A di fu tu buku fu den Kownu 19:1-37
19 Di Kownu Heskia yere a tori, dan wantewante a priti en krosi. Baka dati a weri krosi di sma gwenti weri te den e sari, dan a go na ini na oso fu Yehovah.
2 Boiti dati, Heskia meki Eliakim, di ben abi a frantwortu fu sorgu taki sani waka bun na ini na oso fu Kownu, Sekretarsi Sebna, nanga den edeman fu den priester, weri krosi tu di sma gwenti weri te den e sari. Dan a seni den go na a profeiti Yesaya, a manpikin fu Amos.
3 Di den doro na Yesaya, den taigi en: „Disi na san Heskia taki: ’A dei disi na wan dei fu banawtu, wan dei fu piri-ai èn fu bigi syen, bika wi kon de leki wan uma di de fu meki en pikin, ma di no abi a krakti fu du dati.
4 Kande Yehovah yu Gado o yere ala den sani di Rabsakei taki. A kownu fu Asiria ben seni en fu spotu a libilibi Gado. Kande Yehovah yu Gado o aksi en frantwortu fu den sani di a taki. Begi gi den sma di tan abra na ini a kondre disi.’”
5 Na so den futuboi fu Kownu Heskia go na Yesaya.
6 Ne Yesaya taigi den: „Na disi un musu go taigi un masra: ’Disi na san Yehovah taki: „No arki den sani di den futuboi fu a kownu fu Asiria taki fu spotu mi. No meki den frede yu.
7 Mi o poti wan prakseri na en ede, so taki a o drai go baka na en eigi kondre te a kisi wan boskopu. Dan mi o meki sma kiri en nanga feti-owru leti drape na ini en eigi kondre.”’”
8 Baka dati Rabsakei yere taki a kownu fu Asiria hari komoto fu Lakis. Dati meki a drai go baka na a kownu fu Asiria. Di a doro drape a si taki a kownu ben e feti nanga den sma fu Libna.
9 A yere sma e taki tu fu Kownu Tirhaka fu Etiopia: „A hari kon feti nanga yu.” Dati meki Rabsakei seni boskopuman go na Heskia ete wan tron. A taigi den:
10 „Disi na san un musu taigi Kownu Heskia fu Yuda: ’No bribi a Gado fu yu te a e taki dati a no o meki a kownu fu Asiria wini Yerusalem.
11 Luku, yu srefi yere taki den kownu fu Asiria pori ala den tra kondre. Dan fa yu kan denki taki yu o kisi frulusu?
12 Den gado fu den tra kondre di den afo fu mi ben pori, ben man frulusu den sma fu den? Yu sabi ete san pasa nanga den sma fu Gosan, Haran, Resef, nanga den bakapikin fu Eden di ben de na Tel-Asar?
13 Pe a kownu fu Hamat, a kownu fu Arpad, a kownu fu den foto Sefarfayim, Hena, nanga Ifa de now?’”
14 Ne Heskia teki den brifi fu den boskopuman èn a leisi den. Baka dati a go na a oso fu Yehovah èn a poti den brifi na gron na fesi Yehovah.
15 Dan Heskia begi Yehovah. A taki: „Ke Yehovah, a Gado fu Israel, di e sidon na tapu den kerub-engel. Yu wawan na a tru Gado fu ala den kownukondre na grontapu. Na yu meki hemel nanga grontapu.
16 Ke Yehovah, arki mi. Yehovah, opo yu ai fu si san e pasa èn poti prakseri na den sani di Sanherib seni taigi wi fu spotu a libilibi Gado.
17 Yehovah, yu srefi sabi taki den kownu fu Asiria pori den tra pipel nanga den kondre fu den.
18 Den kownu fu Asiria bron den gado fu den tra kondre nanga faya, fu di den no ben de gado trutru. Na sma ben meki den fu udu nanga ston. Na fu dati ede den kownu fu Asiria ben man pori den.
19 Dati meki wi e begi yu, Yehovah wi Gado, fu puru wi na a anu fu a kownu fu Asiria, so taki ala kownukondre na grontapu o sabi taki yu Yehovah, yu wawan na Gado.”
20 Bakaten, Yesaya, a manpikin fu Amos, seni boskopu gi Heskia. A taki: „Disi na san Yehovah, a Gado fu Israel, taki: ’Yu aksi mi fu poti prakseri na a tori fu Kownu Sanherib fu Asiria èn mi yere a begi fu yu.
21 Mi, Yehovah, taki san o pasa nanga en:„Na umapikin fu Sion, di de wan nyunwenke ete, ben wisiwasi yu. A spotu yu.Te yu drai yu baka, dan na umapikin fu Yerusalem e seki en ede èn a e lafu yu.
22 Suma yu e spotu èn suma yu e kosi?Suma yu e gi bigitaki?Suma yu e luku na so wan heimemre fasi?Na a Santawan fu Israel!
23 Yu seni boskopuman kon fu spotu Yehovah. Yu taki:’Nanga den someni fetiwagi fu mi,Mi srefi o kren go te na a ede fu den bergi na den bergikontren,Te na den moro farawe presi fu Libanon.Ala den hei sedrebon nanga den moro bun yaneifer-bon di de drape, mi o koti trowe.Dan mi o go na a moro farawe tanpe na ini Libanon, sobun na a busi di gersi wan moi dyari.
24 Mi srefi o diki watrapeti èn mi o dringi a watra fu wan tra kondre.Nanga mi ondrofutu mi o meki ala den kriki fu Nijl-liba na ini Egepte, kon drei.’
25 Yu no yere san mi o du? Someni langa kaba mi taki dati mi o du a sani disi.Sensi ten mi seti a tori disi kaba.Now mi o meki a kon tru.Na yu o pori den foto di abi bigi skotu. Den o tron brokopresi pe nowan sma e tan.
26 Den sma di e libi na ini den foto disi, no o man du noti.Den o frede srefisrefi èn den o firi syen.Den o kon de leki sani di e gro na gron èn leki yongu grasi.Den o tron leki a grasi na tapu den daki, grasi di kon drei na ini a faya winti fu owstusei.
27 Mi sabi te yu e sidon pî, te yu e opo go na dorosei èn te yu e kon na inisei baka.Mi sabi tu te yu ati e bron nanga mi.
28 Mi sabi den sani disi, bika te na hemel mi yere fa yu ati e bron nanga mi èn fa yu e opo yu sten gi mi.Dati meki mi o poti mi aka na ini yu noso èn mi o poti wan titei na ini yu mofo fu tiri yu leki wan asi.Dan mi o meki yu drai gowe baka na a srefi pasi di yu ben teki fu kon dyaso.”
29 We, disi na a fasi fa yu, Heskia, o sabi taki den sani disi o kon tru: A yari disi unu o nyan sani di unu no prani, ma di gro kon fu siri di ben fadon na gron. Tra yari unu o nyan na aleisi di o gro sondro taki wan sma prani en. A yari baka dati un musu sai siri èn koti a nyanyan fu en. Boiti dati, un musu prani droifibon tu èn nyan den froktu fu den.
30 Den bakapikin fu Yuda di lowe gowe èn di de na libi ete, o de leki bon di teki rutu. Den rutu fu den o beri go na ini a gron èn den o gi bun froktu,
31 bika den sma di tan abra na ini a kondre disi, o hari gowe fu Yerusalem makandra nanga den wan di lowe komoto na Sion-bergi. Iya, Yehovah di e tiri den legre o meki a sani disi pasa nomonomo.
32 Dati meki Yehovah e taki fu a kownu fu Asiria: „A no o kon na ini a foto disi èn a no o sutu nowan peiri na ini tu. A no o teki nowan skelt fu go feti nanga a foto èn a no o meki nowan dan lontu en.
33 A srefi pasi di a teki fu kon feti, na a pasi dati a o teki fu drai gowe baka. Ma na ini a foto disi a no o kon, na so Yehovah taki.
34 Mi o opo feti gi a foto disi èn mi o frulusu den sma di e libi drape. Mi o du disi fu mi nen ede èn fu mi futuboi David ede.”’”
35 We, a srefi neti dati na engel fu Yehovah pasa go na ini a legrekampu fu den Asiriasma, dan a kiri wán hondro aititenti na feifi dusun srudati. Di sma wiki fruku mamanten, den si den dedeskin fu ala den srudati disi.
36 Dati meki Kownu Sanherib fu Asiria hari gowe, a drai go baka na Asiria èn a go libi na Ninefei.
37 Wan dei di Sanherib ben e saka kindi boigi na ini a tempel fu en gado Nisrok, dan Adrameilek nanga Sareiser, den manpikin fu en kiri en nanga feti-owru. Baka dati den lowe go na a kontren fu Ararat. Dan en manpikin Esar-Hadon bigin tiri leki kownu.
