A di fu tu brifi fu Petrus 1:1-21
1 Mi, Simon Petrus, di de wan srafu èn sosrefi wan apostel fu Yesus Krestes, e skrifi den wan di kisi a srefi grani leki wi, fu di den teki a Kresten bribi. Den kisi na okasi fu teki a bribi disi, fu di a Gado fu wi nanga Yesus Krestes, wi Frulusuman, e du san reti:
2 Meki Gado sori unu bun-ati moro nanga moro èn meki a gi unu moro freide sosrefi te unu e kon sabi den finifini tori fu Gado èn fu Yesus wi Masra,
3 bika na a krakti fu Gado meki taki wi abi ala sani di de fanowdu fu kisi libi èn fu man dini Gado fayafaya. Wi kon abi den sani disi fu di wi kon sabi den finifini tori fu a sma di kari wi nanga a glori èn a bunfasi fu en.
4 Nanga den sani disi a pramisi wi den sani di warti èn di bigi srefisrefi. Na den sani disi kan meki unu tron sma di de leki fa Gado de, bika unu lowe komoto na ini den sani di e pori a grontapu disi fu di sma no man dwengi den tranga lostu fu den.
5 Fu dati ede, boiti taki unu abi bribi, un musu du ala muiti fu kon abi bunfasi. Boiti taki unu abi bunfasi, un musu kon abi sabi.
6 Boiti taki unu abi sabi, un musu man dwengi unsrefi. Boiti taki unu man dwengi unsrefi, un musu horidoro. Boiti taki unu e horidoro, un musu dini Gado fayafaya.
7 Boiti taki unu e dini Gado fayafaya, un musu lobi un brada. Boiti taki unu lobi un brada, un musu lobi ala sma,
8 bika efu unu abi den sani disi bogobogo, dan dati o yepi unu fu no de sma di no e du noti nanga a soifri leri di abi fu du nanga Masra Yesus Krestes èn fu no de sma di de leki wan bon di no e meki froktu.
9 Ma efu wan sma no abi den sani disi, dan a sma dati breni, fu di a e tapu en ai gi a leti èn a frigiti taki a kon krin fu den sondu di a ben du fosi.
10 Fu dati ede brada, du ala muiti fu tan de wan fu den sma di Gado kari èn di a teki. Efu unu tan du den sani disi, dan noiti unu o fadon.
11 Fu taki en leti, na a fasi disi unu o kisi a bigi blesi fu go na ini a têgo Kownukondre fu wi Masra nanga wi Frulusuman Yesus Krestes.
12 Fu dati ede, ala ten mi o de klariklari fu memre unu na den sani disi, aladi unu sabi den èn unu e tai hori na den tru tori di unu leri.
13 Ma solanga mi de na ini a tenti disi, mi denki taki a bun fu memre unu na den sani disi so taki unu kan de na ai,
14 bika mi sabi taki dyonsro den o puru a tenti fu mi, soleki fa wi Masra Yesus Krestes ben sori mi tu.
15 Sobun, ala ten mi o du ala san mi man, so taki baka te mi gowe, unsrefi o man memre den sani disi.
16 Wi meki unu kon sabi a krakti fu wi Masra Yesus Krestes. Wi meki unu kon sabi sosrefi na sortu ten a o kon. A no fu di wi ben arki anansitori di libisma meki na wan koni fasi, meki wi yepi unu kon sabi den sani disi, ma na fu di wi si a glori fu Krestes nanga wi eigi ai,
17 bika Gado a Tata ben gi en grani nanga glori. Disi pasa di a sma pe a bigi glori e komoto, ben taki sani soleki: „Disi na mi manpikin, mi lobiwan, di mi srefi feni bun.”
18 Iya, di wi ben de nanga en na tapu a santa bergi, wi ben yere den wortu disi e komoto fu hemel.
19 Dati meki wi kisi moro frutrow na ini den profeititori. A ben o bun efu unu tan poti prakseri na den profeititori disi, neleki fa unu ben o tan poti prakseri na wan lampu di e skèin na wan dungru presi, na ini un ati, teleki dei broko èn wan mamanten stari opo.
20 Na a fosi presi unu sabi taki nowan profeititori fu Gado Buku komoto fu wan sma en eigi denki,
21 bika noiti profeititori kon fu di libisma wani, ma libisma ben taki san ben komoto fu Gado, soleki fa a santa yeye ben e sori den.
