobi trawan, na wan pikin fu Gado èn a kon sabi Gado.
8 A sma di no lobi trawan, no kon sabi Gado, bika Gado na lobi.
9 Disi na a fasi fa Gado sori taki a lobi wi: Gado ben seni en wan-enkri Manpikin kon na grontapu, so taki a kan yepi wi fu kisi libi.
10 A lobi disi no wani taki dati na wi ben lobi Gado, ma taki en ben lobi wi èn a seni en Manpikin kon leki wan ofrandi di e tapu den sondu fu wi èn di e meki wi kon bun baka nanga Gado.
11 Un lobiwan, efu disi na fa Gado lobi wi, dan wisrefi de fruplekti fu lobi makandra tu.
12 Noiti ete wan sma si Gado. Efu wi tan lobi makandra, dan Gado e tan nanga wi èn wi man sori a lobi fu en krinkrin.
13 Wi sabi taki wi de wán nanga en èn taki en de wán nanga wi, fu di a gi wi a yeye fu en.
14 Boiti dati, wisrefi si taki a Tata seni en Manpikin kon leki Frulusuman fu grontapu èn wi e kotoigi fu disi.
15 Efu wan sma e taki krin dati Yesus Krestes na a Manpikin fu Gado, dan Gado de wán nanga a sma dati èn en de wán nanga Gado.
16 Wisrefi kon sabi taki Gado lobi wi èn wi kon bribi dati tu.
Gado na lobi èn efu wan sma tan sori lobi, dan a de wán nanga Gado èn Gado de wán nanga en.
17 Disi e yepi wi fu man sori trutru lobi, so taki wi kan taki fri na a krutudei, bika soleki fa Krestes de, na so wi de tu na ini a grontapu disi.
18 Te wan sma abi lobi, dan a no e frede. Trutru lobi e puru frede, bika frede e tapu sma fu du sani. Iya, a sma di e frede, no man sori trutru lobi.
19 Ma wi abi lobi, fu di na Gado fosi ben lobi wi.
20 Efu wan sma e taki: „Mi lobi Gado”, ma toku a e teige en brada, dan a sma dati na wan leiman, bika a sma di no lobi en brada di a man si, no man lobi Gado di a no man si.
21 Disi na a komando di wi kisi fu en: a sma di lobi Gado, musu lobi en brada tu.
Futuwortu
^ Noso: „anti-krestes.”
