A di fu tu buku fu den Kownu 16:1-20
16 Na ini a di fu tinaseibi yari di Peka, a manpikin fu Remalia, ben e tiri leki kownu, Akas, a manpikin fu Kownu Yotam fu Yuda tron kownu.
2 Akas ben abi tutenti yari di a bigin tiri. Tinasiksi yari langa a tiri leki kownu na Yerusalem. Akas no du san Yehovah en Gado feni bun. A no ben de leki en afo David.
3 Akas du soleki fa den kownu fu Israel ben du. Srefi en eigi manpikin a bron na ini faya. A du ala sortu tegu sani, neleki den trakondre sma di Yehovah ben yagi komoto na ini a kondre gi den Israelsma.
4 Ala ten baka Akas ben e tyari srakti-ofrandi nanga smoko-ofrandi na den hei presi pe sma ben e anbegi falsi gado. A ben du disi sosrefi na tapu den pikin bergi èn na ondro ala den bigi bon di abi furu wiwiri.
5 Ne Kownu Resin fu Siria, nanga Kownu Peka fu Israel, a manpikin fu Remalia, kon feti nanga Akas. Den lontu Yerusalem, ma den no ben man teki a foto abra.
6 Na a ten dati Kownu Resin fu Siria gi den sma fu Edom a foto Elat baka. Dati meki a puru ala den Dyu na ini Elat èn den sma fu Edom go libi baka na ini a foto. Te na a dei fu tide den e libi drape ete.
7 Dati meki Akas seni boskopuman fu go taigi Kownu Tiklat-Pileiser fu Asiria: „Mi de leki wan futuboi èn wan manpikin gi yu. Kon yepi mi feti nanga a kownu fu Siria èn nanga a kownu fu Israel. Puru mi na a anu fu den kownu disi di opo kon feti nanga mi.”
8 Sobun, Akas teki a solfru nanga a gowtu di ben de na ini na oso fu Yehovah èn na ini den kamra fu na oso fu Kownu pe a ben e kibri den gudu fu en. Dan a seni den sani disi gi a kownu fu Asiria leki tyuku.
9 Ne a kownu fu Asiria du san Akab aksi en. A go na Damaskus èn a teki a foto disi abra. Dan a tyari ala den sma fu a foto go na Kir leki katiboman èn a kiri Resin.
10 Di Kownu Akas go na Damaskus fu miti Kownu Tiklat-Pileiser fu Asiria, a si na altari di ben de drape. Ne Kownu Akas seni taigi Priester Uria fa na altari na Damaskus ben de èn a aksi en fu meki wan altari neleki a wan dati.
11 Dan Priester Uria meki en soifri leki fa Kownu Akas seni aksi en di a ben de na Damaskus. Fosi Kownu Akas drai kon baka fu Damaskus, Priester Uria ben meki na altari kaba.
12 Di Kownu Akas komoto na Damaskus, a si na altari. Ne a go drape fu tyari ofrandi na en tapu.
13 A teki a bron-ofrandi nanga a nyanyan-ofrandi fu en èn a bron den na tapu na altari. Baka dati a kanti a dringi-ofrandi fu en na en tapu. Dan a teki a brudu fu den freide-ofrandi fu en èn a natinati na altari nanga a brudu.
14 Ne Kownu Akas teki a kopro altari di ben de na fesi na oso fu Yehovah, dan a tyari en go poti na noordsei fu a wan di a ben meki. Fosi, a kopro altari ben de na fesi na oso, na mindri na altari fu Akas nanga na oso fu Yehovah.
15 Now Kownu Akas taigi Priester Uria: „Na tapu a bigi altari yu musu bron a mamanten bron-ofrandi, a mofoneti nyanyan-ofrandi, a bron-ofrandi nanga a nyanyan-ofrandi fu Kownu, sosrefi a bron-ofrandi, a nyanyan-ofrandi, nanga a dringi-ofrandi fu ala den sma di e libi na ini a kondre. Teki a brudu fu ala den meti di yu tyari leki bron-ofrandi èn leki srakti-ofrandi, dan yu musu natinati na altari nanga a brudu dati. Baka dati mi o luku san mi o du nanga a kopro altari.”
16 Na so Priester Uria du ala den sani di Kownu Akas taigi en fu du.
17 Ne Kownu Akas puru den kopro plaat di ben de na seisei fu den wagi di ben de na a dyari fu na oso fu Gado, dan a koti a kopro pisipisi. Baka dati a puru den beki di ben de na tapu den wagi. A puru a bigi kopro beki tu di ben de na tapu a baka fu den kopro mankaw, dan a poti a beki na tapu ston-gron.
18 Kownu Akas ben frede a kownu fu Asiria. Dati meki a puru a heri daki di ben e tapu a pisi dyari fu na oso fu Gado, pe sma ben e go na den Sabat-dei. Boiti dati, a puru a doro pe den kownu ben kan pasa go na ini na oso fu Yehovah.
19 Ala tra sani di abi fu du nanga Akas èn den sani di a du, skrifi na ini a buku di e taki fu den tori fu den kownu fu Yuda.
20 Te fu kaba Akas go rostu neleki den afo fu en èn den beri en na a beripe fu den afo fu en na ini a Foto fu David. Dan en manpikin Heskia bigin tiri leki kownu.
